Luka 2 - Núúboòd Gú'dúgke Puu Sambə́ Nwɔŋú bìá

Lɛbké Yéésù bìá

¹ Sɛŋ də bərə, Gààd gbà'á Roma yɛ́b bə bə̀ Ogustus, tùm pii nwɔŋ boò bád nɛ́b bəraa ləə Roma yɛ́b bərə kóólé nə́gə́lá.

² Aarə, nə́gə́l bádǹmbə̀ éèn də̀gə̀ də̀gə̀ bìá. Sɛŋ də, Kirinius kùmsə̀n Gààd Siriya yɛ́b bə bìá.

³ Nɛ́b bəd kóólé, ìì ɛ̀m nə́gə́l boò bádǹmbìá, kóó nɛ́ɛ̀réè oò bìlú.

⁴ Yusufu kɔ̀ zá'à Nazaratu bìlú, Galili yɛ́b ba, ɛ̀m Yahudiya yɛ́b ba, Baitilama bìlú. Bìl aarə, ìì lɛ̀b gààd Dauda wərà. Yusufu ɛ̀m wərə̀ rə, kàandə, kə̀ yíl oò bə̀ máá, Gààd Dauda kuná.

⁵ Ɛ̀m nə́gə́l oò bádǹmbə̀ wərə̀, kə̀ Mariyama, kéèn aa tab bít bɔ̀b bàgə̀l lə tá.

⁶ Bít sɛŋ aa ìì tə́ Baitilama bìlú rə, nyàm aa Mariyama dá lɛbm̀ bərə yaà wə́ə́ yàá.

⁷ Lɛ̀b wàà váàndo mɔ̀dǹ oò zɔ̀ŋə yɛ́b ba. Pa' dàbə̀ gɔ̀sú, bít lə́ə́ù inzanzáàn kə̀ə̀rú. Kàandə, ìì bɔ̀b zɔ̀ŋ ləə̀nmbə̀ wúl aa lə́ə́ bə̀ sáá sɛ̀ɛ́n bəd dú rə sé.

Malaika nə́ŋ̀ yaà vúg bɛ̀rə̀ yibə̀ bəd sunú

⁸ Sɛŋ də, yɛ́b aarə bəní sɔ̀ŋ, bɛ̀rə̀ yibə̀ bəd kùm fɔ̀gú, tígə́lú; ìì tə́ bɛ̀rə̀ gə̀b boò nwánàá.

⁹ Báátììkpɛ̀ŋ malaika yaà vúg boò sunú, bít Báátììkpɛ̀ŋ kaŋsɛ́l laa nyɛdkè bə̀ yaà nyɛd páá bə̀ tə́ŋú zé dág. Kàanyée gə́, də́dǹ mà' bə̀ì gbàákù.

¹⁰ Zá malaika bàà bə̀: «Ìì nùù də́dǹ sí, kàandə, mə́ ààiyà Nwɔŋ Puu Sɔ̀ɔ̀nkè aa dá nɛ́b bəd kóólé tɛ́m làmkè gbà'á piìn doó.

¹¹ Nyà'aa yóo, bə̀ lɛ̀b ii Nɛ́d Nɛ́ŋə̀ bə̀ Súùn tə́ Dauda bìlú. Oòra kùmsə̀n Krístù, Báátììkpɛ̀ŋá.

¹² Bít ìì ɛ̀g nɛɛ̀n aa íí dáù ráàn gabm̀ dú roó' Íí dáráàn bɔbm̀ bə̀ dàb wàà bəəro nə́ŋ̀ tə́ gɔ̀sú, bít bə̀ lə́ə́ù tə́ inzanzáàn kə̀ə̀rú.»

¹³ Kə̀ nwɔŋ aa nuù yée kíinní, malaika lɛgú paà bə̀ gùùbə̀ bəd yaà bə̀ wál kə̀ malaika nə́ŋ̀ aa tá. Boò kóólé, nàà bə̀ káŋ Vɛnɛ́bá, ìì bàà:

¹⁴ «Kaŋsɛ́l laa nyɛdkè bə̀ gə́, tə́ Vɛnɛ́b naà lɛgú poú, bít tɛbə̀ kɔ̀, tə́ nɛ́b bəraa Vɛnɛ́b í' bə̀ rə yílú!»

Bɛ̀rə̀ yibə̀ bəd ɛ̀m Baitilama bìlú

¹⁵ Bít malaika bəd zá' ìì dàà bɛ̀rə̀ yibə̀ bəd kúnú, kid bə̀ bíd kíìn lɛgə́ poú. Bɛ̀rə̀ yibə̀ bəd bàà ɔ̀dnə́ŋ̀ bəd boò bòdba: «Báà ɛɛ̀m Baitilama bìlú, dáá báà bé'ǹnà in aa taà roó, in aa Báátììkpɛ̀ŋ ì' bə́n báà gabm̀ kíìn yéroó.»

¹⁶ Bə̀ ɛ̀m kə̀ báŋ báŋ, dáá ìì bɔ̀b Mariyama kə̀ Yusufu tá, bít wàà bəə rə kɔ̀ bə̀ lə́ə́ù tə́ inzanzáàn kə̀ə̀rú.

¹⁷ Zɔ̀ŋ aa ìì bé'ù gə́, bə̀ ùd in aa malaika bàà bà wàà bɛ̀ŋ́sə̀ wàà rə yílú roó.

¹⁸ Bít nɛ́b aa kìì nwɔŋ aa bɛ̀rə̀ yibə̀ bəd ùd də kóólé kò' bə̀ yíl yàá.

¹⁹ Zá Mariyama gə́, zíg in aa kóólé tɛ́m ba, bít dìì taà ní seèlǹmbìá.

²⁰ Bít bɛ̀rə̀ yibə̀ bəd kid bə̀ bíd kíìn zɔ̀ŋ aa bə̀ kùmà bərə ba. Bə̀ káŋ Vɛnɛ́bá, bít ìì mɔ̀'ù kə̀ in bəraa ìì kìì bít ìì bé' rə kóólé. Kàandə, in bəd kóólé taà kìínmbə̀ nɛɛ̀n aa malaika bàà bə̀ rə kíni.

Bə̀ páá Yéésù nə́gə́lá

²¹ Nyàm aa wàà kàŋ wə́ə́ sɛŋ dàgwà bərə, sɛŋ aa bə̀ dá wàà gàb ná'ǹ bərə yaà wə́ə́ yàá. Bə̀ pááù nə́gə́l Yéésù. Nə́gə́l aarə, malaika bàà bə̀, bɔ̀b bə́ŋ̀ nà'á oò bɔ̀b bàgə̀l sé.

Dá bə̀ ì' Yéésù láŋsə́ wúuú

²² Bítsɔ̀ŋ, sɛŋ aa Yusufu kə̀ Mariyama tá, ìì dá si' boò piŋ̀ bə, kìínmbə̀ Musa indaŋ̀mbə̀ bàà boò mà' rú rə kíin də, yaà wə́ə́ yàá. Kàanyée gə́, bə̀ àà wàà Urusalima bìlú, oò bə̀ dáàn i'ǹmbə̀ Báátììkpɛ̀ŋ númú.

²³ Kàandə, bád bə̀ dàà tə́ Báátììkpɛ̀ŋ indaŋ̀mbə̀ rú kə̀ aakíin: «Wàà mɔ̀dǹ váàndo gə́ kóólé, bə̀ dá Báátììkpɛ̀ŋ piinàá.»

²⁴ Yéésù nà'á oò kə̀ báá oò tá, bə̀ dá sadaka piìn kɔ̀, kìínmbə̀ Báátììkpɛ̀ŋ indaŋ̀mbə̀ bàà rə kíin: «Íí dá piìn mìrə̀ vɔɔmlaa yɛb iira, sínkɔ̀ mìrə̀ gə́blə̀ yɛb iira.»

Simeon Nábá

²⁵ Sɛŋ də, nɛ́ŋə̀ nə́ŋ̀ Urusalima bìlú, nə́gə́l oò Simeon. Nɛ́ŋ váàndo aarə, nɛ́d sɔ̀ɔ̀ná, nɛ́d Vɛnɛ́b bə̀ bagǹ sɔ̀ɔ̀ná. Oòrə, tə́ nɛ́ŋə̀ aa yaà dá Nɛ́b Israila bə̀ Súùn də nwánàá. Nwul Gìdń kùm kə̀ oò tá.

²⁶ Oò gə́, Nwul Gìdń bààù val kò'ù gá, oò dá sína Krístù aa Vɛnɛ́b tùmà, Báátììkpɛ̀ŋ bàà dàà rə bé'nàá.

²⁷ Nwul Gìdń gùb àà Simeon láŋsə́ wúuú. Mariyama kə̀ Yusufu tá, ìì àà wàà boò Yéésù láŋsə́ wúu, bɔ̀b in aa Vɛnɛ́b indaŋ̀mbə̀ bàà boò mà' rə ma'ǹmbìá.

²⁸ Simeon pà' wàà rə nɛɛ̀n tɛ́mú, bít káŋ Vɛnɛ́b kə̀ baànmbə̀ kə̀ aakíin:

²⁹ «Bə́ŋyée gə́, Báátììkpɛ̀ŋá, nwɔŋ aa bàà ń dàà rə, ma'míìn yàá. Ǹ dàà val oò kò' nɛ́d tù' bə̀ ma'ǹ ń kə̀ tɛbàá.

³⁰ Kàandə, núù mə́ bé' Nɛ́d Nɛ́ŋə̀ bə̀ Súùn aa ń tùmà rə yàá,

³¹ Nɛ́d Nɛ́ŋə̀ bə̀ Súùn aa ń ú'wà, bɔ̀b nɛ́b bəd kóólé boò bé'ù kíìn doó.

³² Oòra kùmsə̀n laa nyɛdkè aa dá nɛ́b aa bàg Vɛnɛ́b síndə kpaŋ̀ i'nàá, bít dá nɛ́b ḿ Israila bə̀ bəd kaŋsɛ́l laa nyɛdkè bə̀ piìn doó.»

Nwɔŋ aa Simeon bád dàà roó

³³ Yéésù bóò kə̀ nà'á oò tá, nwɔŋ bəraa Simeon tə́ gáàm wàà boò yílú rə, kò' bə̀ yíl yàá.

³⁴ Simeon zíg bə̀ nɛɛ̀n yílú, bít bàà Mariyama wàà nà'á oò nwɔŋ aa yóo: «Wàà aa yée bòórú, nɛ́b zùúm Israila bə̀ dákíìn yi'nàá, sínkɔ̀ bə̀ dákíìn zá'nàá. Kə̀ aakíin də, dá kuùm inkɔrə aa nɛ́b zùúm bəd bə̀ dá nwɔŋ vaksə́ gáàm oò yílú roó,

³⁵ bít mà' dá in bəraa nɛ́b zùúm bəd sèl tɛ́mú rə goòl vú'ǹ nyàm ba. Bít ám kɔ̀ ń nɛ́ŋ kéèndoá, nwukè dá n gɔ̀ŋsə́ sabm̀ tu'ǹ, kìínmbə̀ sàb ìì tù' kə̀ yɛ́rə̀ bùúd kíni.»

Anna tə́ Vɛnɛ́b mɔ̀'ǹ Yéésù bòórú

³⁶ Sɛŋ də bərə, nɛ́ŋ kéèndo nə́ŋ̀ núùbə̀ wərə̀ kɔ̀. Nə́gə́l oò Anna, Fanuel wàà kéèndoá, Aser kuná. Zèd oò ká'ì gbàákù. Kùm kə̀ váàn oò tə́ zèd nə́ŋsínà, sɔ̀d sɛŋ aa pà'ù bèlzá rú roó.

³⁷ Bòórú gə́, kùm val kéèná. Bə́ŋyée gə́, zèd oò laa naara zè naara. Nɛ́ŋ kéèndo aarə, dàà láŋsə́ wúl gá, bít dìì Vɛnɛ́b tù' ma'ǹmbə̀ tígə́lú kə̀ nyàámbərə̀ tá, kə̀ in bəd gídǹmbìá, bít kə̀ Vɛnɛ́b nyɛɛ̀mbìá.

³⁸ Yaà wə́ə́ sɛŋ də bə ní, bít pìì Vɛnɛ́b mɔ̀'ǹmbìá. Nɛ́b aa ìì tə́ nwáàn Vɛnɛ́b oò súú Urusalima búúrú rə kóólé, dìì bə̀ nwɔŋ aarə baànmbə̀ wàà aarə yílú.

Bə̀ tóò bídǹnà Nazaratu bìlú

³⁹ Yusufu kə̀ Mariyama tá, mà' ìì bɛ́'à in bəraa Báátììkpɛ̀ŋ indaŋ̀mbə̀ bàà boò mà' roó, bít kid bə̀ bírà kíìn kə̀ Yéésù tá, Galili yɛ́b ba, boò bìlú, Nazaratu.

⁴⁰ Wàà kàŋ bít və̀' kúnú. Nyìì kə̀ nwɔŋ gabm̀bìá, bít pə̀dkè Vɛnɛ́b bə̀ kùm kə̀ oò tá.

Yéésù ɛ̀m láŋsə́ wúuú, sɛŋ aa tə́ kə̀ zèd kób zè iirə roó

⁴¹ Zèd taàì nə́ŋ̀ gə́ kóólé, Yéésù bóò kə̀ nuù tá, ìì ɛ̀m Urusalima bìlú, Paska dáàn ma'ǹmbìá.

⁴² Yéésù mà' zèd kób zè iirə gə́, zá' ɛ̀m wálke rú, kə̀ báá oò tá, bít kə̀ nà'á oò tá, kìínmbə̀ ìì lɛɛ̀m də kíni.

⁴³ Zɔ̀ŋ aa wálke bɛ́rà gə́, ìì bírà bəd kúnú. Zá wàà boò Yéésù gə́, kùmà Urusalima bìlú wərə̀ ní, bít bóò kə̀ nuù tá, ìì gàb sé.

⁴⁴ Sèl ìì bàà nyà'aa Yéésù tə́ kə̀ nɛ́b aa ìì ɛ̀mà sɛ̀ɛ́n kpaŋ̀ kə̀ boò tə́ rə tá. Ìì ɛ̀m nyàm nə́ŋ̀ pálág, bít ìì pììù saànmbə̀ kun boò bəd tə́ŋú, kə̀ nɛ́b gabm̀ bəd tə́ŋú.

⁴⁵ Zá sàà ìì bɔ̀bə̀ sé. Kàanyée gə́, kid ìì bíd Urusalima bìlú, oò bə̀ dáàn saànmbìá.

⁴⁶ Sɛŋ toorə bə gə́, dá ìì bɔ̀bə̀ láŋsə́ wúu. Yéésù kùm nɛ̀n indaŋ̀mbə̀ bəd tə́ŋú, tə́ bə̀ kíìn zɛŋàá, bít tə́ bə̀ nwɔŋ bəd dɛràá.

⁴⁷ Nɛ́b aa zɛ̀ŋ̀ rə kóólé, ingabké oò kə̀ nwɔŋ bəraa kè' í' bə̀ rə tə́ kóólé, kò' bə̀ yíl yàá.

⁴⁸ Zɔ̀ŋ aa báá oò kə̀ nà'á oò tá, ìì bé'ù kàangə́, kò' bə̀ yílì gbàákù, bít nuù bàà: «Wàà mə́ra, kə̀ níìbə̀ ń mà' bə́ taà kàan gú? Ǹ ɛ̀ga, báá ḿ kə̀ máá tá, bə́ saàn kə̀ tɛ́m lɔbkè gbà'á.»

⁴⁹ Yéésù kè' í' bə̀, bàà: «Kə̀ níìbə̀ íí sàà mə́ taà gú? Aí gə́, gabm̀bə̀ má kuùm Báá mə́ wúu rə, íí gàb sínì?»

⁵⁰ Zá boò gə́, kìì ìì gàb nwɔŋ wàà aa bàà rú wərə̀ rə sé.

⁵¹ Kàanyée gə́, Yéésù kidbíd kíìn kə̀ boò tá, Nazaratu bìlú. Ləə bə̀ kúnú. Nà'á oò kò' in bəraa kóólé oò tɛ́m ba.

⁵² Bít Yéésù kàŋ bùùd tə́ dáàn númú kə̀ ingabké oò tá. Nɛ́b bəd í'ù kúnú, bít oò kɔ̀ sɔ̀ɔ̀n Vɛnɛ́b kúnú.