NAMBABA 36 - WƖA TENIŊ

Kpaal-la Zelofihad toloo sɩ laa

¹ Gɩlɩad ŋaa Makɩɩ nanʋala nɛ, a ŋaa Manasɛ ma nihiŋ, ba kala lɩɩ Josɛf doho nɩaa tʋɔŋ nɛ. Ŋɩɩ nɛ Gɩlɩad doho nɩaa dɩa kʋhɩasɩŋ sii mʋ Mosis arɩ Iziral tɩŋŋaa sɩpaalaaraa teeŋ,

² a bʋl, “La TƖƖNA sɩ bʋla pɩ Mosis a leŋ la tɔnsɛ a kɛŋ tintee-la kpaa Iziral tɩŋŋaa, ʋ leŋe la joŋ la naambie Zelofihad kpaalɩŋ pɩ ʋ toloo nɛ.

³ Dɩ tolie-la nɛ mʋ jaa Iziral tɩŋŋaa doho dɔŋ, kpaal-la ba sɩ laa jaŋ ŋaa doho-la ba sɩ jaa kʋŋ. Ŋɩɩ jaŋ leŋ dɩ tintee-la ba sɩ kpaa pɩla muuri.

⁴ Dɩ jɩna-la la Iziral tɩŋŋaa sɩ jaŋ joŋ kʋyɔbɔɔ pɩ ba tɩŋŋaa nɛ yie, kpaal-la tolie-la sɩ laa jaŋ ŋaa doho-la ba sɩ jaa kʋŋ, ŋɩɩ jaŋ leŋ dɩ la nyɩmma doho nɩaa kpaalɩŋ muuri.”

⁵ Ŋɩɩ nɛ Mosis bʋl wɩɩ-la La Tɩɩna sɩ bʋla pʋ pɩ Iziral tɩmma-la. Ʋ sɩ, “Wɩɩ-la Manasɛ doho nɩalɩŋ sɩ bʋla ŋaa wʋtɩtɩɩ nɛ.

⁶ Wɩɩ-la La TƖƖNA sɩ bʋla nɛ ŋ-la: Zelofihad tolie-la kɛŋ wombiiŋ dɩ ba jaa baala-la ba sɩ cho nɛ, ama ba maga dɩ ba jaa ba doho-la tɩtɩa nɩaa nɛ.

⁷ Tinteeŋ kpaal-la Iziral tɩŋŋaa doho kala sɩ laa, ʋ bɩ jaŋ wuo kʋ ŋaa doho dɔŋ kʋŋ. Doho na-kala jaŋ tɩɩ ba naabalɩma tinteeŋ a kaa mʋmʋ.

⁸ Dɩ Iziral tɩŋŋaa tolo kala nɛ laa tinteeŋ kpaalɩŋ ʋ doho nɩaa tʋɔŋ, ʋ maga dɩ ʋ jaa doho-la tɩtɩa nɛ, dɩ doho kala tinteeŋ sɩ́ cholo jʋʋ doho dɔŋ kʋŋ, dɩ ŋɩɩ leŋ dɩ Iziral tɩɩna kala tɩɩ ʋ naabalɩma tinteeŋ.

⁹ Doho kala tinteeŋ kpaalɩŋ bɩ maga dɩ ʋ cholo jʋʋ doho dɔŋɔ kpaalɩŋ.”

^10-11 Ŋɩɩ nɛ Zelofihad tolie-la, ba sɩɩ yɩrɛ Mala, Tɩɩza, Hogila, Mɩlɩka arɩ Nua ŋaa ŋɩɩ La TƖƖNA sɩ dagɛ Mosis, a jaa ba nyɩmma doho nɩaa.

¹² Ba fa jaa Josɛf nanʋala Manasɛ doho nɩaa nɛ, ba kpaalɩŋ ha hɛ ba nyɩmma doho nɩaa tʋɔŋ.

¹³ Wombie-la arɩ wɩalɩŋ La TƖƖNA sɩ to Mosis lɛ a dagɛ Iziral tɩŋŋaa, bʋa-la lɛ ba sɩ hɛ Mʋab tintee-taalɩsɩ-la sɩ kpagɛ Jɔdaŋ fuo-la, Jeriko cholo nɛ ŋɩɩ.