Ester 9 - Tachi Akꞌõre Pedee Chonaarãwedapema

Judiorãpa ãchi kꞌĩra unuamaa iru pꞌanapatapꞌedaarã pꞌoyaadapꞌedaa

¹ Atane doce adarde ewari trece pakꞌãri, judiorã kꞌĩra unuamaa iru pꞌanapatapꞌedaarãpa kꞌĩsia iru pꞌanajida judiorã peekꞌoodaitꞌee, Amanpa ley pꞌãpidade jaradakꞌa. Mamĩda judiorãpa mãɨrã pꞌoyaajida.

² Rey Asuero jua ekꞌari pꞌanapatapꞌedaa judiorã pꞌuuru chaa awara–awaraa chipꞌedachida ãchi kꞌĩra unuamaa iru pꞌanapatapꞌedaarã ome chõodaitꞌee. Mamĩda apidaapa ãra pꞌoyaada–e paji, jõmaarãpa ãra audú waawee pꞌanadapꞌedaa perã.

³ Jõmaweda ma eujãdepemaarã poro waibɨarã rey jua ekꞌari beerãpa judiorã kꞌaripajida, Mardoqueo waawee pꞌanadapꞌedaa perã.

⁴ Mardoqueo mãgá waawee pꞌanajida iru rey palaciode eperã waibɨa pada perã. Mãgá jõmaarã kꞌãyaara waibɨara bada perã, rey jua ekꞌari eujã tꞌɨmɨ́ beede pida eperãarãpa iru tꞌo pꞌanapachida.

⁵ Ma ewate kꞌartꞌade jara badakꞌa judiorãpa ãchi kꞌĩra unuamaa iru pꞌanapatapꞌedaarã peekꞌoojida mãikꞌaapa ãchia oo kꞌiniata oojida.

⁶ Susa ciudadeladepai ãchi kꞌĩra unuamaa iru pꞌanapatapꞌedaa ɨmɨkꞌĩraarã quinientos peejida.

^7-10 Ma awara Hamedata warra Amanpa judiorã kꞌĩra unuamaa iru bada perã, Amán warrarã diez peekꞌoojida. Mãɨrã paji: Parsandata, Dalfón, Aspata, Porata, Adalías, Aridata, Parmasta, Arisay, Ariday mãikꞌaapa Vaizata. Mãɨrã mãgá peekꞌoojida mĩda, ãra netꞌaa jãrida–e paji.

¹¹ Ma ewateweda reypa kꞌawaa atakꞌãri judiorãpa ma eperãarã chokꞌara peekꞌoodapꞌedaa Susa ciudadelade,

¹² irua reina Estermaa mãgaji: —Susa ciudadelade judiorãpa ɨmɨkꞌĩraarã quinientos peekꞌoojida mãikꞌaapa Amán warrarã diez peejida. Awaraa pꞌuuru mɨ jua ekꞌari pꞌanapataarã ome ¿kꞌãata oojidapaama? Jaráji kꞌãata mɨa waa ooipia bɨ. ¡Ooitꞌeeda aji, pɨa jararukꞌa!

¹³ Mãpai Esterpa pꞌanauji: —Mɨchi Rey Waibɨa, pɨa kꞌinia bɨ pɨrã, jarapáde aji, nu Susa ciudadeladeepa taawa judiorã pꞌanapataarãmãi waya aukꞌa oodamerã idi oodapꞌedaakꞌa mãikꞌaapa Amán warrarã piudapꞌedaa kꞌapꞌɨa otau jɨ̃ nɨ̃bɨpatamãi baijira bɨdamerã.

¹⁴ Reypa jaraji mãga oodamerã. Irua jarada pꞌãdapꞌeda, Susa ciudadeladeepa taawa eperãarã chipꞌepatamãi ata bɨjida. Ichiaba jaraji Amán warrarã piudapꞌedaa kꞌapꞌɨa otau jɨ̃ nɨ̃bɨpatamãi baijira bɨdamerã.

¹⁵ Mãgá atane adarde ewari catorcede judiorã Susa ciudadeladeepa taawa pꞌanapatapꞌedaarã waya chipꞌedachida ãchi kꞌĩra unuamaa iru pꞌanapatapꞌedaarã ome chõodaitꞌee. Mãgá ɨmɨkꞌĩraarã trescientos peekꞌoojida. Mamĩda ãra netꞌaa jãri atada–e paji.

¹⁶ Aɨ noremaweda judiorã pꞌuuru awaraade rey jua ekꞌari pꞌanapatapꞌedaarã aukꞌa chipꞌedachida ãchideerã jɨ̃adaitꞌee mãikꞌaapa ãchi kꞌĩra unuamaa iru pꞌanapatapꞌedaarã ome chõodaitꞌee. Mãgá eperãarã setenta y cinco mil peekꞌoojida. Mamĩda ãra netꞌaa jãri atada–e paji.

¹⁷ Atane adarde ewari trecede ma jõma oodapꞌeda, ewari catorcede ma judiorã ɨ̃ijida mãikꞌaapa o–ĩapa nekꞌojida.

¹⁸ Jõdee Susa pꞌuurudepema judiorã ewari trecede mãikꞌaapa ewari catorcede chõodapꞌedaa perã, ewari quincede ɨ̃ijida mãikꞌaapa o–ĩapa nekꞌojida.

¹⁹ Maperã judiorã pꞌuuru kꞌaipee muralla wẽe beede pꞌanapataarãpa atꞌãri fiesta oopata atane adarde ewari catorcede, ma ewate ãchi chonaarã ɨ̃idapꞌedaa perã. Ma fiesta o–ĩa oopata mãikꞌaapa regalo jedepata.

Mardoqueopa jarada Purim fiesta oopataadamerã

²⁰ Mardoqueopa pꞌãpiji judiorãpa oodapꞌedaa mãikꞌaapa ma kꞌartꞌa tee pëiji jõmaweda judiorã rey Asuero jua ekꞌari kꞌaitꞌa pꞌanapatapꞌedaarãmaa, tꞌɨmɨ́ pꞌanapatapꞌedaarãmaa paara.

²¹ Ma pꞌãpidade Mardoqueopa jaraji año chaa atane adarde ewari catorcede mãikꞌaapa ewari quincede judiorãpa fiesta oopataadamerã mãikꞌaapa mãgá kꞌirãpadamerã ãchia ma añode oodapꞌedaa.

²² Ma fiesta oodaipia bɨda aji, kꞌirãpadamerã ãchia kꞌĩra unuamaa iru pꞌanapatapꞌedaarã pꞌoyaadapꞌedaa. Aɨ naaweda ãchi audú tꞌãri pꞌua pꞌanajida, ma atanede ãra kꞌĩra unuamaa iru pꞌanapatapꞌedaarãpa ãchi peekꞌoodai jĩakꞌaapa. Mamĩda mãɨrã pꞌoyaadakꞌãri, tꞌãri o–ĩa pꞌaneejida. Maperã Mardoqueopa jaraji ma fiesta o–ĩa oopataadamerã: chikꞌo pia kꞌodamerã mãikꞌaapa ne–inaa jedekꞌodamerã; ichiaba chupɨria beerãmaa netꞌaa teedamerã.

²³ Ma añode Mardoqueopa pꞌãpidade jara bɨkꞌa oojida. Mãgá judiorãpa año chaa ma fiesta oopachida.

²⁴ Ma fiestade judiorãpa kꞌirãpapachida ãchi kꞌĩra unuamaa iru bada Amanpa pur, pia jaraitꞌeera, suerte jemeneda ãchi peepikꞌooitꞌee.

²⁵ Mamĩda Ester rey kꞌĩrapite wãkꞌãri ãra pari chupɨria iidide, Amanpa kꞌĩsia kꞌachia iru bada ichi ɨ̃rɨ mãikꞌaapa ichideerã ɨ̃rɨ baaiji. Maperã Amán chi warrarã ome otau jɨ̃ nɨ̃bɨjida.

²⁶ Mapa ma fiesta tꞌɨ̃ bɨjida Purim. Mãgá ma fiesta oojida kꞌirãpadaitꞌee Mardoqueopa ma kꞌartꞌade jarada, ãchia unudapꞌedaa mãikꞌaapa ãchimaa pꞌasadapꞌedaa.

²⁷ Judiorã pedeeteejida año chaa ewari omeede ma fiesta oopataadaitꞌee Mardoqueopa jaradakꞌa. Mãga oopachida ãchideepa uchiadapꞌedaarãpa mãikꞌaapa awaraa eperãarã judiorã papidapꞌedaarãpa ma ewari omeede oodapꞌedaa kꞌirãpadamerã.

²⁸ Ma fiesta oopachida judiorã pꞌanapatapꞌedaa eujã chaa mãikꞌaapa pꞌuuru chaa, pꞌuurudeepa taawa pꞌanadapꞌedaarã eujãde paara. Mãga oopachida kꞌĩra atua kꞌiniada–e pꞌanadapꞌedaa perã ãchi chonaarãpa ãchi pari oodapꞌedaa.

²⁹ Ma tꞌẽepai Abijaíl kꞌau, reina Esterpa Mardoqueo ome awaraa kꞌartꞌa pꞌãjida. Ma kꞌartꞌade Esterpa ichiaba jaraji judiorãpa ma Purim fiesta oopataadamerã.

³⁰ Ma kꞌartꞌa pëijida judiorã jõmaarãmaa, ma ciento veintisiete eujã rey Asuero jua ekꞌari pꞌanapatapꞌedaarãmaa. Ma kꞌartꞌade judiorãmaa pedee pia jarajida ãchi kꞌãiwee pꞌanapataadamerã.

³¹ Jarajida ma Purim fiesta oopataadamerã ma ewari pakꞌãri, atane jaradapꞌedaade, judío Mardoqueopa jaradakꞌa mãikꞌaapa reina Esterpa jaradakꞌa. Ma fiesta bɨjidada ajida, judiorã–itꞌee mãikꞌaapa ãradeepa uchiadaitꞌeerã–itꞌee. Ma kꞌartꞌade ichiaba jarajida judiorãpa pia oojida, ma fiestade tꞌãri pꞌuapa nekꞌo–ee ɨtꞌaa tꞌɨ̃dakꞌãri kꞌirãpadaitꞌee ãchi pꞌanapatapꞌedaa reypa naaweda ley pꞌã pëida jua ekꞌari.

³² Ester Mardoqueo ome tꞌãri aukꞌa baji sãgá ma Purim fiesta oodaipia bɨ. Ma jõma pꞌã bëiji judiorãpa ne–inaa pꞌasakꞌãri, pꞌã bɨpatapꞌedaa librode.