Éxodo 1 - Tachi Akꞌõre Pedee Chonaarãwedapema

Israelitaarã Egipto pidaarã juade

¹ Israelitaarã ãchi te pidaarã paara Jacob ome Egiptode pachejida. Ma israelitaarã nãgɨɨrã paji:

² Jacob warrarã Rubén, Simeón, Leví, Judá,

³ Isacar, Zabulón, Benjamín,

⁴ Dan, Neftalí, Gad mãikꞌaapa Aser.

⁵ Jacobdeepa uchiadapꞌedaarã setenta paji. Chi warra José ichideerã ome Egiptode pꞌanapachida.

⁶ José, chi ɨ̃pemaarã paara mãikꞌaapa ma generacióndepemaarã jõmaweda piujida.

⁷ Mamĩda ãradeepa uchiadapꞌedaarã chokꞌara ĩwajida. Mãgá israelitaarã Egiptode chokꞌara ĩwa wãjida.

⁸ Taarã pakꞌãri, awaraa rey beeji Egiptode. Mamĩda irua José kꞌawa–e baji. Mãgɨpa israelitaarã Egiptode chokꞌara ĩwa wãda unukꞌãri,

⁹ ichi akꞌɨpataarãmaa mãgaji: “Pɨchá akꞌɨ́tɨ, jã israelitaarã tachi kꞌãyaara chokꞌaraara pꞌanadairã, tachi pꞌoyaadai.

¹⁰ Maperã ne–inaa oodáma ãchi waa ĩwanaadamerã. Maa–e pɨrã ãchi tachi kꞌĩra unuamaa iru pꞌanapataarã eere padaridai tachi ome chõodaitꞌee mãikꞌaapa na eujãdeepa jirabododayada” aji.

¹¹ Maperã Faraonpa mãikꞌaapa poro waibɨarã ichi jua ekꞌari beerãpa israelitaarã mimiapijida. Israelitaarã awara–awaraa bɨkꞌoojida mãikꞌaapa Egipto pidaarã aba–abaa bɨji ma awara bɨdapꞌedaa chaa akꞌɨdamerã. Mimia chaaree oopipachida. Oopijida pꞌuuru omé, Pitón mãikꞌaapa Ramsés, Faraón netꞌaa aɨde ɨadaitꞌee.

¹² Mãgá Egipto pidaarãpa ãchi jua ekꞌari israelitaarã kꞌachia iru pꞌanapachida mĩda, Tachi Akꞌõre ãra ome bapachi. Mapa israelitaarã waapɨara ĩwa wãpachida. Maperã Egipto pidaarãpa ãra waawee pꞌanapachida mãikꞌaapa kꞌĩra unuamaa iru pꞌanapachida.

¹³ Maapai israelitaarã Egipto pidaarã esclavoorã paji. Egipto pidaarã jua ekꞌari chupɨria pꞌanapachida.

¹⁴ Egipto pidaarãpa ladrillo yoorodee oopipachida mãikꞌaapa oopipachida mimia chaaree kꞌĩra tꞌãdoo pꞌuurudeepa taawa. Mãgá israelitaarã kꞌachia oo iru pꞌanapachida ãchi jua ekꞌari.

¹⁵ Ma awara Egiptodepema reypa tꞌɨ̃ pëiji hebreo wẽraarã partera tꞌɨ̃jarapatapꞌedaa Sifrá Fuvá ome mãikꞌaapa ãramaa mãgaji:

¹⁶ —Parãpa hebreorã warrarã tꞌopidakꞌãri, akꞌɨ́tɨ kꞌawadaitꞌee ɨmɨkꞌĩra warra wa wẽra kꞌau. Ɨmɨkꞌĩra pɨrã, peetꞌáatɨ. Mamĩda wẽra pɨrã, ichiakꞌau bɨdapáde aji, chokꞌai beemerã.

¹⁷ Mamĩda ãrapa mãga oo kꞌiniada–e paji Tachi Akꞌõre waawee pꞌanadapꞌedaa perã. Egiptodepema reypa jaradakꞌa oodakꞌaa paji. Ɨmɨkꞌĩra warrarã chokꞌai bɨpachida.

¹⁸ Mãpai Egipto pidaarã reypa ma parteraarã waya tꞌɨ̃ pëiji mãikꞌaapa iidiji: —¿Sãapꞌeda ɨmɨkꞌĩra chakꞌeerã peeda–e pꞌanɨma? aji.

¹⁹ Ãrapa pꞌanaujida: —Hebreorã wẽraarã Egiptodepema wẽraarãkꞌa bee–e. Chaareera pꞌanɨ. Tai panadai naaweda, ãrapa warra tꞌopatada ajida.

²⁰ Mãgá israelitaarã waapɨara ĩwa wãpachida. Ma awara Tachi Akꞌõrepa ma parteraarã pia akꞌɨji,

²¹ ichi waawee pꞌanadapꞌedaa perã mãikꞌaapa israelitaarã kꞌaripadapꞌedaa perã. Mapa irua ãradeepa warrarã chokꞌara uchiapiji.

²² Ma tꞌẽepai Faraonpa jõmaarãmaa nãga jara pëiji: “Ma hebreorã warra chakꞌeerã tꞌorutaarã jõmaweda toidaa batꞌakꞌóotɨ. Mamĩda wẽra kꞌau chakꞌeerã chokꞌai atabëidapáde” aji.