Daniel 9 - Tachi Akꞌõre Pedee Chonaarãwedapema

Danielpa ɨtꞌaa tꞌɨ̃da

¹ Mediadepema Jerjes warra, Darío naarapema año caldeorã rey bɨde,

² mɨa leemaa baji Tachi Akꞌõre pedee jarapari Jeremiapa pꞌãda. Ma Jeremiamaa Tachi Akꞌõrepa pꞌãpidade jara baji Jerusalén pꞌuuru jõdapꞌeda, chiwidi oo atadai naaweda, setenta años wãyaaitꞌee.

³ Made kꞌĩsiapꞌeda, mɨa Tachi Akꞌõre Waibɨamaa ɨtꞌaa iidimaa beeji mãikꞌaapa chupɨria iidimaa beeji. Ma awara nekꞌo–ee irumaa ɨtꞌaa tꞌɨ̃maa beeji mãikꞌaapa chi ɨapata pꞌaru jɨ̃ beepꞌeda, itꞌabarre pꞌora ɨ̃rɨ su–akꞌɨ beeji.

⁴ Mɨ Akꞌõre Waibɨamaa ɨtꞌaa tꞌɨ̃ji mɨchi aukꞌaarãpa pꞌekꞌau kꞌachia oopatapꞌedaa pari mãikꞌaapa mɨa oopariida pari. Irumaa nãga jaraji: “Tachi Akꞌõre, pɨ Jõmaarã Akꞌõre Waibɨa; jõmaarã kꞌãyaara waibɨara bɨ. Mapa taipa pɨ waaweepata. Pɨa ichita oopari pɨa jaradakꞌa pɨ kꞌinia iru pꞌanapataarã ome mãikꞌaapa pɨ leyde jara bɨkꞌa oopataarã ome.

⁵ Taipa pꞌekꞌau kꞌachia oopata. Ne–inaa kꞌachia ooyaa pꞌanapata mãikꞌaapa pɨa jara bɨkꞌa oodaamaa pꞌanapata. Pɨ leyde jara bɨkꞌa oodakꞌaa.

⁶ Taipa pɨ pedee jarapataarã pedee ũridaamaa pꞌanapata, ãra pɨ mimiapataarã mĩda mãikꞌaapa pɨ pari pedeejida mĩda tai reyrãmaa, tai poro waibɨarãmaa, tai chonaarãmaa mãikꞌaapa israelitaarã jõmaarãmaa.

⁷ ”Jõmaarã Akꞌõre Waibɨa, pɨa ichita ne–inaa pia oopari. Mamĩda idi tai jõmaweda Judá eujãdepemaarã, Jerusalén pꞌuurudepemaarã, awaraa israelitaarã, kꞌaitꞌa pꞌanapataarã mãikꞌaapa tꞌɨmɨ́ pꞌanapataarã paara, kꞌĩra nejasia pꞌanɨ, pɨde ijãa amaa pꞌanadapꞌedaa perã. Maperãpɨ pɨa tai awara–awaraa eujãdee ateepiji.

⁸ ”Tachi Akꞌõre, tai mãgá kꞌĩra nejasia pꞌanɨ taipa, tai reyrãpa, tai poro waibɨarãpa mãikꞌaapa tai chonaarãpa paara pɨ kꞌĩrapite pꞌekꞌau kꞌachia oopatapꞌedaa perã.

⁹ Tachi Akꞌõre, taipa pɨa oopi bɨkꞌa oodaamaa pꞌanapata mĩda, pɨa eperãarã chupɨria kꞌawaapari mãikꞌaapa ãchia pꞌekꞌau kꞌachia oopata ãyaa bɨpari.

¹⁰ Tachi Akꞌõre, tai Akꞌõre Waibɨa, taipa pɨ ley ũridaamaa pꞌanapata mãikꞌaapa oodaamaa pꞌanapata pɨa pɨ pedee jarapataarãmaa jarapida, ãra pɨ mimiapataarã paji mĩda.

¹¹ Israelitaarã jõmaarãpa pɨ ley ũridaamaa pꞌanapata mãikꞌaapa pɨa jara bɨkꞌa oodaamaa pꞌanapata. Maperã pɨa tai kꞌachia ooji mãikꞌaapa kꞌachiade baaipiji pɨ mimiapari Moisepa pꞌãdade jara bɨkꞌa. Pɨa taimaa mãga ooji, pɨ kꞌĩrapite taipa pꞌekꞌau kꞌachia oopatapꞌedaa perã.

¹² Na ne–inaa kꞌachiade baaipikꞌãri, pɨa ooji tai israelitaarãmaa mãikꞌaapa tai poro waibɨarãmaa ooitꞌeeda adakꞌa. Pɨa na pꞌekꞌau eujã oodakꞌãriipa, apidaapa waide unudakꞌaa pɨa Jerusalén pꞌuurumaa ne–inaa kꞌachia oodakꞌa, pɨa tai kꞌĩra unuamaa iru pꞌanapataarãmaa ma pꞌuuru jõpikꞌãri.

¹³ Tachi Akꞌõre, tai Akꞌõre Waibɨa, na jõmaweda pꞌasaji Moisepa ley pꞌãdade jara bɨkꞌa. Mamĩda taipa jɨrɨdakꞌaa oodaitꞌee pɨa jara bɨkꞌa mãikꞌaapa taipa ne–inaa kꞌachia oopata oo amaadakꞌaa. Ichiaba jɨrɨdakꞌaa pɨ ũraa wãara jara bɨ kꞌawaadaitꞌee.

¹⁴ Maperã pɨa tai na kꞌachiade baaipiji. Tachi Akꞌõre, pɨa ichita ne–inaa pia oopari. Mamĩda taipa pɨ ũraa ũridaamaa pꞌanapata.

¹⁵ ’’Tachi Akꞌõre, pɨa pɨ jua akꞌɨpiji pɨ pꞌuuru pidaarãmaa, ãchi Egipto eujãdeepa uchiapikꞌãri. Maadamãiipa idi parumaa ma kꞌaurepa eperãarãpa pɨ tꞌɨ̃ tꞌo pꞌanapata. Mamĩda taipa pꞌekꞌau kꞌachia oopata mãikꞌaapa ne–inaa kꞌachia ooi awaa pꞌanapata.

¹⁶ Tachi Akꞌõre, pɨa mãgá pɨ pꞌuuru pidaarã kꞌaripapariidakꞌa, ɨ̃rá aukꞌa tai chupɨria kꞌawáaji mãikꞌaapa waa kꞌĩrau banáaji Jerusalén pꞌuurudepemaarã ome, ma pꞌuuru përé perã mãikꞌaapa pɨa ee awara bɨdade bairã. Jerusalén ikꞌaawa pꞌanapata eujãdepemaarã jõmaarãpa pɨ pꞌuuru Jerusalén mãikꞌaapa tai, pɨchi eperãarã oo iru pꞌanɨ, taipa mãikꞌaapa tai chonaarãpa pꞌekꞌau kꞌachia ooi awaa pꞌanapatapꞌedaa perã.

¹⁷ Tachi Akꞌõre, tai Akꞌõre Waibɨa, ũríji mɨ, pɨ mimiaparipa ɨtꞌaa tꞌɨ̃maa bɨ mãikꞌaapa chupɨria iidimaa bɨ. Pɨa pɨchi te kꞌinia iru bɨ. Mapa waya pia akꞌɨ́ji, ma te ituaba bairã tꞌeetꞌaadapꞌedaa perã. Mãgá jõmaarãpa pɨ tꞌɨ̃ waya tꞌo pꞌanapataadaitꞌee.

¹⁸ Taipa chupɨria iidi jõnɨ ũríji mãikꞌaapa tai akꞌɨ́ji. Tai chupɨria chitoonɨ akꞌɨ́ji mãikꞌaapa pꞌuuru taipa pɨmaa ɨtꞌaa tꞌɨ̃patapꞌedaamãi akꞌɨ́ji ma pꞌuuru ãri bairã. Taipa nãgá ɨtꞌaa tꞌɨ̃dakꞌaa kꞌĩsia pꞌanadairã taita kꞌachia wẽe pꞌanapata. Jĩpꞌa ɨtꞌaa tꞌɨ̃pata kꞌawa pꞌanadairã pɨa eperãarã chupɨria kꞌawaapari.

¹⁹ ¡Tachi Akꞌõre, ũríji mãikꞌaapa taipa ne–inaa kꞌachia oopata ãyaa bɨ́ji! ¡Tachi Akꞌõre, tai akꞌɨ́ji mãikꞌaapa kꞌaripa chéji! ¡Tachi Akꞌõre, taarãnáaji pɨa pɨ pꞌuuru mãikꞌaapa pɨ eperãarã jɨrɨtꞌerada perã! ¡Mɨchi Akꞌõre Waibɨa, tai, pɨchi eperãarãpa pɨmaa aupai ɨtꞌaa tꞌɨ̃pata! ¡Mapa tai chupɨria kꞌawáaji!’’

Tomia setenta

²⁰ Mãgá mɨ Akꞌõre Waibɨamaa ɨtꞌaa tꞌɨ̃maa beeji. Irumaa jaraji mɨa pꞌekꞌau kꞌachia oopariida mãikꞌaapa mɨchi aukꞌaarã, israelitaarãpa pꞌekꞌau kꞌachia oopatapꞌedaa. Ma awara ɨtꞌaa iidiji irua ee awara bɨda pari, aɨ naaweda iru te mama bada perã.

²¹ Perá kꞌewarapema ne–animalaarã Tachi Akꞌõre–itꞌee paapatapꞌedaa hora paji. Mɨ mãgá ɨtꞌaa tꞌɨ̃maa bɨde eperãkꞌa naaweda kꞌãimokꞌaraadade unuda, Gabriel, wãabai cheji mɨ badamaa.

²² Irua mɨmaa mãgaji: —Daniel, ɨ̃rá mɨ pɨmaa cheji na ne–inaa kꞌawapide.

²³ Pɨ ewaa ɨtꞌaa tꞌɨ̃maa beekꞌãri, Tachi Akꞌõrepa ũriji. Mapa mɨ pɨmaa jarade cheji pɨa lee bada kꞌãata jara kꞌinia bɨ. Irua pɨ audú kꞌinia iru bapari. Mapa mɨa jararu pia ũríji.

²⁴ ’Tachi Akꞌõrepa tomia setenta awara bɨji pɨchi aukꞌaarãpa mãikꞌaapa pɨ pꞌuuru Tachi Akꞌõre–itꞌee awara bɨdadepemaarãpa Tachi Akꞌõremaa ãchia pꞌekꞌau kꞌachia oopatapꞌedaa jaradamerã mãikꞌaapa irude waya ijãa pꞌaneedamerã. Mãga oodakꞌãri, Tachi Akꞌõrepa wẽpapiitꞌee ãrapa pꞌekꞌau kꞌachia oopata mãikꞌaapa irua ãra ichita pia akꞌɨ bapariitꞌee. Maapai iru pedee jarapataarãpa kꞌãimokꞌaraa pɨkꞌa bɨde unudapꞌedaakꞌa uchiaitꞌee. Mapa waa kꞌãimokꞌaraa pɨkꞌada–e paitꞌee. Ichiaba maapai Jeremiapa pꞌãda pɨa leedade jara bɨkꞌa, Tachi Akꞌõre te chiwidi oodapꞌeda, iru–itꞌee awara bɨdaitꞌee.

²⁵ Na pedee pɨa kꞌawaaipia bɨ. Jaradakꞌãriipa Jerusalén chiwidi oo atanadamerã, ma pꞌuurudepema poro waibɨa awara bɨrutamaa tomia siete wãyaaitꞌee. Mãpai Jerusalén pꞌuuru chiwidi oodaitꞌee; chi calle, chi plaza, chi pꞌuuru tꞌɨakꞌau bɨ muralla ome. Mamĩda ma pꞌuuru oomaa pꞌanɨɨrã pꞌera jõnɨpa kꞌĩsia paraa pꞌanadaitꞌee. Maapꞌeda, tomia sesenta y dos wãyaaitꞌee Tachi Akꞌõrepa jɨrɨtꞌerada pai naaweda.

²⁶ Ma tomia sesenta y dos wãyaada tꞌẽepai Akꞌõrepa jɨrɨtꞌerada peetꞌaadaitꞌee. Maperã ma pꞌuurudepemaarã iru jua ekꞌari pꞌaneeda–e paitꞌee. Ma kꞌãyaara awaraa rey uchiaitꞌee bɨ eere pꞌanɨɨrãpa Jerusalén pꞌuuru Tachi Akꞌõre te ome jõpitꞌaadaitꞌee. Atu pꞌanɨde to chomapa pꞌuuru jõtꞌaaparikꞌa, mãga pɨkꞌa ma pꞌuuru jõdariitꞌee. Ma tꞌẽepai chõo para baitꞌee mãikꞌaapa ma eujãdepema netꞌaa jõdaitꞌee ma jura chõo auparutamaa.

²⁷ Awaraa tomiade ma reypa pacto ooitꞌee eperãarã chokꞌara ome. Mamĩda ma tomia esa–aukꞌa bɨde irua jaraitꞌee waa ne–animalaarã Tachi Akꞌõre–itꞌee paanaadamerã mãikꞌaapa waa netꞌaa iru–itꞌee tee chenaadamerã. Maapai irua ne–inaa audú kꞌachia ooitꞌee Tachi Akꞌõre te ɨ̃rɨ, chi ɨtꞌɨpɨara bɨmãi, Tachi Akꞌõrepa ewari awara bɨda paru misa iru jõpiitꞌee.