Ester 8 - Tachi Akꞌõre Pedee Chonaarãwedapema

Reypa jarada judiorã ichi jua ekꞌari pꞌanapatapꞌedaarã kꞌaripaitꞌee

¹ Ma ewateweda rey Asueropa reina Estermaa teeji ma judiorã kꞌĩra unuamaa iru bada Amán te, chi netꞌaa ome. Ma awara Mardoqueo tꞌɨ̃ pëiji ichi kꞌĩrapite chemerã, Esterpa jarada perã Mardoqueo ichi primo.

² Mãpai reypa ichi sortija tauchaa bɨpari Amán juadeepa jãri atada, Mardoqueomaa teeji. Jõdee Esterpa Mardoqueo bɨji Amanpa netꞌaa iru bada akꞌɨpariimerã.

³ Ma tꞌẽepai Ester waya rey ome pedeeji. Bedabaidachi iru kꞌĩrapite mãikꞌaapa taubade chupɨria iidiji oonaamerã Amanpa ley pꞌãdade jaradakꞌa, mãgá judiorã kꞌĩra unuamaa iru pꞌanapatapꞌedaarãpa ãra peenaadamerã.

⁴ Mãga nɨde reypa ichi cetro nẽedee ooda Estermaa ɨaji. Mãpai Ester bainɨ̃ beeji mãikꞌaapa rey kꞌĩrapite mãgaji:

⁵ —Mɨchi Rey Waibɨa, pɨa kꞌinia bɨ pɨrã mãikꞌaapa mɨa etꞌewa jaradakꞌa ooru pɨrã, óoji mɨa jararukꞌa. Wãara mɨ kꞌinia bɨ pɨrã, kꞌartꞌade pꞌã́ji Agagdeepa uchiada Hamedata warra Amanpa kꞌartꞌade ichia pɨ jua ekꞌari eujãde pꞌanapata judiorã jõma peepikꞌooitꞌeeda adakꞌa oonaadamerã.

⁶ Mɨa, ¿sãga chooyama aji, mɨchi aukꞌaarã ma kꞌachiade baairuta pɨrã mãikꞌaapa mɨchideerã paara peekꞌooruta pɨrã?

⁷ Mãpai rey Asueropa Estermaa mãikꞌaapa ma judío Mardoqueomaa nãga pꞌanauji: —Mɨa Amán otau jɨ̃nɨ̃ bɨpiji, irua judiorã peepikꞌooitꞌee kꞌĩsia iru bada perã. Ma awara Estermaa teeji Amán te, chi netꞌaa iru bada paara.

⁸ Ɨ̃rá mɨa jara bɨ parãpa awaraa kꞌartꞌa mɨ tꞌɨ̃de pꞌãpidamerã judiorã kꞌaripaitꞌee. Ma kꞌartꞌade jarátɨ parãpa kꞌĩsia pꞌanɨkꞌa judiorã ma naaweda kꞌartꞌa pꞌã pëidapꞌedaadeepa pia uchiadamerã. Ma kꞌartꞌa selláatɨ mɨ sortija tauchaa bɨparipa. Kꞌirãpátɨ kꞌartꞌa mɨa firmaada mãikꞌaapa mɨa tauchaa bɨparipa sellaada pꞌoyaa wẽpapidakꞌaa.

⁹ Aramata rey secretariorã tꞌɨ̃ pëijida ma kꞌartꞌa pꞌãdamerã. Mãga oodakꞌãri, atane õpee sivande ewari veintitrés paji. Mardoqueopa jaradakꞌa pꞌãjida mãikꞌaapa ma kꞌartꞌa pëijida judiorãmaa; rey ekꞌari bada eujãdepemaarã poro waibɨarãmaa, mãikꞌaapa awaraa poro waibɨarãmaa, ma eujã ciento veintisietede pꞌanapatapꞌedaarãmaa, India eujãdeepa Etiopía eujãde parumaa. Ma kꞌartꞌa awaraa pedeede pꞌãjida ma eujãdepemaarãpa aɨde jara bɨ pia kꞌawaadamerã. Aukꞌa judiorã pedeede pꞌãjida, ãchi jõmaarãpa kꞌawaadamerã.

¹⁰ Mardoqueopa ma kꞌartꞌa pꞌãpipꞌeda, rey Asuero tꞌɨ̃de firmaaji mãikꞌaapa sellaaji iru sortija tauchaa bɨparipa. Maapꞌeda rey caballoorã kꞌapꞌipꞌiara pꞌirapata ɨ̃rɨ wãpataarãpa ma kꞌartꞌa eujã chaa ateejida.

¹¹ Ma kꞌartꞌade reypa jaraji judiorã ãchi pꞌanapata chaa chipꞌedaidamerã mãikꞌaapa ãchi netꞌaa jɨ̃adamerã. Jaraji awaraarã ãchi ome chõode cheruta pɨrã, chõodamerã mãɨrã ome mãikꞌaapa ma kꞌĩra unuamaa iru pꞌanapataarã peekꞌoodamerã, ãchi wẽraarã, warrarã paara. Ichiaba jaraji mãɨrã ome chõo aupadakꞌãri, mãɨrã netꞌaa ãchi–itꞌee pꞌe atadamerã.

¹² Jaraji atane doce adarde ewari trece mãga oodamerã iru jua ekꞌari bɨ eujã chaa, ma ewate awara bɨ pꞌanadapꞌedaa perã judiorã peekꞌoodaitꞌee.

¹³ Jaraji ma kꞌartꞌa pꞌãda copia atabëidamerã eujã chaa eperãarã chipꞌepatamãi, jõmaarãpa kꞌawaadamerã ma ewate judiorã chõodaitꞌee ãchi kꞌĩra unuamaa iru pꞌanapataarã ome.

¹⁴ Reypa ma kꞌartꞌa pëiji ichi caballoorã kꞌapꞌipꞌiara pꞌirapatade wãpataarã ome, isapai ichia pëidamaa panadamerã. Ma kꞌartꞌa pꞌãda copia ichiaba atabëijida eperãarã chipꞌepatamãi Susa ciudadelade.

¹⁵ Ma kꞌartꞌa pëidapꞌeda, Mardoqueo rey palaciodeepa uchiaji. Pꞌaru pi–ia pꞌãpꞌãraa, tꞌorroo ome jɨ̃ baji, reypa pꞌaru jɨ̃parikꞌa. Ichiaba jɨ̃ baji poro jɨ̃ra nẽedee ooda mãikꞌaapa ɨ̃rɨpema pꞌaru lino pꞌupꞌuchiadee ooda. Susa pꞌuurudepemaarãpa Mardoqueo mãga unudakꞌãri, o–ĩapa bia para beeji.

¹⁶ Judiorã audú o–ĩa pꞌaneejida ãchi aukꞌaarã poro waibɨa padapꞌedaa perã.

¹⁷ Reypa ma kꞌartꞌa pëida eujã chaa panadakꞌãri, judiorã ma eujãde pꞌanapatapꞌedaarã o–ĩa pꞌaneejida. Fiesta oojida mãikꞌaapa o–ĩapa nekꞌojida. Ma awara ũkꞌuru eperãarã ma eujãde pꞌanadapꞌedaarã judiorã waaweepa aukꞌa judiorãkꞌa pꞌaneejida.