Apocalipsis 1 - Tachi Akꞌõre Pedee Chonaarãwedapema

Jesucristopa kꞌawapida

¹ Na pꞌãdade mɨ, Juanpa jara bɨ Tachi Akꞌõrepa ne–inaa kꞌawapida Jesucristomaa. Kꞌawapiji ichia na ewari ooitꞌee bɨ, Jesucristopa jõdee ichideerãmaa mãga kꞌawapimerã. Ɨtꞌariipa Cristopa pëiji ichi ángel mɨmaa, mɨ iru mimiapari perã.

² Na pꞌãdade mɨa jara bɨ Tachi Akꞌõrepa mɨmaa unupida, ichia mɨmaa jara pëida mãikꞌaapa Jesucristopa mɨmaa jarada.

³ Tachi Akꞌõrepa pia akꞌɨitꞌee na pꞌãda leerupa awaraarã taide, ichia jara pëida perã. Ichiaba pia akꞌɨitꞌee na pꞌãdade jara bɨ ũridapꞌeda, oo pꞌanɨpa aɨde ũraa bɨkꞌa, ma jõma ooitꞌee taarã–e perã.

Juanpa Ásia eujãdepema ijãapataarãmaa jarada

⁴ Mɨ, Juanpa nãga pꞌã pëiru parã Ásia eujãdepema ijãapataarãmaa, siete chipꞌepataarã chaachaa. Mɨa ɨtꞌaa iidi bɨ Tachi Akꞌõrepa parã pia akꞌɨ bapariimerã. Mãgá kꞌãiwee pꞌanapataadaitꞌee. Tachi Akꞌõre ichita bapari; ichita bapachi mãikꞌaapa ichita cheitꞌee. Mɨa ichiaba iidi bɨ Tachi Akꞌõre Jaurepa parã kꞌaripamerã. Iru jaure siete pɨkꞌa bɨ Tachi Akꞌõre su–akꞌɨ beepari kꞌĩrapite.

⁵ Ichiaba mɨa iidi bɨ Jesucristopa parã kꞌaripamerã. Iruata wãara jarapari Tachi Akꞌõrepa jara bɨ. Iruta piupꞌeda, naapɨara chokꞌai pꞌirabaiji ichita bapariitꞌee. Na pꞌekꞌau eujãdepema reyrã jõmaweda pꞌanapata iru jua ekꞌari. Iruata tachi kꞌinia iru bapari. Mapa tachi uchiapiji tachia pꞌekꞌau kꞌachia oopata jua ekꞌariipa. Mãga ooji iru waa batꞌada kꞌaurepa kurusode piukꞌãri tachi pari.

⁶ Iruata tachi ichideerã papiji ichi Akꞌõremaa pꞌaareerãkꞌa ɨtꞌaa tꞌɨ̃pataadamerã eperãarã pari. Mapa jaradáma: “Jesucristo ichita jõmaarã kꞌãyaara waibɨara bapariitꞌee.” ¡Amén!

⁷ ‘¡Ũrítɨ! Iru cheitꞌee jɨ̃ararade. Maapai jõmaarãpa iru unudaitꞌee; iru supidapꞌedaarã paara. Na pꞌekꞌau eujãdepema to bee chaa eperãarã jarajẽedaitꞌee waaweepa, irua ãchi miapiitꞌee jĩakꞌaapa ãchia pꞌekꞌau kꞌachia oopata kꞌaurepa. Mãga paitꞌee. Amén.’ (Daniel 7.13)

⁸ Tachi Akꞌõre Waibɨapa jara bɨ: —Mɨta Alfa; nejõmaata naa. Ichiaba mɨta Omega; nejõmaata tꞌẽe. Mɨta jõmaarã Waibɨa. Mɨ ichita bapari; ichita bapachi mãikꞌaapa ichita cheitꞌee.

Juanpa Jesucristo unuda kꞌãimokꞌaraa pɨkꞌa bɨde

⁹ Mɨ, Juan, parã ɨ̃pema Cristo kꞌaurepa, parãkꞌa mɨ tꞌãri a–ba bapari perã iru ome. Mɨ ichiaba parã kꞌõpꞌãyo, tachi aukꞌa wãdaitꞌee perã Akꞌõre truadee mãikꞌaapa ɨ̃raweda tachi aukꞌa choopata perã Jesude ijãa pꞌanɨde, tachi jɨrɨ pꞌanɨ mĩda miapidaitꞌee ma kꞌaurepa. Mɨ Patmos islade pëijida Tachi Akꞌõre Ũraa jarateepachi perã mãikꞌaapa Jesupa ooda jarateepachi perã.

¹⁰ Mama bɨde tomia ewate ɨtꞌaa tꞌɨ̃maa baji Tachi Akꞌõre Jaurepa oopi bɨkꞌa. Mãga nɨde kꞌãimokꞌaraa pɨkꞌadachi. Mɨ ãpɨteikꞌa eereepa ũriji eperã golpe pedeeru, trompeta golpe jĩwaaparikꞌa.

¹¹ Mãgaji: —Pꞌã́ji pɨa unuru maapꞌeda pë́iji ijãapataarã chipꞌepata bee chaa nãgɨ́ siete pꞌuurude: Éfeso, Esmirna, Pérgamo, Tiatira, Sardes, Filadelfia, Laodicea pꞌuurudee aukꞌa.

¹² Mãga ũrikꞌãri, pꞌɨrrabaiji akꞌɨitꞌee kꞌaipata mɨmaa mãga jara bɨ. Unuji lámpara bɨpata siete, awara–awaraa bainɨ̃ bɨ. Mãgɨ́ chaachaa nẽedee ooda paji.

¹³ Mãgɨ́ esajĩakꞌa unuji eperãkꞌa. Pꞌaru teesoo jɨ̃ baji. Kꞌɨrrɨde ne–inaa nẽedee ooda jɨ̃ baji. Nẽrabai baji ichi tꞌũade.

¹⁴ Ichi puda tꞌo–tꞌoo baji, oveja kꞌarakꞌa maa–e pɨrã nievekꞌa. Chi tau urua nɨ̃baji tꞌɨpɨtaukꞌa.

¹⁵ Chi bɨɨrɨ jida urua baji, bronce ɨrradakꞌãri uruaparikꞌa. Chi otau ũriji to kꞌida chaaree jĩwaaparikꞌa.

¹⁶ Ichi jua juaraare lucero siete iru baji. Chi itꞌaideepa uchiaji espada choma, kꞌĩraichaa weda pꞌewedee bɨ. Chi kꞌĩra urua nɨ̃baji akꞌõrejĩru imatꞌɨpa urua nɨ̃baparikꞌa.

¹⁷ Mɨa iru unukꞌãri, eujãde baainaji iru kꞌĩrapite mãikꞌaapa piudakꞌa baibeeji. Mãpai irua mɨ tꞌõbaiji ichi juarapa mãikꞌaapa mɨmaa mãgaji: —Pꞌeranáaji. Mɨ nejõmaata naa mãikꞌaapa nejõmaata tꞌẽe.

¹⁸ Mɨata eperãarã chokꞌai pꞌanapipari. Na pꞌekꞌau eujãde bɨde mɨ jai–idaaji. Mamĩda chokꞌai pꞌirabaiji, maadakꞌãriipa ichita bapariitꞌee. Mɨa llavekꞌa iru bɨ piudapꞌedaarãmãi ewaitꞌee. Madeepa eperãarã uchiapii mãikꞌaapa ãra kꞌaripai ichiaba chokꞌai pꞌirabaidamerã ichita pꞌanapataadaitꞌee mɨ ome. Maa–e pɨrã, kꞌinia–e pɨrã, ãra mãgá uchiapi–e paitꞌee.

¹⁹ Maperã pꞌã́ji pɨa unuru, ɨ̃rá ne–inaa wãyaa nɨ̃bɨ mãikꞌaapa ne–inaa tꞌẽepai wãyaaitꞌee bɨ.

²⁰ Pɨa unu bɨ ne–inaa Tachi Akꞌõrepa waide unupi–e pada apidaamaa: na lucero siete mɨ jua juaraare mãikꞌaapa jã lámpara bɨpata siete nẽedee ooda. Na lucero siete jara kꞌinia bɨ angeleerã siete bɨda ijãapataarã chipꞌepata siete aba–abaa akꞌɨdamerã. Jõdee jã lámpara bɨpata siete jara kꞌinia bɨ ma ijãapataarã chipꞌepatamãi siete.