Daniel 7 - Tachi Akꞌõre Pedee Chonaarãwedapema

Danielpa kꞌãimokꞌaraadade nemĩsia nẽchoma beerã kꞌĩmari unuda

¹ Babilonia eujãdepema rey Belsasar naarapema año rey bɨde Danielpa kꞌãimokꞌaraaji. Ichi pꞌarude bɨde, kꞌãimokꞌaraaji mãikꞌaapa ɨ̃rɨmakꞌãri, ichia ma kꞌãimokꞌaraadade unuda pꞌãji.

² Ma pꞌãdade nãga jaraji: “Pꞌãrikꞌua mɨa kꞌãimokꞌaraadade unuji nãu pꞌua nɨ̃bɨ norte eereepa, oriente eereepa, sur eereepa mãikꞌaapa occidente eereepa. Ma nãu kꞌĩmari pꞌusa choma bɨ ɨ̃rɨ pꞌua nɨ̃baji. Mapa pꞌusa tꞌo nɨ̃beeji.

³ ”Mãga bɨde pꞌusadeepa nemĩsia nẽchoma beerã kꞌĩmari uchiajida. Ma nemĩsia nẽchoma beerã awara–awaraa pꞌanajida.

⁴ Chi naa uchiada leonkꞌa baji. Mamĩda nejɨ̃pɨ isia kꞌarakꞌa iru baji. Mɨa akꞌɨmaa bɨde chi isia kꞌara ẽtꞌa atajida mãikꞌaapa chi kꞌapꞌɨa jira atadapꞌeda, eujãde bainɨ̃ bɨnajida. Mama chi ãtauwaarepema bɨɨrɨpa eperãkꞌa bainɨ̃ beeji mãikꞌaapa eperã kꞌĩsiaparikꞌa kꞌĩsia beeji.

⁵ ’’Aɨ eerepema osokꞌa baji. Ikꞌia aba ɨtꞌɨara baji chi apema kꞌãyaara. Mãgɨpa orro õpee ichi kꞌidade kꞌaa iru baji. Mãgá akꞌɨmaa bɨde mɨa nãgɨ́ pedee ũriji: ‘¡Bainɨ̃ béeji mãikꞌaapa nechiara waibɨa kꞌóji bi jãwaarumaa!’

⁶ ’’Ma omé eerepema imamakꞌa baji. Mamĩda ipana isia kꞌarakꞌa kꞌĩmari iru baji ichi ekꞌarrade. Ichiaba poro kꞌĩmari iru baji. Mãgɨ́ juataura papijida, mãgá ichi jua ekꞌari chokꞌara iru bamerã.

⁷ ’’Ma tꞌẽepai mɨa kꞌãimokꞌaraa bɨde unuji õpee eerepema nemĩsia nẽchoma bɨ. Mãgɨ́ kꞌachiara baji chi apemaarã kꞌãyaara. Ne–inaa tachi pꞌerapiparikꞌa baji mãikꞌaapa audú juataura baji. Chi kꞌida nẽchoma hierrodee baji. Mãgɨpa ne–inaa jõmaweda unu wãda kꞌo wãpachi mãikꞌaapa netꞌaa chokꞌara ãrikꞌoo wãpachi. Maapꞌeda aɨ ɨ̃rɨ tꞌɨa wãpa ichi bɨɨrɨpa piartꞌɨ wãpachi. Apemaarã nemĩsia nẽchoma beerã mɨa ma kꞌãimokꞌaraade unuda kꞌãyaara, mãgɨ́ awara baji, ichi porode cacho diez iru bada perã.

⁸ ’’Mɨa ma cacho akꞌɨmaa bɨde mãɨrã esajĩakꞌa unuji awaraa cacho ma–ãriara uchia wã. Ma cacho kꞌaurepa aɨ kꞌĩrapite pꞌanadapꞌedaa cacho õpee ẽtꞌa atajida. Mãgɨ́ cacho tꞌẽe uchiada tau iru baji eperãkꞌa mãikꞌaapa chi itꞌaipa pedee audua pedeepachi.

Tachi Akꞌõre ewari waibɨa ewate

⁹ ’’Mãgá akꞌɨmaa bɨde unuji rey su–akꞌɨ beepari mama bɨruta. Su–akꞌɨ beepari abaade chi ichita chokꞌai bapari su–akꞌɨ beeji. Chi pꞌaru tꞌo–tꞌoo baji nievekꞌa mãikꞌaapa chi puda tꞌo–tꞌoo baji oveja kꞌara pia tꞌõdakꞌa. Ma rey su–akꞌɨ beepari carretakꞌa baji llanta ome. Mamĩda ma jõmaweda tꞌɨpɨtaukꞌa urua nɨ̃baji.

¹⁰ Ma awara iru kꞌĩrapiteepa to uchiaji tꞌɨpɨtau urua nɨ̃bɨkꞌa. Mil chokꞌara mãikꞌaapa millón chokꞌara iru jua ekꞌari mimia pꞌanajida. Mama pꞌanadapꞌedaa charraarã su–akꞌɨ pꞌaneejida mãikꞌaapa libro chokꞌara ewatꞌɨjida.

¹¹ ’’Mɨa akꞌɨmaa baji mãikꞌaapa ũrimaa baji ma cacho ma–ãri bɨpa pedee audua pedeemaa bada. Mãgá akꞌɨmaa bɨde ma nemĩsia kꞌachiara bada peetꞌaajida mãikꞌaapa chi kꞌapꞌɨa pitikiakꞌoojida. Maapꞌeda tꞌɨpɨtau urua jira bɨde batꞌakꞌoojida paa jõmerã.

¹² Jõdee chi apemaarã nemĩsia nẽchoma beerã juatau wẽe papijida. Mamĩda atꞌãri chokꞌai bëijida mãɨrã peedaitꞌee ewari paru misa.

¹³ ’’Ma pꞌãrikꞌuapema kꞌãimokꞌaraadade mɨa unuji eperãkꞌa bɨ jɨ̃araradeepa chewã. Mãgɨ́ wãji ma ichita bapari su–akꞌɨ bada kꞌaitꞌa. Iru kꞌĩrapite ateedakꞌãri,

¹⁴ juataura papiji mãikꞌaapa kꞌĩra wãree papiji. Pꞌuuru pidaarã awara–awaraadepemaarã, eujã awara–awaraadepemaarã mãikꞌaapa pedee awara–awaraa pedeepataarã bɨji iru jua ekꞌari mimiapataadamerã. Ichita jõmaweda iru jua ekꞌari pꞌanapataadaitꞌee, iru ichita jõmaarã rey perã.

¹⁵ ’’Mãgá mɨa akꞌɨmaa bɨde mɨ, Daniel, pꞌeradachi. Kꞌĩsia nɨ̃beeji ma jõmaweda unuda kꞌaurepa.

¹⁶ Mapa ma kꞌãimokꞌaraadade mɨ wãji ma ichita bapari jua ekꞌari mimiapataarãdepema abaamaa iidide ma jõma kꞌãata jara kꞌinia bɨ. Mãpai mãgɨpa nãga jaraji:

¹⁷ ‘Ma nemĩsia nẽchoma beerã kꞌĩmari jara kꞌinia bɨ rey waibɨa kꞌĩmari. Mãgɨɨrãpa na pꞌekꞌau eujãdepemaarã ãchi jua ekꞌari iru pꞌanadaitꞌee.

¹⁸ Mamĩda ma tꞌẽepai mãɨrã jua ekꞌari beerã Jõmaarã Akꞌõre Waibɨadeerã jua ekꞌari pꞌaneedaitꞌee. Maadamãiipa ichita ãra jua ekꞌari pꞌanapataadaitꞌeeda’ aji.

¹⁹ ’’Ichiaba mɨa kꞌawa kꞌinia baji kꞌãata jara kꞌinia baji ma õpee eerepema nemĩsia nẽchoma bɨ, chi apemaarã kꞌãyaara awara bada. Audú kꞌĩra kꞌachia baji. Kꞌida hierrodee mãikꞌaapa pꞌisii broncedee iru baji. Ichia ne–inaa jõmaweda unu wãda kꞌo wãpachi mãikꞌaapa netꞌaa ãrikꞌoo wãpachi. Maapꞌeda aɨ ɨ̃rɨ tꞌɨa wãpachi.

²⁰ Ichiaba mɨa kꞌawa kꞌinia baji kꞌãata jara kꞌinia baji ma cacho diez mãikꞌaapa chi ma–ãriara uchiada. Mãgɨ́ cacho kꞌaurepa aɨ kꞌĩrapite pꞌanadapꞌedaa cacho õpeeweda baaidachida. Mãgɨ́ chi awaraa cacho kꞌãyaara waibɨara pɨkꞌa baji, tau iru bada perã mãikꞌaapa chi itꞌaideepa pedee audua pedee bada perã.

²¹ ”Mɨa mãgɨ́ akꞌɨmaa bɨde unuji mãgɨ́ cacho Tachi Akꞌõredeerã ome chõo bapꞌeda, irua ãra pꞌoyaaru.

²² Mãpai chi ichita bapari cheji mãikꞌaapa ichideerã kꞌaripaji. Mãgá ewari ma–itꞌee awara bɨda paji mãikꞌaapa Jõmaarã Akꞌõre Waibɨadeerãpa eperãarã ãchi jua ekꞌari iru pꞌaneejida.

²³ Mãpai mɨa iidi badamaa; mãgɨ́ mimiaparipa mɨmaa mãgaji: ‘Ma õpee eerepema nemĩsia nẽchoma bɨ jara kꞌinia bɨ awaraa rey waibɨa uchiaitꞌee na pꞌekꞌau eujãde. Mãgɨ́ awara baitꞌee chi apemaarã kꞌãyaara. Na pꞌekꞌau eujãdepema eujã jõmaweda ichi jua ekꞌari bɨ wãitꞌee mãikꞌaapa netꞌaa ãrikꞌoo wãitꞌee. Maapꞌeda aɨ ɨ̃rɨ tꞌɨa wãitꞌee.

²⁴ Ma cacho diez jara kꞌinia bɨ reyrã diez. Mãgɨɨrã ma nemĩsia nẽchoma bɨ jua ekꞌari reyrã padaitꞌee. Tꞌẽepai rey awaraa uchiaitꞌee. Mãgɨ́ naawedapemaarã kꞌãyaara awara baitꞌee. Ichia ma diezdepema reyrã õpee pꞌoyaaitꞌee.

²⁵ Pedee kꞌachia jaraitꞌee Jõmaarã Akꞌõre Waibɨa ãpɨte mãikꞌaapa irudeerã miapiitꞌee. Tachi Akꞌõre ley tꞌerabaipi kꞌinia baitꞌee ichi ley pari. Ma awara fiesta ewari awara bɨda Tachi Akꞌõre–itꞌee tꞌerabai kꞌinia baitꞌee awaraa ewari pari. Año õpee apꞌeda esa–aukꞌa wãyaarude Tachi Akꞌõredeerã mãgɨ́ rey jua ekꞌari pꞌaneedaitꞌee.

²⁶ Mamĩda ɨtꞌaripema charraarãpa irua oomaa bɨ unudakꞌãri, waa eperãarã ichi jua ekꞌari iru bapida–e paitꞌee. Mãgá iru jõtꞌaadaitꞌee.

²⁷ Mãpai eperãarã pꞌaneedaitꞌee Jõmaarã Akꞌõre Waibɨadeerã jua ekꞌari, ãchia jõmaarã reyrã kꞌãyaara juataura mãikꞌaapa kꞌĩra wãreera pꞌanadaitꞌee perã. Mãgá Jõmaarã Akꞌõre Waibɨa ichita jõmaarã rey bapariitꞌee. Jõmaweda na pꞌekꞌau eujãdepema poro waibɨarãpa oopataadaitꞌee irua oopi bɨkꞌa, iru mimiapataarã pꞌanadaitꞌee perã.’

²⁸ ’’Mãga paji mɨ, Danielpa kꞌãimokꞌaraada. Ma tꞌẽepai ma kꞌãimokꞌaraada kꞌaurepa mɨ kꞌĩsia nɨ̃beeji mãikꞌaapa mɨ kꞌĩra pꞌãwatɨdachi. Mamĩda apidaamaa jara–e paji.”