San Mateo 1 - Tachi Akꞌõre Pedee Chonaarãwedapema

Jesucristo ëreerã tꞌɨ̃ pꞌãda

¹ Jesucristo uchiaji chonaarãwedapema Rey Daviddeepa mãikꞌaapa Abrahamdeepa. Chonaarãwedapemaarãpa iru ëreerã tꞌɨ̃ pꞌãjida ichi tꞌẽepemaarãpa kꞌawaadamerã kꞌairãdeepa uchiaji.

² Abraham Isaac akꞌõre paji. Isaac Jacob akꞌõre paji. Jacob Judá akꞌõre paji mãikꞌaapa Judá ɨ̃pemaarãde ichiaba.

³ Judá Fares mãikꞌaapa Zara akꞌõre paji. Ãchi nawe Tamar paji. Fares Hesrón akꞌõre paji. Hesrón Aram akꞌõre paji.

⁴ Aram Aminadab akꞌõre paji. Aminadab Nahasón akꞌõre paji. Nahasón Salmón akꞌõre paji.

⁵ Salmón Booz akꞌõre paji mãikꞌaapa Rahab Booz nawe paji. Booz Obed akꞌõre paji mãikꞌaapa Rut Obed nawe paji. Obed Jesé akꞌõre paji.

⁶ Jesé Rey David akꞌõre paji. Rey David Salomón akꞌõre paji mãikꞌaapa Urías wẽra pada Salomón nawe paji.

⁷ Salomón Roboam akꞌõre paji. Roboam Abías akꞌõre paji. Abías Asá akꞌõre paji.

⁸ Asá Josafat akꞌõre paji. Josafat Joram akꞌõre paji. Joram Ozías akꞌõre paji.

⁹ Ozías Jotam akꞌõre paji. Jotam Acaz akꞌõre paji. Acaz Ezequías akꞌõre paji.

¹⁰ Ezequías Manasés akꞌõre paji. Manasés Amón akꞌõre paji. Amón Josías akꞌõre paji.

¹¹ Josías Jeconías, chi ɨ̃pemaarã ome akꞌõre paji. Mãɨrã pꞌanapachida Babilónia pꞌuurudepemaarãpa Israel pidaarã pꞌoyaadapꞌeda, presokꞌa ateedakꞌãri ãchi eujãdee.

¹² Ma Babilónia pꞌuurudee wãdapꞌedaa, Jeconías Salatiel akꞌõre paji. Salatiel Zorobabel akꞌõre paji.

¹³ Zorobabel Abihud akꞌõre paji. Abihud Eliaquim akꞌõre paji. Eliaquim Azor akꞌõre paji.

¹⁴ Azor Sadoc akꞌõre paji. Sadoc Aquim akꞌõre paji. Aquim Eliud akꞌõre paji.

¹⁵ Eliud Eleazar akꞌõre paji. Eleazar Matán akꞌõre paji. Matán Jacob akꞌõre paji.

¹⁶ Jacob José akꞌõre paji. José María ɨmɨkꞌĩra paji. María Jesús nawe paji. Ma Jesús ichiaba tꞌɨ̃jarapachida Cristo; jara kꞌinia bɨ Tachi Akꞌõrepa pëida eperãarã rey pamerã.

¹⁷ Abrahamdeepa uchiada catorce uchiadapꞌedaarã uchiajida Rey David parumaa. Daviddeepa ichiaba uchiada catorce uchiadapꞌedaarã uchiajida Israel pidaarã ateerutamaa Babilónia pꞌuurudee. Ichiaba madeepa uchiada catorce uchiadapꞌedaarã uchiajida Jesucristo tꞌorumaa.

Jesucristo tꞌoda

¹⁸ Jesucristo tꞌoda nãga paji. Iru nawe, María, pedeetee baji José ome miakꞌãidaitꞌee. Mamĩda araa padai naaweda, Tachi Akꞌõre Jaurepa biakꞌoopiji.

¹⁹ Josepa biakꞌoo bɨ unukꞌãri, miakꞌãi–e paitꞌee paji iru ome. Mamĩda José tꞌãri pia bada perã, María kꞌĩra nejasiapiamaapa kꞌĩupꞌee amaatꞌaaitꞌee paji, awaraarãpa kꞌawaanaadamerã.

²⁰ Mãga kꞌĩsia bɨde, kꞌãimokꞌaraaji ɨtꞌaripema ángel ome. Mãgɨpa mãgaji: —José, Rey Daviddeepa uchiada, waaweenáaji María ome miakꞌãiitꞌee, Akꞌõre Jaurepata ma warra oopida perã.

²¹ Mariapa ɨmɨkꞌĩra warra tꞌoitꞌee. Tꞌɨ̃ bɨitꞌeeda aji, Jesús, irua eperãarã kꞌaripaitꞌee perã atuanaadamerã ãchia pꞌekꞌau kꞌachia oopata kꞌaurepa.

²² Mãga paji Tachi Akꞌõrepa jarapidakꞌa chonaarãweda ichi pedee jarapari itꞌaideepa:

²³ ‘Awẽra ɨmɨkꞌĩra ome kꞌãi–ee bɨta biakꞌooitꞌee mãikꞌaapa ɨmɨkꞌĩra warra tꞌoitꞌee. Iru tꞌɨ̃jaradaitꞌee Emanuel.’ (Isaías 7.14) Mãgɨ́ tꞌɨ̃ jara kꞌinia bɨ: “Tachi Akꞌõre tachi ome bapari.”

²⁴ José ɨ̃rɨmakꞌãri, ooji ma angelpa jaradakꞌa. María ataji ichi wẽra pamerã.

²⁵ Mamĩda miakꞌãida–e paji, chi warra tꞌoru misa. Tꞌokꞌãri, Josepa tꞌɨ̃ bɨji Jesús.