Markus 16 - O Evangelio Jezus Kristusester pala Markus 1912 (Sinte)

DEŠŠOBTO KAPITLO.

¹ Her ta gejes kome o kurko glanopral, kerden Maria Magdalena, Maria o Jakobester dai, ta Salome hakerlai kova ta gejeslen koi ta makjen les drin.

² Ta jon vejena o ersto dives i kurkester ani taisirlakro paši handakeske, her ta gejes o kham pre.

³ Ta jon phenden telavaverkend. Kon čidela men kova bar o vuderester kava handakeste nikli?

⁴ Her ta dikhen len koi, dikhena jon ta his o bar nikli čido, ta job has baro.

⁵ Her ta gejes jon ani handako, drin dikhenlen i murš paši čači bešdo, ridlo i parno ripenenca, ta jon darden pen.

⁶ Kava ta phendes apo lenge: Darena tume gar! Tume rodena Jezuses o Nazaretester o trušuldeskero; job hi preštardo, job hi gar kate; dikhena o kunč, kai čiden len les.

⁷ Džahas tume koi, phenena lesker sikermangerende ta o Petruseste: Job džala tume glan pale Galilea, kote veles ta dikhen les, her ta phendes job tume.

⁸ Jon ta gejen len vri, ta našen penge i handakester nikli, ta o dar ta triserpen taperden len, ta jon phenden kenkes čomoni; ta jon daren pen le.

⁹ Her ta štejeslo taisirlakro o ersto dives i kurkester pre, vejeslo sikeder i Maria Magdalenake, kai traderdeslo later efta bengen vri.

¹⁰ Kaja džejes koi, ta phendes les kalenge, kai his len paša leste, kala kai kaiden ta ronden pen.

¹¹ Her ta hunden jon, ta hi lo džido ta veles later dikhamen, pacena les gar.

¹² Ta pala sikerdeslo job ani vaver trupeste duienge lender api drom, kai ta džejen pen apo them.

¹³ Ta jon džejena koi, ta phenden les o vaverende; jon ta pacjen lenge či.

¹⁴ Palduno sikerdes pes job kola dešjekenge, kai bešjen paši chamaskero; job ta čingerdes lenger bipacepen, ta lenger midžiko dzi, vel ta pacenle kolenge gar, kai dikhen les, her ta has lo preštardo.

¹⁵ Ta job phendes apo lenge: Džan tume koi ani celo phub, ta rakerena o sastobičerpen hake džene.

¹⁶ Kon ta pacela ta hila boldo, kava vela hilderdo, kon ta pacela či, kava vela gar hilderdo.

¹⁷ Kalen kai pacena veles kome kaja botenge kandlo: Ani miro lab tradena jon bengen vri, ta rakerena o neve rakerpenca.

¹⁸ Hadervena sapia pre, ta pijena čomoni merdes, pala kerene les či; api naselenge vel ta čiden jon lenger vast, ta jon velen saste.

¹⁹ Ta o rai Jezus, her ta rakerdeslo lenca, veles pre‐ando ani bolapen, kote bešelo paši čači o Devleste.

²⁰ Jon ta džejen koi, ta rakerden api celo phub, ta o Rai has lenca ta zordeslo o lab druchi kola botenge.