Tito 3 - Tachi Akꞌõre Pedee Chonaarãwedapema

Sãga Cristode ijãapataarã ijãadakꞌaarã awara pꞌanapataadaipia bɨ

¹ Kꞌirãpapíji jãpema ijãapataarãmaa ãra ichiaba pꞌanapata Creta isladepema poro waibɨarã jua ekꞌari. Maperã oodaipia bɨ mãgɨ́ poroorãpa oopi pꞌanɨkꞌa. Ichita oo kꞌinia pꞌanadaipia bɨ ne–inaa pia awaraarã kꞌaripadaitꞌee.

² Jaráji chĩara ãpɨte kꞌachia pedeenaadamerã mãikꞌaapa aupedeenaadamerã awaraarã ome. Ma kꞌãyaara tꞌãri pia pꞌanadaipia bɨ mãikꞌaapa pedee pia pedeedaipia bɨ jõmaarã ome. ¡Mamĩda, audua pꞌanadaikꞌaraa bɨ!

³ Naaweda tachia Cristo kꞌawada–e pꞌanadakꞌãri, kꞌachia pꞌanapachida. Oodaamaa pꞌanapachida Tachi Akꞌõrepa jara pëidakꞌa. Atua pꞌanajida, seewa jara pꞌanɨpa tachi itu kꞌũra pꞌanadapꞌedaa perã. Esclavoorãkꞌa pꞌanapachida, tachia oo kꞌiniata ne–inaa kꞌachia kꞌĩra tꞌãdoo oo nipapatapꞌedaa perã. Tꞌãri kꞌachia–idaa pꞌanapachida. Awaraarã unuamaa iru pꞌanapachida, ne–inaa iru pꞌanadapꞌedaa kꞌaurepa. Chikꞌĩra unuamaa pꞌanapachida.

⁴ Mãgá pꞌanapachida mĩda, Tachi Akꞌõre, Tachi Kꞌaripaparipa ichi warra tachimaa pëiji, tachi chupɨria kꞌawaada perã. Peepiji tachi pꞌekꞌau kꞌachia wẽe pꞌaneedamerã. Mãgá kꞌawaapiji ichia tachi kꞌinia iru bɨ.

⁵ Ichiata tachi o kꞌachiadeepa kꞌaripa ataji atuanaadamerã. Mãga oo–e paji tachia ne–inaa tꞌãri pia oopata perã. ¡Mãga–e! Tachi kꞌaripaji tachi chupɨria kꞌawaada perã. Tachia pꞌekꞌau kꞌachia oopatapꞌedaa wẽpapiji mãikꞌaapa ichi Jaure ba chepiji tachi kꞌapꞌɨade. Tachi piu pɨkꞌa pꞌanajida mĩda pꞌekꞌau kꞌachia kꞌaurepa, irua waya chokꞌai pꞌanapiji ichi Jaurepa. Mãga oopꞌeda, tachi pꞌaneepachida warra chai ewaa tꞌodakꞌa mãikꞌaapa paniade kꞌuipidakꞌa.

⁶ Tachi Akꞌõrepa ichi Jaure ba chepikꞌãri tachimaa, pania waibɨa pɨkꞌa weeji tachi kꞌapꞌɨa ɨ̃rɨ. Mãga ooji Jesucristopa tachi o kꞌachiadeepa kꞌaripa atakꞌãri.

⁷ Ɨ̃rá Tachi Akꞌõrepa jarai: “Mɨ Warra piuda kꞌaurepa parã pꞌekꞌau kꞌachia wẽe pꞌanɨ mɨ kꞌĩrapite.” Tachi Akꞌõrepa mãga ooji tꞌãri pia bapari perã. Tachia ne–inaa pia pꞌoyaa oodakꞌaa irua tachi chupɨria kꞌawaamerã. Ma awara eperã piuda netꞌaa ome beerukꞌa, mãga pɨkꞌa tachi, Tachi Akꞌõre warrarã pꞌaneeruta Cristo kꞌaurepa. Mapa kꞌawapata piudakꞌãri, wãara ɨtꞌaa wãdaitꞌee.

Titomaa ũraada

⁸ Mɨa etꞌewa pꞌãda wãarapɨ. Maperã mãgɨ́ ũraa ipꞌii jarateeipia bɨ ijãapataarãmaa, mãga ũridakꞌãri, ne–inaa pia kꞌĩra tꞌãdoo oo pꞌanadamerã. Mãga oodakꞌãri, eperãarã jõmaweda kꞌaripadaitꞌee, Tachi Akꞌõrepa kꞌinia bɨkꞌa.

⁹ Mamĩda Tito, pariatua aupedeeyaa baikꞌaraa bɨ audua beerã ome ãchi chonaarãwedapema ëreerã kꞌapꞌɨa. Ichiaba tꞌĩukꞌaraa bɨ nepɨra jɨrɨ pꞌanɨɨrã ome, ãchi aupedeeyaa pꞌanadakꞌãri Moisepa pꞌãda jara kꞌinia bɨ kꞌapꞌɨa. Kꞌĩrakꞌaupai tꞌĩu mãgee ijaraapataarã ome. Mãgee ne–inaa ooruta pɨrã, maarepida kꞌaripada–e.

¹⁰ Eperãpa ijãapataarãmaa kꞌĩraupikꞌãri, tachi ijãapataarã awara–awaraadaipata. Mãgee eperã parã tꞌãide paraa pɨrã, kꞌĩra jĩpꞌa ũráaji mãgɨ́ kꞌachia oo amaamerã. Ũri kꞌinia–e bɨ pɨrã, waya ũráaji. Mãga ũraapꞌeda, atꞌãri ũriamaa bɨ pɨrã, ijãapataarã tꞌãide waa tꞌĩupináatɨ.

¹¹ Mãgee eperãarã ne–inaa kꞌachia oomaa pꞌanɨ, ijãa amaadaruta perã Tachi Akꞌõrepa wãarata jara pëida. Jõmaarãpa kꞌawapata ãchi kꞌachia uchiadaitꞌee Akꞌõre kꞌĩrapite, ũridaamaa pꞌanapata perã.

Pablopa na kꞌartꞌade tꞌẽepai pꞌãda

¹² Tito, mɨa Artemas maa–e pɨrã Tíquico pɨmaa pëiitꞌee. Jãma panakꞌãri, pꞌoyaa bɨ pɨrã, isapai wã́ji Nicópolis pꞌuurudee mɨ kꞌĩrachuude. Mɨ jãma banaitꞌee pꞌusa tꞌojara bɨ misa.

¹³ Abogado tꞌɨ̃jarapata Zenas, Apolo ome jãmãikꞌaapa uchiadakꞌãri, kꞌaripáji nejõmaade pia wãdamerã ãchi ode.

¹⁴ Mãgá tachi ɨ̃pemaarã jãma pꞌanɨɨrãpa ipꞌii pia oodaipia bɨ awaraarã kꞌaripadaitꞌee mãikꞌaapa chupɨria chedeerã kꞌaripadaitꞌee chikꞌo, pꞌaru iru pꞌanadamerã. Mãga oodaipia bɨ pariatua pꞌanapataadai kꞌãyaara, apida kꞌaripada–ee.

Pablopa awaraarã ome salude pëida

¹⁵ Jõmaweda ijãapataarã nama mɨ ome pꞌanɨɨrãpa pɨmaa salude pëiruta. Taipa ichiaba salude tee pëiruta tai kꞌõpꞌãyoorã Cristo kꞌaurepa kꞌiniarãmaa. Mɨa ɨtꞌaa iidi bɨ Akꞌõremaa irua parã jõma pia akꞌɨ bapariimerã. Mãgapai paji.