Génesis 1 - Tachi Akꞌõre Pedee Chonaarãwedapema

Tachi Akꞌõrepa na pꞌekꞌau eujã mãikꞌaapa pajã ooda

¹ Naapɨara Tachi Akꞌõrepa pajã mãikꞌaapa eujã ookꞌãri,

² jõma pꞌãriu baji. Pania aupai ũu baji. Waa ne–inaa wẽ–e paji. Iru Jaure pania ɨ̃rɨ nipapachi. Tachi Akꞌõrepa na pꞌekꞌau eujã mãikꞌaapa pajã nãgá ooji.

³ Tachi Akꞌõrepa jaraji: —Ɨ̃daapáde aji. Mãpai ɨ̃daaji.

⁴ Ɨ̃daakꞌãri, Tachi Akꞌõrepa mãgaji: —Pia bɨda aji. Mãpai ma ɨ̃daa pꞌãriudeepa awara bɨji.

⁵ Ma ɨ̃daa tꞌɨ̃ bɨji ewari mãikꞌaapa pꞌãriu tꞌɨ̃ bɨji pꞌãrikꞌua. Mãgá ooji ewari, pꞌãriu ome, kꞌãima abaade.

⁶ Mãpai Tachi Akꞌõrepa jaraji: —Pania ũkꞌuru ɨtꞌaa wãpáde aji.

⁷ Mãga paji. Tachi Akꞌõrepa ewaraa kꞌobɨji pania ũkꞌuru aɨ edaikꞌa eere beemerã; ũkꞌuru aɨ ɨtꞌaikꞌa eere beemerã.

⁸ Ma ewaraa kꞌobɨmaa tꞌɨ̃ bɨji pajã. Ma jõma kꞌãima omeede ooji.

⁹ Mãpai Tachi Akꞌõrepa jaraji: —Pania pajã ekꞌari bɨ ãyaa beepáde aji, eujã uchiamerã. Mãga paji.

¹⁰ Chi pꞌoo bɨmaa tꞌɨ̃ bɨji eujã; paniamaa tꞌɨ̃ bɨji pꞌusa. Tachi Akꞌõrepa ichia ooda pia unuji.

¹¹ Mãpai irua jaraji eujãde ne–inaa kꞌarra kꞌĩra tꞌãdoo tꞌonomerã; pꞌũajara kꞌĩra tꞌãdoo chi tau tꞌonomerã mãikꞌaapa pakꞌuru kꞌĩra tꞌãdoode nejõ chaumerã. Irua jaradakꞌa mãga paji.

¹² Eujãde uchiaji ne–inaa kꞌarra kꞌĩra tꞌãdoo, pꞌũajara chi tau tꞌonopari mãikꞌaapa pakꞌuru nejõ chaupari. Ma jõma oopꞌeda, Tachi Akꞌõrepa mãgaji: —Pia bɨda aji.

¹³ Ma jõma kꞌãima õpeede ooji.

¹⁴ Mãpai Tachi Akꞌõrepa jaraji: —Pajãde paraapáde aji, ne–inaa ɨ̃daapari ma kꞌaurepa eperãarãpa kꞌawadamerã ãstaawa, pꞌãrikꞌua, año, atane mãikꞌaapa fiesta ewari.

¹⁵ Ma pajãde ne–inaa ɨ̃daapari kꞌaurepa na eujã ɨ̃daa bapari. Mãga paji.

¹⁶ Tachi Akꞌõrepa ne–inaa omé ooji pajãde bɨitꞌee. Chi waibɨara bɨ ooji ãstaawa ɨ̃daamerã. Jõdee chi ma–ãriara bɨ ooji pꞌãrikꞌua ɨ̃daamerã. Ichiaba ooji lucero pꞌãrikꞌua ɨ̃daadamerã.

¹⁷ Tachi Akꞌõrepa ma ne–inaa ɨ̃daapari bɨji pajãde eujã ɨ̃rɨ ɨ̃daamerã

¹⁸ mãikꞌaapa ãstaawa, pꞌãriu ome awara beemerã. Mapa ãstaawa akꞌõrejĩru jẽrapari mãikꞌaapa pꞌãrikꞌua atane ɨ̃daapari. Mãga oo aupakꞌãri, mãgaji: —Pia bɨda aji.

¹⁹ Ma jõma kꞌãima kꞌĩmariide ooji.

²⁰ Mãpai Tachi Akꞌõrepa jaraji: —Toida paraapáde aji, chikꞌo kꞌĩra tꞌãdoo. Ichiaba jaraji: —Paraapáde aji, ipanaarã eujã ɨ̃rɨ wãabaidamerã. Mãpai paraaji.

²¹ Tachi Akꞌõrepa pꞌusadepema ne–inaa jõmaweda chokꞌai bee ooji, nemĩsia paara. Ichiaba ooji toidapema ne–inaa jõmaweda chokꞌai bee mãikꞌaapa ne–inaa jõmaweda chokꞌai bee eujã ɨ̃rɨ wãabaipata.

²² Ichia ooda pia beekꞌãri, Tachi Akꞌõrepa na pedee pia jaraji ma toidapema ne–inaa chokꞌai beerãmaa: —Warrarã chokꞌara oodapáde aji. Aukꞌa jaraji ipanaarãmaa: —Ipana chakꞌeerã chokꞌara oodapáde aji.

²³ Ma jõma kꞌãima joisomaade ooji.

²⁴ Mãpai Tachi Akꞌõrepa jaraji: —Eujãde paraapáde aji, ne–animalaarã kꞌĩra tꞌãdoo; taunomaa, tausaaree mãikꞌaapa eujãde bipa urtꞌĩu nĩuteepata paara. Mãga paji.

²⁵ Tachi Akꞌõrepa ma ne–animalaarã ooji mãikꞌaapa ichia ooda pia akꞌɨji.

²⁶ Mãpai Tachi Akꞌõrepa mãgaji: —Ɨ̃rá oodáma aji, eperã tachikꞌa bamerã. Eperãarãpa ãchi jua ekꞌari iru pꞌanadaitꞌee nãgee ne–animalaarã kꞌĩra tꞌãdoo: chikꞌo; ipanaarã; ne–animalaarã taunomaa, tausaaree bee paara; ne–animalaarã eujãde bipa urtꞌĩu nĩuteepata.

²⁷ Tachi Akꞌõrepa eperã ichikꞌa ooji; ɨmɨkꞌĩra, wẽra ome.

²⁸ Tachi Akꞌõrepa ma eperãarã pia akꞌɨji. Mapa na pedee pia jaraji: —Warrarã chokꞌara oodapáde aji, mãikꞌaapa parã jua ekꞌari iru pꞌanadapáde aji, na eujã, chikꞌo, ipanaarã mãikꞌaapa ne–animalaarã, chi bipa urtꞌĩu nĩuteepata paara.

²⁹ Tꞌẽepai mãgaji: —Parã–itꞌee oojida aji, ne–inaa kꞌarra kꞌĩra tꞌãdoo, chi tau tꞌonopari ome, mãikꞌaapa pakꞌuru chi nejõ chaupari ome. Ma jõmaadepema ne–inaa chauru parãpa kꞌodaitꞌeeda aji.

³⁰ Ma awara ne–animalaarã, chi tausaaree beerãpa, chi bipa urtꞌĩu nĩuteepataarãpa mãikꞌaapa ipanaarãpa paara kꞌodaitꞌeeda aji, ne–inaa kꞌiru, pꞌũajara kꞌĩra tꞌãdoo. Mãga paji.

³¹ Tachi Akꞌõrepa jõma ichia ooda akꞌɨkꞌãri, mãgaji: —Pia bɨda aji. Ma jõma kꞌãima seide ooji.