Hebrearja 12 - O Debleskro Drom 2021 (Sinte)

O Dewel hi i latcho dad menge

¹ Kanna dikah, bud bud menshe patsan, te hi kowa tchatcho, hoi o Dewel penas. Mer ham gar kokres, kai patsah. Doleske hunte kras har jon kran, un mukas gar tele te nashas ap o Debleskro drom, hoi glan mende hi. Te tchiwas lauter tele, hoi kamell men pale te rikrell! Ninna hunte tchiwas o tchilatchepen tele, hoi kamell men te taprell.

² Te dikas ap o Jesus Kristeste! Kowa anas men ap o Debleskro drom, un djal glan mende, bis te wah pash leste. O Jesus Kristo meras ap o trushel. Ninna te his kowa i ladj leske, las lo kau merepen ap peste. Job djinas, pal kowa well i bari bacht ap leste. Un kanna hi lo beshdo ap o Debleskri tchatchi rig.

³ Dikenn, hawo tchilatcho koowa i tchilatche menshe ap leste kran, te wenn tumer gar khino an tumare djia, un te atchenn soreles an o patsepen!

⁴ Me djinau, tumer kamenn gar, te well o tchilatchepen o rai pral tumende. Ninna te was tumenge pharo, te penenn ‘na-a’ ap o tchilatchepen, meran doleske gomme gar.

⁵ Ma bistrenn kol laba, hoi rakras o Dewel peskre tchawenge an o dji: Dikenn mire tchawe, kowa hi tumenge mishto, te dap tumen i phagi. Te tchingrau ap tumende, ma nashenn mandar!

⁶ Kones o Dewel o djijestar kamella, kowa lell ninna lestar i phagi. Un koon well leskro tchawo, koles dell lo ninna dawa.

⁷ Hi mishto tumenge, te lenn lestar i phagi. Rikrenn kowa win! O Dewel krell tumentsa har i dad peskre tchawentsa. Prindjrenn tumer jekes, koon gar peskro dadestar i phagi las?

⁸ I tsele Debleskre tchawe djinenn i tsiro, kai lan le lestar i phagi. Tumer te djinenn kowa gar, palle han gar leskre tchatche tchawe.

⁹ Har tchawe hams, dan men mare dada i phagi. Un mer hunte shunam ap lende. Kitse budeder hunte shunas ap maro dadeste an o bolepen, te djiwas.

¹⁰ Mare dada ap i phub dan men i phagi, hoi dukas men i tikno tsiro, jaake har jon penan penge, te hi kowa menge mishto. O Dewel, te dell lo men i phagi, hi kowa tchatchepah menge mishto. Job kamell, te was mer latcho un tchatcho, jaake har job hi.

¹¹ Ap ko tsiro, kai lah i phagi, kamah kowa gar. Na-a, kowa dukell men. Pal ko tsiro haiwah, kowa his menge mishto. Un mare djia wenna pale bachtelo, un mer djiwah budeder an o tchatchepen glan o Debleste, har glan ko tsiro.

Djiwenn glan o Debleste!

¹² Doleske awenn pale soreles! Hadenn tumare wasta pale pre, hoi khino wan! Krenn tumare herja pale soreles, an lende buder kek soor hi!

¹³ Atchenn ap o tchatcho drom, te wenn kolla, kai gar sorelo hi, sasto an o patsepen, un te perenn le gar ko dromestar tele!

¹⁴ Krenn lauter, te well tumen kek tchingepen i wawar menshentsa! Tchiwrenn o tselo tchilatchepen dran tumende win! Kek mensho dikell o Debles, te mukell lo o tchilatchepen an peste te djiwell.

¹⁵ Denn jak, te tchiwell kek o Debleskro latchepen ap i rig! Denn jak, te djal kek tchilatcho rakepen mashkral tumende trujel, un krell o patsepen bud patslendar paash! Sawo rakepen hi har i tchilatcho chuchur, hoi krell kolen nasselo, kai les chana.

¹⁶ Denn garda, te krell kek tumendar wi-ladjedo koowa, witar gar, te djiwell jek har o Esau, koleske o Debleskro latchepen tchi moldo his! Job his o phureder tchawo, un les hi o tchatchepen, te lell lo peskro dadeskro brawlepen pal koleskro merepen. Was i diwes, kai was les bok, un job bikras ko tchatchepen, te lell lo i tcharo latcho chapen.

¹⁷ Tumer djinenn, hoi pal kowa was. O Esau nai kras buder tchi wawartchandes. Ninna te rowas lo soreles glan peskro dadeste, was lo ap i rig tchiddo. Leskro dad nai rakras buder gar koi bacht pral leste win, hoi hunte lals lo.

¹⁸ Shunenn, mire phrala! Tumaro tsillo, kai wenn khetne o Debleha, hi gar ko emligo har pash i Israelitarja. Jon djan pash i berga Sinai, un pash i jag, hoi dikan le nai. Trul lende his kali rat un i sorelo ducho phurdas.

^19-20 Jon shunan i bashepaskri, kai jek dren phurdas. Ninna shunan le i sorelo rakepen, hoi penas: Hakeno, kai taprell koi berga i wastentsa, hunte well i barrentsa maredo. Ninna ko viecho hunte merella, hoi kote djala. Har jon kol laba shunan, djas kowa lenge jaake an o dji, te mangan le o Mosestar, te wenn kol sorele laba buder gar ap lende rakedo.

²¹ Kowa lauter, hoi i menshe kote dikan un shunan, kras len jaake dareno, te penas ninna o Mose: Man hi sawi daar, te trissenn mire herja.

²² Kowa lauter dikan tumer gar. Na-a. Tumaro tsillo, kai wenn khetne o Debleha, hi ap i berga Zion an o bolepen. Kote hi o foro o djido Deblestar tardo, o newo foro Jerusalem. Kote hi bud bud serja bolepangre, kai sharenn o Debles.

²³ Kote wenna o Debleskre tchawe khetne. Lengre laba hi an o bolepen pre tchinlo. Kote hi o Dewel, kai rakrell o tchatchepen win pral i tsele menshende. Kote hi ninna kol tsele patsle, kai meran un kolen o Dewel pash peste las.

²⁴ Kote hi ninna o Jesus, maro rakepaskro, kai kras menge o newo drom, te djiwas khetne o Debleha. Job meras menge, un leskro rat las mari doosh mendar. O Jesuseskro rat hi feteder har o Abeleskro rat. Har o Abel maredo was, das leskro rat gole pal i phagi pral o Kain. O Jesuseskro rat lell mari doosh mendar.

Shunenn ap o Debleste!

²⁵ Denn jak, te shunenn ap o Debleste, kai ap tumende rakrella! Har job ap i phub ap i phure Israelitarja rakras, kaman le gar ap leste te shunell, un leskri choli was pral lende. Kitse budeder well o Debleskri choli pral mende, te shunah gar ap leste, kai dran o bolepen rakrella.

²⁶ An o phuro tsiro trissas i phub, har o Dewel rakras. Kanna penell lo: An ko tsiro, hoi wella, trissell i phub i wawar kopo, un gar i phub kokres, na-a, ninna o bolepen trissella.

²⁷ Kol laba i wawar kopo sikrenn men: Kowa, hoi kerdo was, – o bolepen un i phub, – kowa atchell gar soreles tardo un well krik lino. Palle atchell kowa, hoi soreles tardo hi, un hako tsiro atchella.

²⁸ O Debleskro them an o bolepen, kai khere ham, atchell soreles tardo, un kote djah mer. Doleske parkras men pash o Debleste, shunas ap leste, daras lestar un kras, hoi job kamella!

²⁹ Ma bistrenn, maro Dewel hi jaake har i soreli jag!