Efesios 3 - Tachi Akꞌõre Pedee Chonaarãwedapema

Tachi Akꞌõrepa Pablo jɨrɨda judio–eerãmaa jarateenamerã

¹ Maperã mɨ, Pablopa jarateepari Jesucristopa ooda, parã judio–eerã ichiaba araa pꞌanapataadamerã iru ome. Ma kꞌaurepata ɨ̃rá mɨ carcelde bɨ.

² ¿Parãpa nãga kꞌawa pꞌanɨ–ekꞌã? Tachi Akꞌõre tꞌãri pia bapari perã, parã pia oo kꞌinia bɨ. Mapa mɨ jɨrɨtꞌeraji na mimia oomerã parã–itꞌee.

³ Naaweda Tachi Akꞌõrepa kꞌĩsia iru baji mãgá parã pia ooitꞌee. Mamĩda mãga kꞌawapi–e paji naawedapemaarãmaa. Jĩpꞌa mɨmaa kꞌawapiji, mɨa pedee chokꞌara–eepa etꞌewa jaradakꞌa na pꞌãdade.

⁴ Ma pedee waya leedakꞌãri, kꞌawaadai Tachi Akꞌõrepa wãara mɨmaa kꞌawaapiji ichia kꞌĩsia iru bada ooitꞌee Cristo kꞌapꞌɨa pari.

⁵ Naaweda eperã apidaapa ma kꞌĩsia iru bada kꞌawada–e paji. Mamĩda ɨ̃rá kꞌawaapiji ichia awara bɨdaarãmaa; mãgɨɨrã ichia jɨrɨtꞌeradaarã mãikꞌaapa ichi pedee jarapataarã. Mãgá kꞌawaapiji ichi Jaure kꞌapꞌɨa pari.

⁶ Nãga kꞌĩsia iru baji. Judio–eerãpa ijãadakꞌãri Cristo piuji ãchi kꞌaripaitꞌee, aukꞌa pꞌanɨ judiorã ijãapataarã ome. Tachi Akꞌõrepa ãchi aukꞌa araa pꞌanapipari Jesucristo ome, pꞌuuru apai pɨkꞌa pꞌanadamerã judiorã ome. Irua ooda kꞌaurepa ãchi aukꞌa ɨtꞌaa wãdaitꞌee mãikꞌaapa aukꞌa iru pꞌanadaitꞌee jõma Tachi Akꞌõrepa jarada teeitꞌee ichideerãmaa.

⁷ Tachi Akꞌõrepa kꞌinia bada perã, mɨ pia ooji jɨrɨtꞌerakꞌãri jarateenamerã Cristopa ooda eperãarã kꞌaripaitꞌee. Iruata mɨmaa mãgɨ́ jarateepipari.

⁸ Cristode ijãai naaweda, mɨ apemaarã kꞌãyaara kꞌachiara bapachi. Mapa mɨ–itꞌee, mɨ apemaarã ijãapataarã ekꞌariara bɨ. Mamĩda Tachi Akꞌõrepa mɨ jɨrɨji. Irua mɨ pia oo kꞌinia bada perã, mɨ jɨrɨtꞌeraji judio–eerãmaa jarateenamerã Cristopa ooda eperãarã kꞌaripaitꞌee mãikꞌaapa irua ne–inaa pia oo kꞌinia bɨ irude ijãa pꞌanɨɨrã–itꞌee.

⁹ Maperãpɨ mɨa jõmaarãmaa jarai Tachi Akꞌõrepa na eujã ooi naaweda, kꞌĩsia iru bada parã judio–eerã kꞌaripaitꞌee. Awaraarãmaa mãga kꞌawapi–e paji mĩda, Tachi Akꞌõre, chi ne–inaa jõmaweda nɨ̃bɨ oodapa, mɨmaa mãga kꞌawapiji.

¹⁰ Naawedapemaarãmaa kꞌawapi–e paji ichia kꞌĩsia iru bada judio–eerã–itꞌee. Kꞌinia baji ɨ̃rapemaarãpa mãga kꞌawaadamerã. Ichiaba kꞌinia baji ɨtꞌaripemaarã, ichi angeleerãpa mãikꞌaapa netuaraarãpa paara kꞌawaa wãdamerã iru jõmaarã kꞌãyaara kꞌĩsia kꞌawaara bɨ eperãarã kꞌaripaitꞌee. Mãgɨɨrãpa mãga kꞌawaadaitꞌee unudakꞌãri judiorã judio–eerã ome pꞌuuru apai pɨkꞌa bɨ, Cristode ijãapata perã.

¹¹ Wãara Tachi Akꞌõrepa ooji ichia ichita kꞌĩsia iru badakꞌa ooitꞌee Tachi Waibɨa Jesucristo kꞌapꞌɨa pari.

¹² Maperãpɨ tachi Cristode ijãajida. Iru ome araa pꞌanapata perã, waaweeda–e Tachi Akꞌõre kꞌaitꞌa wãdaitꞌee ɨtꞌaa tꞌɨ̃dakꞌãri.

¹³ Tachi Akꞌõrepa ma jõma jara aupada ooda perã tachi ijãapataarã kꞌaripaitꞌee, o–ĩa para bátɨ. Mɨ nama carcelde chupɨria nɨ̃bɨ mĩda parã judio–eerãmaa jaratee kꞌiniapa, parã pia–ee, kꞌĩsia paraa pꞌanadaikꞌaraa bɨ. Ma kꞌãyaara o–ĩa pꞌanadaipia bɨ Tachi Akꞌõrepa parã judio–eerã ichiaba pia oo kꞌinia bairã Cristo kꞌapꞌɨa pari.

Cristo kꞌaurepa Tachi Akꞌõrepa tachi kꞌinia iru bapari

¹⁴ Mɨa made kꞌĩsiakꞌãri, Tachi Akꞌõre kꞌĩrapite bedabaipari mãikꞌaapa ɨtꞌaa tꞌɨ̃pari irumaa.

¹⁵ Iruta na pꞌekꞌau eujãdepema ëreerã mãikꞌaapa ɨtꞌaripema ëreerã akꞌõre, ichia ãra ooda perã.

¹⁶ Tachi Akꞌõre jõmaarã kꞌãyaara waibɨara bapari perã, ne–inaa jõmaweda kꞌawapari. Mapa mɨa ɨtꞌaa iidi bɨ irua parã choopimerã pãchi tꞌãride iru Jaure kꞌapꞌɨa pari, mãgá oodamerã irua oopi bɨkꞌa.

¹⁷ Iidi bɨ Cristo bamerã pãchi tꞌãride, irude ijãa pꞌanɨ misa. Mãgá parãpa Tachi Akꞌõre mãikꞌaapa awaraarã kꞌinia iru pꞌanadaitꞌee.

¹⁸ Ma awara mãgá parã mãikꞌaapa awaraa ijãapataarãpa kꞌawaadaitꞌee Cristopa tachi audú kꞌinia iru bapari. Ara to tꞌai audú jetꞌee bɨkꞌa, audú teesoo bɨkꞌa, audú nãpɨa bɨkꞌa, mãga pɨkꞌa Cristopa tachi audú kꞌinia iru bapari.

¹⁹ Pꞌoyaa kꞌawada–e pꞌanɨ mĩda Cristopa tachi mãgá audupai kꞌinia iru bɨ, mɨa iidi bɨ Tachi Akꞌõrepa parãmaa mãga pipɨara kꞌawapimerã. Parãpa wãara mãga kꞌawadakꞌãri, ne–inaa jõmaade Tachi Akꞌõrekꞌa pꞌanadaitꞌee.

²⁰ ¡Wãara Tachi Akꞌõre jõmaarã kꞌãyaara waibɨara bɨ! Ichi tachi ome bakꞌãri, tachimaa ne–inaa piara bɨ oopipari, irumaa iidipata kꞌãyaara mãikꞌaapa tachia kꞌĩsiapata kꞌãyaara.

²¹ Mapa tachi Jesucristode ijãapataarã, ɨ̃rapemaarã mãikꞌaapa tꞌẽe cherutaarã, o–ĩa ɨtꞌaa tꞌɨ̃dáma Tachi Akꞌõremaa jaradaitꞌee iru ichita jõmaarã kꞌãyaara waibɨara bɨ. ¡Amén!