Daniel 11 - Tachi Akꞌõre Pedee Chonaarãwedapema

¹ Mediadepema rey Darío naarapema año rey bɨde mɨa iru kꞌaripaji.

Sur eerepema reyrã norte eerepema reyrã ome

² ’Ɨ̃rá mɨa pɨmaa wãarata kꞌawapiitꞌee. Persia eujãde awaraa reyrã õpee uchiadaitꞌee. Maapꞌeda ma reyrã õpee eere awaraa rey uchiaitꞌee. Mãgɨ́ apemaarã reyrã kꞌãyaara pꞌaratꞌara baitꞌee. Mãgá ma pꞌaratꞌara bɨ kꞌaurepa juataura beekꞌãri, ichi jua ekꞌari beerã ɨmɨaitꞌee Greciadepema rey ome chõo kꞌinia pꞌanadamerã.

³ Mamĩda ma tꞌẽepai awaraa rey uchiaitꞌee. Mãgɨ́ juataura baitꞌee mãikꞌaapa chõo kꞌawaa baitꞌee. Eujã waibɨa ichi–itꞌee jãri ata wãitꞌee mãikꞌaapa ichi jua ekꞌari bɨitꞌee. Mãgá rey waibɨa chõo kꞌawaa baitꞌee perã, ichia oo kꞌiniata oo wãitꞌee.

⁴ Mamĩda mãga bɨde ichi jua ekꞌari beerã awara–awaraa pꞌananadaitꞌee; ũkꞌuru norte eere, ũkꞌuru oriente eere, ũkꞌuru sur eere mãikꞌaapa ũkꞌuru occidente eere. Irudeepa uchiadaitꞌeerã reyrã pada–e paitꞌee. Ma awara iru naaweda juataura baji mĩda, ma awara–awaraa pꞌananadapꞌedaarã poro waibɨarã makꞌɨara juataura pꞌanada–e paitꞌee, Tachi Akꞌõrepa ãra mãgá awara–awaraa pꞌanapiitꞌee perã mãgá reydeerãpa ma eujã ãchi jua ekꞌari iru pꞌananaadamerã.

⁵ ’Ma tꞌẽepai ma sur eeree wãdapꞌedaarã rey juataura beeitꞌee. Mamĩda soldaorã poro waibɨarãdepema aba iru kꞌãyaara juataura beeitꞌee mãikꞌaapa norte eerepema eujã waibɨara bɨ ichi jua ekꞌari iru beeitꞌee.

⁶ Año chokꞌara wãyaakꞌãri, sur eerepema rey pacto ooitꞌee ma norte eerepema rey ome chõoda–ee pꞌanapataadaitꞌee. Ma sur eerepema reypa ichi kꞌau teeitꞌee norte eerepema reymaa miakꞌãidamerã, mãgá chõoda–ee pꞌanapataadai jĩakꞌaapa. Mamĩda pia uchia–e paitꞌee. Ma norte eerepema rey taarã ba–e paitꞌee. Ma wẽra waibɨara pai kꞌãyaara, norte eerepemaarãpa iru traicionaadaitꞌee. Iru, chi ɨmɨkꞌĩra, chi warra mãikꞌaapa chi mimiapataarã paara peekꞌoodaitꞌee.

⁷ Maapai ma wẽra ëreerãdepema chi akꞌõre pari rey beepꞌeda, ichi soldaorã ome chõonadaitꞌee norte eerepema soldaorã ome mãikꞌaapa ãra murallapa tꞌɨakꞌau bɨmãi jãri ata wãdaitꞌee. Mãgá mãgɨɨrãpa ma norte eerepema soldaorã pꞌoyaadaitꞌee.

⁸ Ãra akꞌõre waibɨa apataarã juapa metaldee ooda ateedaitꞌee Egipto eujãdee, awaraa ne–inaa pi–ia nẽedee ooda mãikꞌaapa pꞌaratꞌadee ooda ome. Ma tꞌẽepai año chokꞌara–ee wãyaarude, ma norte eerepema rey ichiakꞌau bɨdaitꞌee.

⁹ Maapꞌeda norte eerepema rey chõonaitꞌee sur eerepemaarã ome. Mamĩda pꞌoyaa–e pakꞌãri, ãpɨtee wãitꞌee ichi eujãdee.

¹⁰ ’Tꞌẽepai norte eerepema rey warrarãpa soldaorã cho–kꞌara chipꞌe atadaitꞌee waya sur eerepemaarã ome chõonadaitꞌee. Ma warrarãdepema aba ichi soldaorã ome mãgá chõonadakꞌãri, ãchi chõo wãrutamaa sur eerepemaarã eujã jõ wãdaitꞌee, to choma nɨ̃beekꞌãri, ne–inaa jõparikꞌa. Mãgá chõo wãdapa, sur eerepema rey pꞌuuru waibɨa murallapa tꞌɨakꞌau bɨmãi panadaitꞌee.

¹¹ Mãga unukꞌãri, sur eerepema rey audú kꞌĩraudariitꞌee norte eerepema rey ome. Iru ome chõode uchiaitꞌee mãikꞌaapa norte eerepemaarã cho–kꞌara pꞌanadaitꞌee mĩda, ichia ãra pꞌoyaaitꞌee.

¹² Mãgá sur eerepema reypa ma norte eerepema soldaorã pꞌoyaakꞌãri, audua beeitꞌee mãikꞌaapa ma norte eerepemaarã cho–kꞌara peepiitꞌee. Mamĩda irua norte eerepemaarã ichi jua ekꞌari taarã iru ba–e paitꞌee,

¹³ norte eerepema reypa awaraa soldaorã chokꞌaraara naaweda iru bada kꞌãyaara chipꞌe ataitꞌee perã. Maapꞌeda, año chokꞌara–ee wãyaakꞌãri, ichi soldaorã chokꞌara, arma, netꞌaa pia ome waya sur eerepemaarã ome chõonadaitꞌee.

¹⁴ ’Daniel, mãga pꞌasakꞌãri, eperãarã chokꞌara sur eerepema rey jua ekꞌariipa uchia kꞌinia pꞌaneedaitꞌee. Ichiaba pɨchi eujãdepemaarã, eperãarã kꞌachia–idaa beerã aukꞌa iru jua ekꞌariipa uchia kꞌinia pꞌanadaitꞌee. Mamĩda ãchia oo kꞌinia pꞌanɨkꞌa ooda–e paitꞌee. Mãgá pɨa kꞌãimokꞌaraa pɨkꞌa bɨde unudakꞌa pꞌasaitꞌee.

¹⁵ Maapꞌeda norte eerepema rey cheitꞌee mãikꞌaapa rampa oopiitꞌee, madeepa tꞌĩudamerã pꞌuuru murallapa tꞌɨakꞌau beede. Mãgá mãgee pꞌuuru pꞌoyaadaitꞌee. Sur eerepema soldaorã sõcharra beerãpa pida ne–inaa pꞌoyaa ooda–e paitꞌee, ãchi kꞌĩra unuamaa iru pꞌanapataarã ma pꞌuurude tꞌĩunaadamerã.

¹⁶ Ma norte eerepema reypa ichia oo kꞌiniata ooitꞌee ichia pꞌoyaadaarã ome. Apidaapa iru ome pꞌoyaada–e paitꞌee. Mãgá iru pãchi Eujã Pi–ia Bɨde beeitꞌee mãikꞌaapa ma eujã ichi jua ekꞌari iru bɨde, ichia ma eujãdepema ne–inaa ãri wãitꞌee.

¹⁷ Ma norte eerepema reypa kꞌĩsiaitꞌee soldaorã ichi jua ekꞌari beerã jõmaweda chipꞌe atapꞌeda, sur eerepemaarã ome chõonaitꞌee. Mamĩda mãga ooi kꞌãyaara, pacto ooitꞌee sur eerepema rey ome. Ichi kꞌau teeitꞌee ma sur eerepema reymaa iru ome miakꞌãimerã, mãgá chõoda–ee pꞌanapataadai jĩakꞌaapa mãikꞌaapa mãgá ma eujã ichi jua ekꞌari beei jĩakꞌaapa. Mamĩda ichia kꞌĩsia bɨkꞌa uchia–e paitꞌee.

¹⁸ Tꞌẽepai pꞌuuru pꞌusa ide pꞌanapataarã ome chõonaitꞌee mãikꞌaapa mãɨrã chokꞌara pꞌoyaaitꞌee. Mamĩda ma pꞌoyaada kꞌaurepa ichi audua beekꞌãri, ma eujãdepema soldaorã poro waibɨapa iru pꞌoyaaitꞌee mãikꞌaapa kꞌĩra nejasia beepiitꞌee.

¹⁹ Maapꞌeda ma norte eerepema rey ichi soldaorã ome ãpɨtee wãdaitꞌee ãchi eujãdee; ãchi pꞌuuru murallapa tꞌɨakꞌau beede. Mamĩda ma wãdade ma norte eerepema rey waibɨa kꞌachiade baaipꞌeda, piuitꞌee. Mãgá iru waa unuda–e paitꞌee.

²⁰ ’Ma norte eerepema rey eere awaraa rey uchiaitꞌee. Mãgɨpa ichi jua ekꞌari eujã pia iru baitꞌee. Maperã impuesto pꞌaapipari pëiitꞌee ichi jua ekꞌari beerã jõmaarãmaa ichi–itꞌee pꞌaratꞌa pꞌaapimerã. Mamĩda taarã–e rey bɨde iru piuitꞌee, chõode wã–e bɨ mĩda.

²¹ ’Ma rey pari awaraa rey uchiaitꞌee. Mãgɨ́ ne–inaa kꞌachia ooyaa baitꞌee. Awaraa reyrãkꞌa ba–e paitꞌee, rey ëreerãdeepa uchia–e paitꞌee perã. Ma awara ichi jua ekꞌari beerãpa iru awara bɨda–e paitꞌee ãchi rey beemerã. Mamĩda ãra atu pꞌanɨde, irua ãra kꞌũra bɨpa rey mimiade beeitꞌee.

²² Ichi kꞌĩra unuamaa iru pꞌanapataarã jõmaweda jõpiitꞌee, to choma nɨ̃beekꞌãri, ne–inaa jõparikꞌa. Ichiaba mãga ooitꞌee ichi ome pacto oodapꞌedaarã poro waibɨa ome.

²³ Ichi ome pacto oodapꞌedaarã kꞌũraitꞌee mãikꞌaapa ichi eere eperãarã chokꞌara–ee pꞌanadaitꞌee mĩda, ma eujãdepemaarã ichi jua ekꞌari pꞌe iru beeitꞌee.

²⁴ Awara–awaraa eujã ichi jua ekꞌari beedepema netꞌaara iru pꞌanapataarã kꞌãiwee pꞌanadakꞌãri, ãchi atu pꞌanɨde, ichia ne–inaa oonaitꞌee ichi akꞌõreerãpa wa ichi chonaarãpa pꞌoyaa ooda–e pꞌanadapꞌedaa. Ma eujãdepemaarã netꞌaa pia jãri ata wãitꞌee mãikꞌaapa ma netꞌaa ichi ome nipapataarãmaa jedeitꞌee. Ichiaba kꞌĩsiaitꞌee pꞌuuru murallapa tꞌɨakꞌau bee pꞌoyaaitꞌee. Mamĩda taarã–e nɨde mãga ooitꞌee.

²⁵ ’Ichi mãgá waibɨa, sõcharra beekꞌãri, soldaorã chokꞌara chipꞌe atapꞌeda, sur eerepema rey ome chõonadaitꞌee. Mapa sur eerepema reypa ichi soldaorã chokꞌaraara chipꞌe atapꞌeda, iru ome aukꞌa chõode uchiadaitꞌee. Mamĩda sur eerepemaarãpa iru traicionaadaitꞌee. Ma kꞌaurepa iru kꞌĩra unuamaa iru pꞌanapataarã pꞌoyaa–e paitꞌee.

²⁶ Ma rey ome mesade nekꞌopataarãpa iru traicionaadaitꞌee. Ma kꞌaurepa iru kꞌĩra unuamaa iru pꞌanapataarãpa iru soldaorã chokꞌara peepikꞌoodaitꞌee.

²⁷ Maapꞌeda ma reyrã omé mesa abaade su–akꞌɨ pꞌaneedaitꞌee. Mamĩda jĩpꞌa kꞌĩsiadaitꞌee ne–inaa kꞌachia oodaitꞌee mãikꞌaapa ãchi omeeweda seewa jaradaitꞌee. Mamĩda apidaapa ooda–e paitꞌee ãchia oo kꞌinia pꞌanɨkꞌa, atꞌãri ewari ma–itꞌee awara bɨda pa–e bairã.

²⁸ Maapꞌeda ma norte eerepema rey ãpɨtee wãitꞌee ichi eujãdee. Ateedaitꞌee ne–inaa pi–ia ma chõodapꞌedaade jãri atadapꞌedaa. Mamĩda ichi eujãdee wãde, Tachi Akꞌõre ome pacto oodapꞌedaarã ɨ̃rɨ wãitꞌee ãra kꞌachia oode. Ãra eujãde pakꞌãri, ichia jõmaweda ne–inaa kꞌachia oo kꞌiniata ooitꞌee. Maapꞌeda ichi eujãdee wãitꞌee.

²⁹ ’Ma tꞌẽepai Tachi Akꞌõrepa ewari ma–itꞌee awara bɨda pakꞌãri, norte eerepema reypa soldaorã chokꞌara chipꞌe atapꞌeda, waya sur eerepemaarã ome chõonaitꞌee. Mamĩda ma chõo pꞌoyaada–e paitꞌee ãchia naaweda oodapꞌedaakꞌa,

³⁰ occidente eerepema soldaorã barcode chedapꞌeda, iru ome chõodaitꞌee perã. Mãga oodakꞌãri, iru kꞌĩsia nɨ̃beeitꞌee. Mapa iru eere pꞌanɨɨrã pꞌeradaitꞌee mãikꞌaapa ãpɨtee jĩchoodaitꞌee. Mãga pꞌasakꞌãri, ma norte eerepema rey kꞌĩrau nɨ̃bɨpa Tachi Akꞌõrede ijãapataarã jɨrɨnaitꞌee peekꞌoodaitꞌee. Jõdee pia akꞌɨpariitꞌee Tachi Akꞌõrede ijãa amaarutaarã.

³¹ ’Maapai ichi soldaorãpa ne–inaa kꞌachia oodaitꞌee Tachi Akꞌõre tede, ma te murallapa tꞌɨakꞌau bɨ mĩda. Jaradaitꞌee mama ne–animalaarã Tachi Akꞌõre–itꞌee paanaadamerã mãikꞌaapa ne–inaa audú kꞌachia bɨdaitꞌee mãga oopatapꞌedaamãi.

³² Irua ma ijãa amaadapꞌedaarã kꞌũraitꞌee, aukꞌa mama ne–inaa kꞌachia oodamerã. Mamĩda Tachi Akꞌõre wãara kꞌawa pꞌanɨɨrãpa choopataadaitꞌee ãchia ijãa pꞌanɨde mãikꞌaapa ma reypa oopi bɨkꞌa oodakꞌaa paitꞌee.

³³ Maapai ãchi tꞌãidepema kꞌĩsia kꞌawaa beerãpa eperãarã chokꞌaraarãmaa jarateedaitꞌee. Mamĩda ma kꞌĩsia kꞌawaa beerã ũkꞌuru espadapa peekꞌoodaitꞌee; ũkꞌuru paakꞌoodaitꞌee; ũkꞌuru ãra netꞌaa pꞌe iru pꞌanɨ jõmaweda jãri pꞌe atadapꞌeda, esclavo papidaitꞌee mãikꞌaapa awaraa eujãdee ateedaitꞌee. Makꞌɨara taarã mãga oo iru pꞌanada–e paitꞌee.

³⁴ Ãra mãgá ne–inaa kꞌachiade baaidakꞌãri, eperãarã chokꞌara–e pꞌanɨɨrãpa kꞌaripadaitꞌee. Mamĩda eperãarã chokꞌara seewatapai ãra ome araa pꞌana chedaitꞌee.

³⁵ Ichiaba ma jarateepataarã ũkꞌuru jɨrɨdaitꞌee miapidaitꞌee. Tachi Akꞌõrepa mãga pꞌasapiitꞌee, ma jarateepataarã pꞌekꞌau kꞌachia wẽe pꞌaneedamerã iru ewari waibɨa ewate paru misa.

³⁶ ’Norte eerepema reypa ichia oo kꞌiniata oopariitꞌee. Audua beeitꞌee mãikꞌaapa kꞌĩsiapariitꞌee ichita akꞌõre waibɨa apataarã jõmaarã kꞌãyaara waibɨara bɨ. Audú pedee kꞌachia pedeepariitꞌee Jõmaarã Akꞌõre Waibɨa ãpɨte. Mãga oopariitꞌee Tachi Akꞌõrepa waa kꞌĩrau choo–e parumaa mãikꞌaapa iru miapirumaa, Tachi Akꞌõrepa kꞌĩsia iru bɨkꞌa ne–inaa jõmaweda pꞌasaitꞌee perã.

³⁷ Ma reypa akꞌõre waibɨarã apata apida waawee–e paitꞌee; ichi chonaarã akꞌõre waibɨarã, wẽraarãpa ɨtꞌaa tꞌɨ̃pata akꞌõre waibɨarã mãikꞌaapa awaraa akꞌõre waibɨa apataarã jida. Ma kꞌãyaara kꞌĩsiapariitꞌee ichita waibɨara bɨ jõmaarã akꞌõre waibɨa apataarã kꞌãyaara.

³⁸ Mamĩda, murallapa tꞌɨakꞌau bee jɨ̃apari akꞌõre waibɨa apata iru bapariitꞌee ichi akꞌõre waibɨakꞌa. Mãga ooitꞌee, ichi chonaarãpa mãgee akꞌõre waibɨa kꞌawada–e paji mĩda. Ma akꞌõre waibɨa apata–itꞌee teepariitꞌee nẽe, pꞌaratꞌa, mãu pi–ia mãikꞌaapa awaraa netꞌaa pi–ia.

³⁹ Awaraa eujãdepemaarã akꞌõre waibɨa apatade ijãapataarãpa kꞌaripadaitꞌee mãgee murallapa tꞌɨakꞌau beede iru kꞌĩra unuamaa iru pꞌanapataarã tꞌĩunaadamerã. Iru mãgá waaweepataarã pia akꞌɨpariitꞌee. Iru ãchi akꞌõre waibɨakꞌa iru pꞌanapataadaitꞌee perã, irua ãchi eperãarã poro waibɨarã papiitꞌee mãikꞌaapa eujã awara–awaraa ãchi jua ekꞌari bɨitꞌee ma eujã akꞌɨpataadamerã.

⁴⁰ ’Tachi Akꞌõrepa ewari ma–itꞌee awara bɨda pakꞌãri, sur eerepema rey ma norte eerepema rey ome chõode cheitꞌee. Mãpai ma norte eerepema rey sur eerepemaarã ome chõode uchiaitꞌee nãumia pa tau pꞌorepꞌorepari cherukꞌa. Ma eujã jõmaweda ũu pɨkꞌa wãitꞌee carretapa, soldaorã caballoorã ɨ̃rɨ wãpataarãpa mãikꞌaapa barcopa. Mãgá eujã awara–awaraa chokꞌara jãri ata wãdaitꞌee.

⁴¹ Ichiaba ma norte eerepema rey chõonaitꞌee pãchia Eujã Pi–ia Bɨ apatade mãikꞌaapa ma eujãdepemaarã cho–kꞌara peekꞌooitꞌee. Mamĩda iru juadeepa uchiadaitꞌee Edom eujãdepemaarã, Moab eujãdepemaarã mãikꞌaapa Amón eujãdepemaarã chokꞌara.

⁴² Irua awara–awaraa eujã chokꞌara ichi jua ekꞌari pꞌe iru beeitꞌee. Mapa Egipto eujã paara iru juadeepa uchia–e paitꞌee.

⁴³ Egiptodepema nẽe, pꞌaratꞌa mãikꞌaapa ne–inaa pi–ia jõmaweda jãri pꞌe ataitꞌee. Ichiaba Libia eujãdepemaarã mãikꞌaapa Etiopía eujãdepemaarã iru jua ekꞌari pꞌaneedaitꞌee.

⁴⁴ Mamĩda irua oriente eereepa mãikꞌaapa norte eereepa pedee jara pëidapꞌedaa ũrikꞌãri, pꞌeraitꞌee. Mãpai kꞌĩraudaipꞌeda, mãɨrã ome chõode mãikꞌaapa jõpide wãitꞌee.

⁴⁵ Mamaa wãpari ode wãrude ichi rey te ne–edee ooda bainɨ̃ bɨitꞌee pꞌusa, Tachi Akꞌõre Ee Pi–ia apata awara bɨda esajĩakꞌa. Mama piuitꞌee. Apidaapa iru madeepa pꞌoyaa kꞌaripada–e paitꞌee.