Hechos 1 - Tachi Akꞌõre Pedee Chonaarãwedapema

Tachi Akꞌõrepa jarada ichi Jaure pëiitꞌee

¹ Teófilo, naapɨara kꞌartꞌa pꞌãdade pɨmaa mɨa pꞌãji Jesupa ne–inaa ooda mãikꞌaapa jarateeda ɨtꞌaa wãrumaa.

² Wãi naaweda, Akꞌõre Jaure kꞌapꞌɨa pari jaraji ichia jɨrɨtꞌeradaarãmaa kꞌãata oopataadaitꞌee.

³ Piuda tꞌẽepai chi kꞌõpꞌãyoorãmaa cheji mãikꞌaapa unupiji wãara ichi chokꞌai bɨ. Kꞌãima cuarenta wãyaaru misa, ichi kꞌapꞌɨa unupipachi mãikꞌaapa jarateepachi Tachi Akꞌõrepa oopi kꞌinia bɨ ichide ijãapataarãmaa.

⁴ Ewari aba chi kꞌõpꞌãyoorã ome bakꞌãri, mãgaji: —Wãnaadapáde aji, Jerusalendeepa awara ãyaa. Nɨdapáde aji, mɨ Akꞌõrepa jarada oorumaa, mɨa parãmaa jaradakꞌa ooitꞌee perã.

⁵ Juan Bautistapa poro choopachi paniapa. Mamĩda taarã–e Tachi Akꞌõrepa ichi Jaure ba chepiitꞌee parã kꞌapꞌɨade.

Jesús ɨtꞌaa wãda

⁶ Ma tꞌẽepai Olivo Eede pꞌanadakꞌãri, Jesús kꞌõpꞌãyoorãpa iidijida: —Tachi Waibɨa, ¿ɨ̃raweda Israel pidaarã pꞌuuru waibɨa papiitꞌeekꞌã ajida, aɨ naawedapemakꞌa, chĩara jua ekꞌari pꞌanada–ee?

⁷ Irua pꞌanauji: —Parãpa kꞌawadaikꞌaraa bɨda aji, sãapai Tachi Akꞌõrepa ne–inaa ooitꞌee, parã–itꞌee–e perã. Irua aupaita mãgee netꞌaa kꞌawa bɨ.

⁸ Mamĩda Tachi Akꞌõre Jaure parã ome ba chekꞌãri, ichia kꞌaripaitꞌee nejõmaata oodamerã Akꞌõrepa oopi kꞌinia bɨkꞌa. Kꞌawapiitꞌeeda aji, jõmaweda mɨa ooda eperãarã kꞌaripaitꞌee, parãpa jarateenadamerã Jerusalén pꞌuurude, Judea eujãde, Samaria eujãde, awaraa eujã tꞌɨmɨ́ beede paara.

⁹ Mãga jarapꞌeda, Tachi Akꞌõrepa iru ɨtꞌaa ateeji. Ãchia akꞌɨ jõnɨde jɨ̃ararade tꞌĩudachi mãikꞌaapa waa unuda–e paji.

¹⁰ Mãgá ɨtꞌaa akꞌɨ jõnɨ misa, angeleerã omé ãchi ikꞌaawa bainɨ̃ pꞌana chejida. Pꞌaru tꞌo–tꞌoo jɨ̃ pꞌanajida.

¹¹ Mãɨrãpa mãgajida: —Galilea pidaarã, ¿sãapꞌeda ɨtꞌaa akꞌɨ jõnɨma? ajida. Jãgɨ́ Jesús parã ome bada mãikꞌaapa ɨtꞌaa wãda waya cheitꞌeeda ajida, parãpa iru ɨtꞌaa wãru unudapꞌedaakꞌa.

Matías jɨrɨtꞌeradapꞌedaa Judas Iscariote pari

¹² Maapꞌeda Olivo Eedeepa Jesús ome nipapatapꞌedaarã waya chejida Jerusalendee. Ɨ̃ipata ewate paji mãikꞌaapa ãchi ũraade jara bɨ ma ewate tꞌɨmɨ́ wãdaikꞌaraa bɨ. Mamĩda tꞌɨmɨa–e bada perã, chejida.

¹³ Pꞌuurude panadakꞌãri, wãjida ãchi pꞌanapatapꞌedaamaa ɨtꞌɨpema pisode. Ma chedapꞌedaarã paji Pedro, Juan, Santiago, Andrés, Felipe, Tomás, Bartolomé, Mateo, Alfeo warra Santiago, Simón Celote apatapꞌedaa mãikꞌaapa Santiago warra Judas.

¹⁴ Mama ãchi ɨtꞌaa tꞌɨ̃pachida Jesús ɨ̃pemaarã ome mãikꞌaapa Jesús nawe María ome, ichiaba awaraa wẽraarã ome.

¹⁵ Ewari aba Jesucristode ijãapataarã ciento veinte see nɨ̃bɨde Pedro bainɨ̃ beeji mãikꞌaapa mãgaji:

¹⁶ —Ɨ̃pemaarã Cristo kꞌaurepa, chonaarãweda Akꞌõre Jaurepa jarajida aji, Rey David itꞌaideepa eperã abaapa Jesús peepiitꞌee. Mãga jara bɨ Tachi Akꞌõre Ũraa pꞌãdade. Ɨ̃rá Davidpa jaradakꞌa uchiaji Judas ome.

¹⁷ Judas tachi kꞌõpꞌãyo paji mãikꞌaapa tachi ome aukꞌa mimiapachi.

¹⁸ Mamĩda kꞌachia ooda pari pꞌaratꞌa pꞌaadapꞌedaapa irua eujã neto ataji. Mama iru baaidachi mãikꞌaapa chi jɨ̃si chedachi.

¹⁹ Jerusalende pꞌanapatapꞌedaarãpa iru piuda kꞌawaadakꞌãri, ma eujã tꞌɨ̃ bɨjida Hacéldama, ãchi pedeede jara kꞌinia bɨ “Waa Eujã”.

²⁰ Mãga pꞌasada perã Judas ome, awaraa jɨrɨdaipia bɨ iru mimia oomerã. Mãga oodaipia bɨ Tachi Akꞌõre Ũraa pꞌãdadepema Salmode jara bairã: ‘Pɨ tede apida pꞌanada–e. Mapa ichita te tuma baitꞌee.’ (Salmos 69.25) mãikꞌaapa awara ãi ichiaba jara bairã: ‘Awaraapa pɨ mimia ataitꞌee.’ (Salmos 109.8)

²¹ ʼNama pꞌanɨda aji, eperãarã tachi ome nipapatapꞌedaarã, Jesús tachi ome niparu weda.

²² Juan Bautistapa iru poro choodakꞌãriipa ɨtꞌaa wãrumaa mãgá nipapachida. Judas pari ãchidepema jɨrɨdaipia bɨ aba tachi ome aukꞌa Jesús unuda chokꞌai pꞌirabaipꞌeda.

²³ Mãpai madepema omé jɨrɨjida aba jɨrɨtꞌeradaitꞌee. Aba paji José. Mãgɨ́ ichiaba tꞌɨ̃jarapachida Barsabás, maa–e pɨrã Justo. Chi apema tꞌɨ̃jarapachida Matías.

²⁴ Ma omé jɨrɨdapꞌeda, ɨtꞌaa tꞌɨ̃jida: —Tachi Waibɨa, pɨa jõmaarã tꞌãri kꞌawa bɨda ajida. Maperã kꞌawapíji na omeedepema kꞌaita pɨa kꞌinia bɨ.

²⁵ Mãgɨpa pɨ ũraa jarateenaitꞌeeda aji, Judas pari, irua kꞌachia ooda kꞌaurepa ichi wãitꞌee padamaa wãda perã.

²⁶ Mãga ɨtꞌaa tꞌɨ̃dapꞌeda, suerte jemenejida jɨrɨtꞌeradaitꞌee. Mãpai Matiata uchiaji. Ma ewate weda apemaarã once Cristopa jɨrɨtꞌeradaarã ome mimiamaa beeji.