Proverbios 1 - Tachi Akꞌõre Pedee Chonaarãwedapema

Chonaarãwedapema ũraa pia proverbios apata

¹ Na ũraa pꞌãdapꞌedaa Salomonpa jarada. Iru Israeldepema rey David warra paji.

² Irua na ũraa jaraji eperãarãpa na pedee ũridapꞌeda, kꞌĩsia kꞌawaa pꞌaneedamerã; ne–inaa pia oo kꞌawaa pꞌaneedamerã; na pedee jara kꞌinia bɨ pia kꞌawaadamerã;

³ kꞌawaadamerã kꞌãare ne–inaa pia bɨ, kꞌãare ne–inaa kꞌachia bɨ; kꞌĩra jĩpꞌa nipapataadamerã Tachi Akꞌõrepa kꞌinia bɨkꞌa;

⁴ kꞌũtrãarã kꞌĩsia atua beerã kꞌĩsia kꞌawaa pꞌaneedamerã mãikꞌaapa awaraarãmaa kꞌũrapinaadamerã.

⁵ Eperã kꞌĩsia kꞌawaa bɨpa na ũraa ũrikꞌãri, kꞌĩsia kꞌawaara bapariitꞌee mãikꞌaapa eperã poro wẽsaa bɨpa na ũraa ũrikꞌãri, ne–inaa pia oo kꞌawaa wãitꞌee.

⁶ Ma awara ãrapa kꞌĩsia kꞌawaa beerã pedee kꞌawaadaitꞌee kꞌãata jara kꞌinia bɨ, ma pedee adivinanzakꞌa bɨ mĩda.

⁷ Eperã kꞌĩsia kꞌawaa ba kꞌinia bɨ pɨrã, naapɨara Tachi Akꞌõre waaweeipia bɨ. Kꞌĩsia kꞌawa–ee beerãpa ũridaamaa pꞌanapata kꞌĩsia kꞌawaa beerãpa jarateepata mãikꞌaapa oodaamaa pꞌanapata ãrapa ũraa pꞌanɨkꞌa.

Ũraa kꞌũtrãarã–itꞌee

⁸ Warra, ichita kꞌirãpáji pɨchi akꞌõrepa ũraa bɨ mãikꞌaapa pɨchi nawepa jaratee bɨkꞌa oo–eda anáaji.

⁹ Pɨ–itꞌee ãra ũraa poro jɨ̃ra pi–ia baparikꞌa baitꞌee mãikꞌaapa otaude collar nẽedee ooda pi–ia jɨ̃patakꞌa baitꞌee.

¹⁰ Warra, pꞌekꞌau kꞌachia oopataarãpa pɨ kꞌũra kꞌinia pꞌanɨ pɨrã, ¡pɨchi kꞌũrapináaji!

¹¹ Ãrapa pɨmaa nãga jaradai: “Tai ome chéji otꞌa nɨdaitꞌee perã eperã ne–inaa kꞌachia oo–e bɨ peedaitꞌee.

¹² Ma eperã jãɨradee pëidáma iru kꞌapꞌɨa pia, maarepida kꞌayaa wẽe bɨ mĩda.

¹³ Mãgá iru netꞌaa pia jõmaata iru pꞌanadai. ¡Tachi Akꞌõre te ipurutꞌaadai netꞌaa chɨadapꞌedaapa!

¹⁴ Tai ome chéji poro pia bapariimerã. Mãgá madepema netꞌaa tachi chaachaa atadaitꞌeeda” adai.

¹⁵ Mamĩda warra, ¡ãra ome wãnáaji! ¡Ma kꞌãyaara ãra o kꞌachiadeepa ãyaa wã́ji

¹⁶ mãgeerãpa ne–inaa kꞌachia oo kꞌinia pꞌanapata perã mãikꞌaapa waa batꞌa kꞌinia pꞌanapata perã!

¹⁷ Pari eperãarãpa tꞌɨrɨ taawa baijira bɨpata aɨde ipanaarã baaidamerã, ipanaarãpa ma tꞌɨrɨ unu ataruta pɨrã, aɨde baaida–e paitꞌee perã.

¹⁸ Mãga pɨkꞌa mãgeerãpa otꞌa nɨpata mĩda eperã ãchi juade baaimerã, maarepida baai–e paitꞌee ma eperãpa ãra unuruta pɨrã. Ma kꞌãyaara ãchi itu baaidaitꞌee ãchia ne–inaa kꞌachia oodaitꞌee kꞌĩsia iru pꞌanadapꞌedaade.

¹⁹ Mãga pꞌasapari netꞌaa audú ata kꞌinia pꞌanapataarã ome. Ma netꞌaa ata kꞌinia pꞌanɨ kꞌaurepa, mãgá piupata.

Kꞌĩsia kꞌawa–ee baikꞌaraa bɨ

²⁰ Eperãpa calle jãde biaparikꞌa, mãga pɨkꞌa kꞌĩsia kꞌawaa pedeepa biapari. Plaza jãde golpe pedeepari.

²¹ Calle jã ikꞌaawa eperãarã chipꞌepatamãi biapari. Pꞌuuru tꞌĩupatamãi nãga jarapari:

²² “Kꞌũtrãarã, kꞌĩsia atua beerã, ¿parãpa ne–inaa chiwidi kꞌawadaamaa pꞌanapata–ekꞌã? Chĩara ooyaa beerã, ¿parã chĩara ooi awaa pꞌanapata–ekꞌã? Kꞌĩsia kꞌawa–ee beerã, ¿parã ne–inaa kꞌawa kꞌiniada–e pꞌanapata–ekꞌã?

²³ Ũrítɨ mɨ, kꞌĩsia kꞌawaa pedeepa ũraa bɨ. Mãgá mɨa parãmaa mɨ kꞌĩsia kꞌawaapiitꞌee.

²⁴ Mɨa parãmaa ũraakꞌãri, mɨ pedee ũri kꞌiniada–e paji. Mɨa parã kꞌaripaitꞌee pakꞌãri, apidaapa mɨa jara bɨ ũridakꞌaa paji.

²⁵ Mɨ ũraa ũridai kꞌãyaara, parãpa ũridaamaa pꞌanajida mãikꞌaapa mɨa jara bɨkꞌa oodaamaa pꞌanajida.

²⁶ Maperã mɨ ëiitꞌee parã kꞌachiade baaidakꞌãri mãikꞌaapa parã oo iru baitꞌee pꞌera jõneedakꞌãri.

²⁷ Mɨa mãga ooitꞌee parã pꞌeradaidakꞌãri nãumia kꞌaurepa pꞌerapatakꞌa mãikꞌaapa nepɨrade baaidakꞌãri, pꞌerapatakꞌa, ma awara kꞌĩsia pꞌua jõnadakꞌãri wa kꞌĩsia paraa jõnadakꞌãri, pꞌerapatakꞌa.

²⁸ “Maapai parãpa mɨ tꞌɨ̃daitꞌee. Mamĩda mɨa pꞌanau–e paitꞌee. Ma ewate mɨ jɨrɨdaitꞌee. Mamĩda mɨ unuda–e paitꞌee.

²⁹ Mãga pꞌasaitꞌee parã kꞌĩsia kꞌawaa pꞌana kꞌiniadakꞌaa pada perã; Tachi Akꞌõre waawee kꞌiniadakꞌaa pada perã;

³⁰ mɨ ũraa ũri kꞌiniadakꞌaa pada perã mãikꞌaapa mɨa parã ɨtrɨakꞌãri, ũridaamaa pꞌanadapꞌedaa perã.

³¹ ¡Pãchia oopata kꞌaurepa chupɨria pꞌaneedaitꞌee mãikꞌaapa pãchi kꞌĩsia kꞌachia kꞌaurepa sẽ pꞌaneedaitꞌee!

³² Warra chakꞌeerãkꞌa kꞌĩsiapataarã piupata ãchia kꞌĩsia kꞌawaa pedee ũridaamaa pꞌanapata perã mãikꞌaapa kꞌĩsia kꞌawa–ee beerã piupata ãchi–itꞌee kꞌĩsia kꞌawaa pedee pꞌua–e bairã.

³³ Mamĩda chi mɨ pedee ũri bɨ kꞌãiwee bapariitꞌee, pꞌera–ee, ne–inaa kꞌachia pꞌasaru pɨjida.