Efesios 2 - Tachi Akꞌõre Pedee Chonaarãwedapema

Tachi Akꞌõrepa tachi kꞌinia iru bapari perã, atuada–e paitꞌee

¹ Cristode ijãadai naaweda, Tachi Akꞌõre–itꞌee parã piu pɨkꞌa pꞌanajida, irua oopi bɨkꞌa oodaamaa pꞌanapatapꞌedaa perã mãikꞌaapa pꞌekꞌau kꞌachia ooi awaa pꞌanapatapꞌedaa perã.

² Parãpa na pꞌekꞌau eujãdepemaarãpa ne–inaa kꞌachia oopata kꞌĩra tꞌãdoo oo wãpachida. Oo kꞌinia pꞌanapachida jaure kꞌachia beerã poro waibɨapa oopidakꞌa. Mãgɨ́ Netuara Poro Waibɨapa kꞌĩsiapipari Tachi Akꞌõrepa oopi bɨkꞌa oodaamaa pꞌanɨɨrãmaa, audupɨara mãga pꞌanadamerã.

³ Wãara Cristode ijãadai naaweda, tachi jõmaweda mãgee kꞌachia oopataarãkꞌa pꞌanapachida. Oopachida tachia oo kꞌiniata, tachi pꞌekꞌau kꞌachia ooyaa bɨ kꞌapꞌɨapa oopidakꞌa mãikꞌaapa tachia pariatua kꞌĩsiadapꞌedaakꞌa. Mãgá pꞌanadapꞌedaa perã, Tachi Akꞌõre kꞌĩraupi pꞌanapachida mãikꞌaapa atuadaitꞌee paji apemaarã pꞌekꞌau kꞌachia oopataarã ome.

⁴ Mãgá piu pɨkꞌa pꞌanajida mĩda tachia pꞌekꞌau kꞌachia oopata kꞌaurepa, Tachi Akꞌõrepa tachi audú chupɨria kꞌawaaji. Tachi kꞌinia iru bada perã,

⁵ araa pꞌanapiji Cristo ome, maadamãiipa ichita chokꞌai pꞌanapataadamerã iru kꞌĩrapite. Irua mãgá parã pia oo kꞌinia bada perã, parã o kꞌachiadeepa kꞌaripa ataji atuanaadamerã. Ɨ̃rá tachi ichita chokꞌai pꞌanɨ Tachi Akꞌõre kꞌĩrapite.

⁶ Tachi Akꞌõrepa tachi Jesucristo ome araa pꞌanapida perã, jaradai irua Cristo chokꞌai pꞌirabaipikꞌãri, tachi aukꞌa mãgá chokꞌai pꞌirabai pɨkꞌapiji. Ma awara Tachi Akꞌõrepa Cristo su–akꞌɨ beepikꞌãri ichi juaraare ɨtꞌari, tachi aukꞌa mama su–akꞌɨ pꞌanee pɨkꞌapiji, Cristo ome araa pꞌanapata perã.

⁷ Mãga ooji jõma tꞌẽe cherutaarãmaa akꞌɨpiitꞌee ichia tachi Jesucristode ijãapataarã pia oopari, ichi tꞌãri pia bapari perã.

⁸ Maperãpɨ parã Cristode ijãadakꞌãri, Tachi Akꞌõrepa parã o kꞌachiadeepa kꞌaripa ataji atuanaadamerã. Pãchi kꞌĩradoopa ma o kꞌachiadeepa pꞌoyaa uchiada–e paji. Tachi Akꞌõrepapai eperãarã madeepa uchiapii.

⁹ Eperãarã ãchi kꞌĩradoopa madeepa uchiada paara, mãgakꞌajida: “Tachia pia oopata kꞌaurepa Tachi Akꞌõrepa kꞌaripaji.” Mamĩda mãga–e. Tachi Akꞌõrepapai tachi ijãapataarã mãgá o kꞌachiadeepa kꞌaripa atapari, apida pedee audua pedeenaadamerã.

¹⁰ Iruata tachi ooji Cristode ijãadamerã mãikꞌaapa iruata tachi araa pꞌanapiji Cristo ome. Mãga ooji Jesucristo kꞌapꞌɨa pari ne–inaa pia oodamerã, irua naaweda kꞌĩsia iru badakꞌa.

Cristo ome araa pꞌanapataarã kꞌãiwee pꞌanapata

¹¹ Kꞌĩsíatɨ parã ijãadai naaweda pꞌanapatapꞌedaade. Naaweda parã Tachi Akꞌõrede ijãadakꞌaa paji. Judio–eerã perã, kꞌawada–e paji Akꞌõrepa jarada judiorãmaa, ɨmɨkꞌĩraarã kꞌapꞌɨade tauchaa bɨdamerã. Mapa judiorã, “chi tauchaa iru beerãda” apataarãpa atꞌãri parã judio–eerã kꞌĩra unuamaa iru pꞌanapata mãikꞌaapa parã ãpɨte “chi tauchaa wẽe beerã” apata.

¹² Ichiaba Cristode ijãadai naaweda, parãpa kꞌawada–e paji Tachi Akꞌõrepa Israel pidaarã jɨrɨtꞌerada ichi pꞌuuru pidaarã papiitꞌee. Mapa maarepida kꞌawada–e paji Tachi Akꞌõrepa jarada ãra chonaarãmaa: aba pëiitꞌeeda aji, eperãarã kꞌaripade. Mãgá Tachi Akꞌõre kꞌawada–e pꞌanadapꞌedaa perã, ichiaba kꞌawada–e paji sãga o kꞌachiadeepa uchiadai. Mãgá pꞌanapachida na pꞌekꞌau eujãde.

¹³ Mamĩda ɨ̃rá mãgá pꞌanada–e. Ijãapata perã Jesucristo piuji parã pari, araa pꞌanapata iru ome mãikꞌaapa Tachi Akꞌõredeerã pꞌanɨ irukꞌa. Naaweda tꞌɨmɨ́ pɨkꞌa pꞌanapachida Tachi Akꞌõre ikꞌaawaapa. Mamĩda ɨ̃rá Jesucristo waa batꞌada kꞌaurepa parã Tachi Akꞌõre kꞌaitꞌa pɨkꞌa pꞌanɨ, ichideerã perã.

¹⁴ Maperã parã kꞌãiwee pꞌanadai judiorã ome, ãra aukꞌa Cristode ijãadakꞌãri parãkꞌa. Ichi kꞌaurepa waa kꞌĩrau pꞌanada–e. Jĩpꞌa araa pꞌanapata pꞌuuru apai pɨkꞌa.

¹⁵ Naaweda Tachi Akꞌõrepa ichi ũraa Moisemaa pꞌãpiji, judiorãpa ma ũraade jara bɨkꞌa oodamerã. Ma ũraa kꞌaurepa judiorã awara pꞌanapachida parã judio–eerã kꞌãyaara. Mamĩda Tachi Akꞌõrepa ũraa chiwidi jara pëiji Cristo kꞌapꞌɨa pari. Mapa Cristo piukꞌãri, Akꞌõrepa chi judiorã irude ijãa pꞌanadapꞌedaarã uchiapiji ma naawedapema ũraa jarada jua ekꞌariipa. Mãga ooji Cristo kꞌaurepa judiorã judio–eerã ome pꞌuuru apai pɨkꞌa pꞌanadamerã mãikꞌaapa oodamerã irua oopi bɨkꞌa. Tachia mãga oodakꞌãri, wãara kꞌãiwee pꞌanapata.

¹⁶ Ma awara Cristo kurusode piukꞌãri, tachi tꞌãri aukꞌa bɨpiji Tachi Akꞌõre ome. Naaweda tachia pꞌekꞌau kꞌachia oopata kꞌaurepa Tachi Akꞌõrepa tachi pia akꞌɨ–e paji. Mamĩda Cristode ijãadakꞌãri, araa pꞌaneejida iru ome, kꞌapꞌɨa apai pɨkꞌa. Mapa ɨ̃rá Tachi Akꞌõrepa tachi pia akꞌɨpari. Ichiaba tachi kꞌĩrau–ee para bapari.

¹⁷ Cristo cheji na pedee pia jaraitꞌee: ichiata eperãarã kꞌãiwee pꞌanapipari. Mãga oopari parã Tachi Akꞌõre ikꞌaawaapa tꞌɨmɨ́ pɨkꞌa pꞌanadapꞌedaarãmaa mãikꞌaapa tai kꞌaitꞌa pɨkꞌa pꞌanadapꞌedaarãmaa paara.

¹⁸ Ɨ̃rá irude ijãapata perã, tachi jõmaweda Tachi Akꞌõre kꞌaitꞌa pꞌanapataadai iru Jaure kꞌapꞌɨa pari.

¹⁹ Maperãpɨ parã waa pꞌanadakꞌaa kꞌĩra tewaraarãkꞌa. Ma kꞌãyaara aukꞌa pꞌanapata awaraarã Cristode ijãapataarãkꞌa, aukꞌa Tachi Akꞌõredeerã perã.

²⁰ Parã te mãudee oodákꞌapɨ pꞌanɨ. Tai chi jɨrɨtꞌeradaarã Cristopa ooda jarateenadamerã basadepema mã́ukꞌapɨ pꞌanɨ Tachi Akꞌõre pedee jarapataarã ome. Jõdee Jesucristo chi te kꞌidaadepema mãu pi–iara pɨkꞌa bɨ, ichi kꞌaurepa jõma ijãapataarã araa pꞌanapata perã.

²¹ Tachi Akꞌõrepa parã ijãapataarã araa pꞌanapipari Cristo ome mãikꞌaapa awaraa ijãapataarã ome. Mãgá tachi ichi tekꞌa oo wãpari mãikꞌaapa tachi awara bɨ wãpari ichi–itꞌee, irumaa ɨtꞌaa tꞌɨ̃pataadamerã.

²² Tachi mãgá araa pꞌanapata perã Cristo ome, tachita Tachi Akꞌõre te waibɨakꞌa pꞌanɨ, iru Jaure tachi ome bapari perã.