Ester 4 - Tachi Akꞌõre Pedee Chonaarãwedapema

Judiorã tꞌãri pꞌua pꞌaneedapꞌedaa

¹ Mardoqueopa kꞌawaakꞌãri ma ley pꞌã pëidapꞌedaa, tꞌãri pꞌuapa ichi pꞌaru jẽtꞌaaji. Mãpai chi–ɨapata pꞌaru jɨ̃ beepꞌeda, itꞌabarre pꞌora bɨji ichi porode mãikꞌaapa pꞌuurude bia nipapachi.

² Mamĩda eperã chi–ɨapata pꞌaru jɨ̃ bakꞌãri, rey palaciode tꞌĩupidakꞌaa paji. Maperã Mardoqueo rey palaciode tꞌĩupatamãipai utuji.

³ Awaraa eujãde Rey Asuero jua ekꞌari pꞌanadapꞌedaa judiorãpa ma ley ũridakꞌãri, audú tꞌãri pꞌua pꞌaneejida. Nekꞌoda–ee chupɨria iidimaa pꞌaneejida. Tꞌãri pꞌuapa jẽemaa pꞌaneejida; biapachida; itꞌabarre pꞌorade jẽra pꞌaneepachida mãikꞌaapa chi–ɨapata pꞌaru jɨ̃ pꞌaneejida.

Mardoqueopa Estermaa iidida ichi aukꞌaarã kꞌaripamerã

⁴ Mãpai Ester–itꞌee mimiapataarãpa mãikꞌaapa eunucoorãpa Mardoqueopa oomaa bada Estermaa nepɨrɨnajida. Mãga ũrikꞌãri, Esterpa kꞌĩsia nɨ̃beeji mãikꞌaapa Mardoqueomaa pꞌaru tee pëiji jɨ̃merã chi–ɨapata pꞌaru jɨ̃i kꞌãyaara. Mamĩda irua ma pꞌaru jita–e paji.

⁵ Mapa Esterpa tꞌɨ̃ pëiji reypa ichi jua ekꞌari bɨda eunucoorã poro waibɨa Hatac mãikꞌaapa iru pëiji Mardoqueomaa iidinamerã sãapꞌeda chi–ɨapata pꞌaru jɨ̃ bɨ mãikꞌaapa sãapꞌeda audú kꞌĩra pia–ee nɨ̃bɨ.

⁶ Mãgá Hatac wãji Mardoqueo ome pedeede. Mardoqueo baji ciudadela edajãde rey palaciodepema puerta kꞌĩrapite.

⁷ Mãpai Mardoqueopa Hatacmaa nepɨrɨji Amanpa ooda mãikꞌaapa pꞌaratꞌa trescientos treinta mil kilos pꞌaaitꞌee bada judiorã jõmaweda peekꞌoodamerã.

⁸ Ma awara ma ley Susa pꞌuurude leedapꞌedaa copia Mardoqueopa Hatacmaa teeji irua Estermaa teenamerã. Mãgá irua pia kꞌawai jõmaweda mama pꞌasa nɨ̃bɨ. Ichiaba Estermaa jara pëiji rey ome pedeemerã mãikꞌaapa ichi aukꞌaarã pari chupɨria iidimerã.

⁹ Hatacpa Mardoqueopa jarada jõmaweda Estermaa nepɨrɨ cheji.

¹⁰ Mãpai Esterpa Hatac waya pëiji Mardoqueomaa nãga jaranamerã:

¹¹ “Na rey jua ekꞌari beerãpa mãikꞌaapa jõmaweda awaraa eujãdepemaarã iru jua ekꞌari beerãpa kꞌawa pꞌanɨ apida rey kꞌĩrapite wãikꞌaraa bɨ, reypa tꞌɨ̃ pëi–emãi. Mãga jara bɨ Persiadepema ley pꞌãdade. Ɨmɨkꞌĩra wa wẽra rey palaciode tꞌĩuru pɨrã reypa tꞌɨ̃ pëi–eeta maa–e pɨrã irua ichi cetro nẽedee oodapa tꞌĩupi–emãi, ma eperã piuitꞌee. Ewari treinta wãyaaruda aji, irua mɨ ichi kꞌĩrapite tꞌɨ̃ pëi–e bɨ.”

¹² Mardoqueopa mãga ũrikꞌãri,

¹³ Estermaa nãga jara pëiji: “Pɨ rey palaciode bapari perã, kꞌĩsianáaji judiorã peekꞌoo wãdakꞌãri, pɨ apemaarã kꞌãyaara chokꞌai uchiaitꞌee.

¹⁴ Pɨ kꞌĩupꞌee beeru pɨrã mãikꞌaapa kꞌaripa–eda aru pɨrã, awara ãiipa judiorã kꞌaripa chedaitꞌee. Mamĩda pɨ, pɨchi akꞌõre ëreerã ome kꞌiniidaitꞌee. ¿Pɨ reina–ekꞌã aji, naapai tachi aukꞌaarã kꞌaripamerã?”

¹⁵ Esterpa ma pedee ũripꞌeda, Mardoqueomaa nãga jara pëiji:

¹⁶ “Susade pꞌanapata judiorã chipꞌe atáji, mɨ pari nekꞌoda–ee ɨtꞌaa tꞌɨ̃damerã. Kꞌãima õpee wãyaaru misa, nekꞌodaikꞌaraa bɨ mãikꞌaapa ne–inaa todaikꞌaraa bɨ. Mɨa mɨchi mimiapataarã ome aukꞌa mãga ooitꞌee. Maapꞌeda mɨ wãitꞌee rey ome pedeede, leyde jara bɨ mĩda mãga oodaikꞌaraa bɨ. Mɨ peetꞌaa kꞌinia pꞌanɨ pɨrã, peetꞌaadayada” aji.

¹⁷ Mãpai Mardoqueo wãji Esterpa jara pëidakꞌa oode.