Filemón 1 - Tachi Akꞌõre Pedee Chonaarãwedapema

Salude pëida

¹ Mɨ, Pablo carcelde bɨ mɨa oopari perã Jesucristopa oopi bɨkꞌa. Mɨ tachi ɨ̃pema Cristo kꞌaurepa Timoteo ome na kꞌartꞌa pꞌã pëiruta Filemonmaa. Filemón, pɨ kꞌinia iru pꞌanɨpɨ, aukꞌa Cristode ijãapari perã mãikꞌaapa aukꞌa iru–itꞌee mimiapari perã.

² Ichiaba na kꞌartꞌa pꞌã pëiruta tachi ɨ̃pewẽra Apiamaa mãikꞌaapa tachi ɨ̃pema Arquipomaa. Ijãadakꞌaa beerãpa nepɨra jɨrɨ pꞌanɨ mĩda iru ome, taikꞌa iru choopari Cristode ijãa bairã mãikꞌaapa oomaa bairã Cristopa oopi bɨkꞌa. Ichiaba pꞌã pëiruta jõmaweda ijãapataarã pɨ tede ɨtꞌaa tꞌɨ̃ chepataarãmaa.

³ Ɨtꞌaa iidipata Tachi Akꞌõrepa mãikꞌaapa Tachi Waibɨa Jesucristopa parã pia akꞌɨ pꞌanadamerã. Mãgá kꞌãiwee pꞌanapataadaitꞌee.

Filemonpa awaraa ijãapataarã kꞌinia iru bapari

⁴ Filemón, mɨa ɨtꞌaa tꞌɨ̃kꞌãri pɨ pari, ichita gracias jarapari mɨ ɨtꞌaripema Akꞌõremaa.

⁵ Ũridoo pɨ wãara ijãapari Tachi Waibɨa Jesude mãikꞌaapa iru kꞌinia iru bapari. Ichiaba ũridoo pɨa jõma ijãapataarã kꞌinia iru bapari.

⁶ Pɨ mãgá chikꞌinia bapari perã tachi ijãapataarã ome, mɨa ɨtꞌaa iidipari Tachi Akꞌõrepa pɨmaa kꞌawapimerã ne–inaa pia jõma tachi Cristodeerãpa oodai irua kꞌaripakꞌãri.

⁷ Mɨ ɨ̃pema Cristo kꞌaurepa, mɨ o–ĩa bɨ pɨa awaraarã mãgá kꞌinia iru bapari perã. Mãga oo bɨpa pɨa mɨ tꞌãri mãikꞌaapa awaraa Cristodeerã tꞌãri o–ĩapipari.

Pablopa chupɨria iidida Filemón esclavo Onésimo pari

⁸ Pɨ mãga bapari perã, mɨa ne–inaa iidi kꞌinia bɨ pɨa mɨ–itꞌee oomerã. Pɨa nãga ooipia bɨ, ne–inaa pia bairã. Ma awara Cristopa mɨ jɨrɨtꞌerada perã, mɨa waawee–ee na iidiru oopii pɨmaa.

⁹ Mamĩda kꞌawa bairã pɨa jõma ijãapataarã kꞌinia iru bapari, mɨa pɨmaa chupɨria iidiitꞌee. Taawa pɨa ũrii mɨa iidiru, mɨ chonaa bairã mãikꞌaapa na carcelde bairã Jesucristopa oopi bɨkꞌa oopari kꞌaurepa.

¹⁰ Kꞌinia bɨ pɨa auteebaimerã eperã nama bɨ mɨ ome. Iru mɨchi warrakꞌa bɨ, mɨ kꞌaurepa iru Cristode ijãada perã mɨ nama carcelde bɨ misa. Na eperã pɨ esclavo iru bada, Onésimo.

¹¹ Mɨa kꞌawa bɨ naaweda irua pɨ kꞌaripa–e paji. Mamĩda ɨ̃rá mãga–e bɨ. Ɨ̃rá audú chokꞌekꞌee bapari mɨ ome. Mɨa kꞌawa bɨ aukꞌa baitꞌee pɨ ome.

¹² Mɨa iru pɨmaa pëiru. Iru audupai kꞌinia iru bɨ. Mapa kꞌinia bɨ pɨa iru auteebaimerã mɨ auteebaikꞌajikꞌa.

¹³ Mɨa kꞌinia bakꞌaji iru mɨ ome beemerã, mɨ nama carcelde bɨ misa, Jesupa ooda jarateeda kꞌaurepa. Mãgá irua mɨ kꞌaripakꞌaji pɨ pari.

¹⁴ Mamĩda mãga oo–e paji, pɨa jara–e pada perã iru nama baipia bɨ mɨ ome. Mɨa kꞌinia–e pɨa iru auteebaimerã mɨa mãga oopiru perã. Pɨa mɨ mãgá kꞌaripa kꞌinia bɨ pɨrã, kꞌaripaipia bɨ pɨchi kꞌĩradoopa.

¹⁵ Kꞌĩsíaji nãgɨde. Onésimo makꞌɨara taarã–e baji pɨ ikꞌaawaapa uchiada. ¿Tachi Akꞌõrepa iru mãgá wãpiji–ekꞌã aji, Cristode ijãapꞌeda, ɨ̃rá pɨ ome ichita bapariimerã?

¹⁶ Ma awara ɨ̃rá iru auteebairu pɨrã, iru pipɨara bai esclavo kꞌãyaara. Pɨ ɨ̃pema pia baitꞌee aukꞌa Cristode ijãa bairã. Mɨa iru kꞌinia iru bɨ. Mamĩda pɨa iru audupɨara kꞌinia iru baipia bɨ, iru chokꞌekꞌee bairã mãikꞌaapa iru pɨ ɨ̃pema Cristo kꞌaurepa perã.

¹⁷ Mãpai pɨa mɨ iru bɨ pɨrã pɨchi kꞌõpꞌãyo piakꞌa, Onésimo auteebáiji mɨ auteebaikꞌajikꞌa.

¹⁸ Irua pɨmaa ne–inaa kꞌachia ooji pɨrã maa–e pɨrã pɨ netꞌaa chɨaji pɨrã, jara pë́iji. Mɨa pꞌaaitꞌee.

¹⁹ Mɨ, Pablopa nãgɨ́ pꞌãru mɨchi juapa: mɨata pꞌaaitꞌee. Mamĩda mɨa pɨmaa nãga kꞌirãpapi kꞌinia bɨ. Onésimo pɨ ome tewe iru bai kꞌãyaara, pɨa tewe waibɨara iru bɨ mɨ ome, mɨ kꞌaurepa pɨa Cristode ijãada perã.

²⁰ Maperã ɨ̃pema, ɨ̃rá mɨa kꞌinia bɨ pɨa jõdee mɨ kꞌaripamerã, Tachi Waibɨapa pɨmaa oopi kꞌinia bɨkꞌa. Chupɨria kꞌawáaji mãikꞌaapa Onésimo auteebáiji. Mãgá pɨa mɨ tꞌãri o–ĩapiitꞌee.

²¹ Mɨa ijãa bɨ pɨa ooitꞌee mɨa iidi bɨkꞌa. Mapa na kꞌartꞌa pɨmaa pꞌãmaa bɨ. Wãara mɨa kꞌĩsia bɨ pɨa waapɨara ooitꞌee mɨa iidida kꞌãyaara.

²² Mãga oo bɨ misa, cuarto awara bɨ́ji mɨ–itꞌee, mɨ jãma panakꞌãri. Mɨa mãga jara bɨ ijãa bairã parã ɨtꞌaa tꞌɨ̃pata kꞌaurepa Tachi Akꞌõrepa mɨ uchiapiitꞌee na carceldeepa mãikꞌaapa waya pëiitꞌee parãmaa.

Awaraarãpa salude tee pëidapꞌedaa

²³ Tachi kꞌõpꞌãyo Epafras ichiaba nama carcelde bɨ mɨ ome, Jesucristopa oopi bɨkꞌa oopari perã. Irua pɨmaa salude tee pëiru.

²⁴ Marcos, Aristarco, Demas mãikꞌaapa Lucapa salude tee pëiruta. Ãra mɨ ome aukꞌa mimiapata Cristo–itꞌee.

²⁵ Mɨa ɨtꞌaa iidi bɨ Tachi Waibɨa Jesucristopa parã jõmaweda pia akꞌɨ bapariimerã. Mãgapai paji.