Efesios 1 - Tachi Akꞌõre Pedee Chonaarãwedapema

Salude pëida

¹ Mɨ, Pablopa na kꞌartꞌa pꞌãru Jesucristode wãara ijãapataarãmaa, Éfeso pꞌuurude pꞌanɨ. Tachi Akꞌõrepa kꞌinia bada perã, mɨ jɨrɨtꞌeraji Jesucristopa pëimerã ichi ũraa jarateede.

² Mɨa kꞌinia bɨ Tachi Akꞌõrepa Tachi Waibɨa Jesucristo ome parã pia akꞌɨ pꞌanadamerã. Mãgá kꞌãiwee pꞌanapataadaitꞌee.

Cristo kꞌapꞌɨa pari Tachi Akꞌõrepa tachi kꞌaripapari

³ ¡Tꞌãri o–ĩa gracias jaradáma Tachi Akꞌõremaa! ¡Iru Tachi Waibɨa Jesucristo Akꞌõre! Iruata tachi bendiciaji tachi araa pꞌanapikꞌãri Cristo ome, irude ijãapata perã. Cristo kꞌapꞌɨa pari irua ɨtꞌaripema ne–inaa pia kꞌĩra tꞌãdoo ooji tachi kꞌaripaitꞌee, ɨtꞌaa wãdamerã piudakꞌãri. Nãgee ne–inaa pia ooji tachi–itꞌee.

⁴ Na eujã ooi naaweda, Tachi Akꞌõrepa tachi jɨrɨtꞌeraji Cristode ijãadamerã. Mãga ooji tachi awara bɨ kꞌinia bada perã, ichi kꞌĩrapite pꞌekꞌau kꞌachia wẽe pꞌanadamerã.

⁵ Ma awara iru tꞌãri pia bapari perã mãikꞌaapa tachi kꞌinia iru bapari perã, kꞌĩsia iru baji tachi ichi warrarã papiitꞌee ichi Warra Jesucristode ijãapata kꞌaurepa.

⁶ Mãgá tꞌãri piara bapari perã jõmaarã kꞌãyaara, tꞌãri o–ĩa gracias jaradáma irumaa. Maperã tachia ne–inaa oo–eeta, ichideerã papiji ichi Warra kꞌinia iru bɨ kꞌapꞌɨa pari. Mãga ooji ichi Warra pëikꞌãri piumerã tachi pari.

⁷ Ichi warra waa batꞌada kꞌaurepa tachi o kꞌachiadeepa kꞌaripa ataji atuanaadamerã mãikꞌaapa tachia pꞌekꞌau kꞌachia oopata wẽpapiji.

⁸ ¡Mãga ookꞌãri, wãara tachi pia ooji! Mamĩda mãgapai–e.

⁹ Mãga ookꞌãri, ichiaba tachi kꞌĩsia kꞌawaapiji ne–inaa pia oo kꞌawaadamerã irua oopi bɨkꞌa. Ichiaba kꞌawapiji ne–inaa awaraarãmaa waide kꞌawapi–e pada. Kꞌawapiji ichia atꞌãri kꞌĩsia iru bɨ ooitꞌee Cristo kꞌapꞌɨa pari.

¹⁰ Nãga kꞌĩsia iru bɨ. Irua kꞌinia bakꞌãri, ewari cherude ne–inaa jõmaweda na pꞌekꞌau eujãdepema mãikꞌaapa ɨtꞌaripema bɨitꞌee Cristo jua ekꞌari.

¹¹ Tachi Akꞌõrepa ne–inaa jõmaweda oopari ichia kꞌinia bɨkꞌa. Mapa ichia kꞌĩsia iru badakꞌa, tai judiorã naapɨara jɨrɨtꞌeraji ichideerã papiitꞌee. Mãga ooji Cristode ijãadakꞌãri. Tai mãgá ichideerã pꞌanadairã, iru pꞌanadaitꞌee jõmaweda irua kꞌĩsia iru bɨ ichideerã–itꞌee.

¹² Tai judiorã mãgá naapɨara jɨrɨtꞌeraji, nɨ pꞌanadapꞌedaa perã Cristo waya cheitꞌee na eujãdee. Tachi Akꞌõrepa kꞌinia baji taipa jõmaarãmaa jaranadamerã iru jõmaarã kꞌãyaara waibɨara bɨ.

¹³ Mãpai taipa mãga oodakꞌãri, parãpa ũrijida Tachi Akꞌõrepa wãarata jara pëida Cristode. Mãgá kꞌawaadakꞌãri Cristopa eperãarã o kꞌachiadeepa kꞌaripa atai, parãpa ichiaba irude ijãajida. Mapa Tachi Akꞌõrepa parã aukꞌa ichideerã papiji mãikꞌaapa parã kꞌapꞌɨade ichi Jaure ba chepiji, irua ooitꞌeeda adakꞌa. Eperãpa tauchaa bɨparikꞌa ichi netꞌaade jõmaarãpa kꞌawaadamerã ichi ma netꞌaa chipari, mãga pɨkꞌa Tachi Akꞌõrepa ichi Jaure ba chepiji ichideerã kꞌapꞌɨade, jõmaarãpa kꞌawaadamerã ichita ãchi chipari.

¹⁴ Ma Jaure kꞌaurepata tachia kꞌawa pꞌanɨ wãara iru pꞌanadaitꞌee jõmaweda irua kꞌĩsia iru bɨ ichideerã–itꞌee. Ma awara kꞌawa pꞌanɨ ichideerã perã ewari cherude tachi pꞌekꞌau kꞌachia ooyaa bɨ kꞌapꞌɨadeepa aweda uchiadaitꞌee, wãdakꞌãri iru truadee. Mãga pakꞌãripɨ, wãara tꞌãri o–ĩa gracias jaradaitꞌee irumaa, iru kꞌĩra wãree pia kꞌawadaitꞌee perã.

Pablopa ɨtꞌaa iidida Cristode ijãapataarã pari

¹⁵ Tachi Akꞌõrepa ma jõma ooda perã tachi–itꞌee, mɨa kꞌawaadakꞌãriipa parã wãara ijãa pꞌanɨ Tachi Waibɨa Jesude mãikꞌaapa parãpa jõma Tachi Akꞌõredeerã kꞌinia iru pꞌanɨ, mɨa nãga oopari.

¹⁶ Ɨtꞌaa tꞌɨ̃kꞌãri Tachi Akꞌõremaa, ichita gracias jarapari parã pari.

¹⁷ Iidipari Tachi Waibɨa Jesucristo Akꞌõre kꞌĩra wãree bɨmaa, irua parã kꞌĩsia kꞌawaapimerã ichi Jaure kꞌapꞌɨa pari. Mãgá iru wãara pipɨara kꞌawadaitꞌee.

¹⁸ Parãpa mãgá iru pipɨara kꞌawa wãdakꞌãri, tꞌãride kꞌawadaitꞌee Tachi Akꞌõrepa parã jɨrɨji ichideerã papiitꞌee. Mãga ooji, jai–idaadakꞌãri iru trua kꞌĩra wãreedee wãdamerã mãikꞌaapa iru pꞌanadamerã jõmaweda irua kꞌĩsia iru bɨ ichideerã–itꞌee.

¹⁹ Ichiaba parãpa kꞌawaadaitꞌee Tachi Akꞌõrepa ne–inaa jõmaweda oopari. Iru jõmaarã kꞌãyaara waibɨara bapari perã, tachi ijãapataarã kꞌaripai Cristo kꞌaripadakꞌa.

²⁰ Cristo piupꞌeda, chokꞌai pꞌirabaipiji mãikꞌaapa su–akꞌɨ beepiji ɨtꞌari ichi juaraare.

²¹ Mama bɨji akꞌɨpi kꞌinia bada perã Cristo jõmaarã kꞌãyaara waibɨara bɨ. Jõmaweda iru jua ekꞌari ichita pꞌanapataadaitꞌee, na pꞌekꞌau eujã jõru pɨjida. Na pꞌekꞌau eujãdepema poro waibɨarã jõmaweda iru jua ekꞌari pꞌanadaitꞌee, jõmaweda charraarã mãikꞌaapa reyrã paara. Ichiaba na pꞌekꞌau eujãdepema–eerã iru jua ekꞌari pꞌanadaitꞌee, angeleerã mãikꞌaapa netuara eere pꞌanɨɨrã paara.

²² Tachi Akꞌõrepa ma jõmaweda Cristo jua ekꞌari mãgá bɨda perã, iru ne–inaa jõma poro waibɨa; tachi ijãapataarã poro waibɨa ichiaba.

²³ Iru tachi porokꞌa bɨ; jõdee tachi ijãapataarã iru kꞌapꞌɨa apai pɨkꞌa pꞌanɨ, chokꞌara pꞌanɨ mĩda. Tachi ijãapataarã wẽe, Cristopa oo–e pai Tachi Akꞌõrepa oopi kꞌinia bɨkꞌa na pꞌekꞌau eujãde. Jõdee tachia pida pꞌoyaa ooda–e pai Tachi Akꞌõrepa oopi kꞌinia bɨkꞌa, Tachi Poro Waibɨa Cristo wẽe. Cristo kꞌaurepata ne–inaa jõmaweda nɨ̃bɨ.