Ester 7 - Tachi Akꞌõre Pedee Chonaarãwedapema

Rey Asueropa Amán peepida

¹ Mãgá Amán rey ome reina Ester temaa nekꞌode wãji.

² Ewari omeede waya vino tomaa pꞌanɨde reypa Estermaa mãgaji: —Reina Ester, pɨchia iidi kꞌiniata iidipáde aji. ¿Kꞌãata kꞌinia bɨma? Mɨ jua ekꞌari pꞌanɨdepema eujã esa–aukꞌa iidi kꞌinia bɨ pɨrã, ¡mɨa pɨmaa teeyada! aji.

³ Mãpai Esterpa pꞌanauji: —Mɨchi Rey Waibɨa, wãara pɨa mɨ pia akꞌɨ bɨ pɨrã mãikꞌaapa pɨa kꞌinia bɨ pɨrã, mɨa iidi kꞌinia bɨ pɨa mɨ, mɨchi aukꞌaarã ome piupinaamerã.

⁴ Mɨa pɨmaa mãga jara bɨ eperã abaapa mɨ, mɨchi aukꞌaarã ome netotꞌaada perã jõma peepikꞌooitꞌee. Irua tai esclavoorãkꞌa netotꞌaada paara, mɨa nãgá chupɨria iidi–e pakꞌaji. Mamĩda, Mɨchi Rey Waibɨa, mɨ, mɨchi aukꞌaarã ome kꞌiniiruta pɨrã, pɨ paara kꞌachiade baaiitꞌeeda aji.

⁵ Mãpai rey Asueropa iidiji: —¿Kꞌaima mãgɨ́? ¿Sãma bɨma aji, chi pɨmaa mãikꞌaapa pɨchi aukꞌaarãmaa mãga ooitꞌee kꞌĩsia iru bɨ?

⁶ Mãpai Esterpa pꞌanauji: —¡Nãgɨ́ eperã kꞌachia Amánpata mɨchi aukꞌaarã kꞌĩra unuamaa iru bɨ! ¡Mapa jarajida aji, tai peekꞌoodamerã! Mãga ũrikꞌãri, Amán pꞌeradachi. Rey kꞌĩrapite mãikꞌaapa reina kꞌĩrapite pꞌoyaa mimikꞌakꞌaa paji pꞌera nɨ̃bɨpa.

⁷ Mãpai rey Asuero kꞌĩraudaipꞌeda, bainɨ̃ beeji mãikꞌaapa uchiaji ma vino tomaa bada cuartodeepa taawaa ne–uu bada kꞌãide. Mamĩda Amán Ester ome beeji. Kꞌawaji reypa ichi peepiitꞌee. Mapa Estermaa chupɨria iidimaa beeji ichi kꞌaripamerã mãikꞌaapa ichi pari chupɨria iidimerã.

⁸ Rey waya tꞌĩukꞌãri ma nekꞌopatamãi, Amán ɨ̃jaabai bɨ unuji Ester jẽra bada diván ɨ̃rɨ. Mapa reypa golpe mãgaji: —¿Ɨ̃rá reina pɨ ome kꞌãi kꞌinia–e bɨde mɨ kꞌĩrapite mãikꞌaapa mɨchi tede iru ome pꞌekꞌau oo kꞌinia bɨkꞌã? aji. Reypa mãga jaramaa bɨde, ichi akꞌɨpataarãpa Amán ata chejida mãikꞌaapa chi kꞌĩra wãkꞌa atajida.

⁹ Ma eunucoorãdepema Jarbonapa mãgaji: —Amán te kꞌaitꞌa torre veintidós metros chi ɨtꞌɨa oo iru pꞌanɨda aji, ichia oopida Mardoqueo–itꞌee aɨde otau jɨ̃ nɨ̃bɨdamerã. Mardoqueópata pɨ kꞌaripaji eperãarãpa pedeeteedakꞌãri pɨ peetꞌaadaitꞌee. Mãpai rey kꞌĩrau pedeeji: —¡Mãgara made Amán otau jɨ̃nɨ̃ bɨnadapáde! aji.

¹⁰ Mãgá Amán otau jɨ̃nɨ̃ bɨnajida, ichia Mardoqueo–itꞌee torre oopidade. Mãpai waa rey kꞌĩrau–e paji.