ROMETE 1 - Thuhun Thah (BSI)

Chibaibuuhna

¹ Paul, Jesu Khrist suaah, sawlleh hi diinga kouh, Pathian tanchinpha diinga sehtuam in,

² (Hu tanchinpha Pathian in malaipeha zawlneite kama lehkha siangthou a ana chiamsa,)

³ Tahsa daan a David suan a piang, a Tapa Jesu Khrist i Lalpa uh;

⁴ Huleh sianthouna hagaulam daan a misi laha kipan a thohkiitna in silbawltheihna toh Pathian Tapa ahih a kilatsah tungtaang;

⁵ A min jiaha nam chin laha mi ginna lama thumangsah diingin amah vangin hehpihna leh sawlleh hihna i tangta uhi;

⁶ Hute lahah nanguh zong Jesu Khrist a kouhte na hi uhi;

⁷ Pathian deihtah, misiangthou hi diinga kouh, Rome khua a um zousiahte kawmah; i Pa uh Pathian leh Lalpa Jesu Khrist kawma kipan hehpihna leh hamuanna na kawmvah um hen.

Paul in Rome khua a zin a tupna

⁸ Khovel pumpi a na ginna uh a thangsuaah jiahin na bawnva tunga ka kipaahna thu, a masapenin Jesu Khrist jalin ka Pathian kawmah ka soi hi.

⁹ Ajiahchu ka haamteina chinah tawplouin na min uh ka lou ngiitngeet chih A Tapa tanchinpha a ka hagaua a nna ka tohsah zing Pathian chu ahung heetpihtu ahi.

¹⁰ Tu beeh a na kawmva hungna diing Pathian lemsah a zin hun lemtaang ka muh teiteina diinga ngen in.

¹¹ Ajiahchu na detna diing va hagaulam silpiah bangaha ka hung piah theihna diingin nanguh hung muh ka ut mahmah hi.

¹² Huchu na ginna uleh ka ginna a, nang uleh kei i kihamuantuah theihna diingin ka chihna ahi.

¹³ Huleh unaute, Jentel dangte kawma ka tohgimna gah ka muh taah mahbanga nang u’laha zong ka muh theihna diingin na kawmvah tampi vei hung ka tumta (huleh tu dongin daalin ka um zing) chih na heet louh uh ka deih sih hi.

¹⁴ Grikte leh meelmahte kawmah bat ka nei hi; mipil leh mipilloute kawm a zong.

¹⁵ Huchi'n nanguh Rome khua a umte kawm a zong tanchinpha ka theihtawpa soi diingin ka kiman zing hi.

¹⁶ Bang jiahin ahiai i chih leh tanchinpha chu ka zumpih sih hi; ajiahchu a gingta photmah diingin hichu hutdamna diinga Pathian silbawltheihna ahi; Judate diingin ahi masa a, huleh Grikte diingin zong ahi.

¹⁷ Ajiahchu huah gintaatna diingin ginna in Pathian dihtatna a kilang a; Midihtat chu ginna in a hing diing, chih gelh bangin.

Jentelte giit louhdan phuanna

¹⁸ Ajiahchu thutah dihtat louhna a daal mite Pathian ngaihsah louhna leh dihtat louhna zousiah tungah Pathian lungthahna chu vaan apatin ahung kilangta hi;

¹⁹ Pathian in a heetsahtaah jiahin Pathian tanchin heet diing chu amahuh ah suhlatin a umta hi.

²⁰ Ajiahchu khovel siam chiila kipana a silmuhtheih louhte, a kumtuang silbawltheihna leh a Pathianzia natan chiang silsiamah a kilang a, chiantah a muh in a um hi; hujiahin suanlam diing a nei sih uhi.

²¹ Ajiahchu Pathian he ngalin Pathian bangin a paahtawi sih va, kipaahthu zong a soi sih uh; himahleh sil thulimloute a ngaihtuah zota va, a lungtang ngol u’chu ahung mialta hi.

²² Pil kisain mingol ahung suahta va,

²³ Sithei lou Pathian loupina chu sithei mihingte, vate, keenglinei sate leh a boh a vaah ganhingte limah a tangsahta uhi.

²⁴ Hujiahin Pathian in amah uchu a sapum uh zumhuaitaha kibawltuah diing leh, a lungtang uh ut zawng banga sil niin a bawl uh phalin a umsanta hi.

²⁵ Hute’n chu Pathian thutah zuau a tangsah in a siamtu sangin, a silsiam bia in, a nna a tohsah zota uhi, a siamtu chu kumtuang a phattaah ahi. Amen.

²⁶ Hukhu jiahin Pathian in zumhuaitaha a huuh uh phalin a umsanta hi; ajiahchu a numeite uh nasanin zong a pianpih umdan ngeina uh daan lou banga um diingin a kibawl limdang veu uhi.

²⁷ Hutobangmahin pasalte’n zong numei zatdan ngeina tawpsanin huuhin a kienlah va, pasal leh pasal kilawmloutahin a kibawl va, a tawndih louh man muh diing uchu amahuh ah a kimuh uhi.

²⁸ Huleh a lungsim va Pathian a heet ut louh jiahun Pathian in sil kilawmloute bawl diing a, a deih louh zawng lungsim neih phalin a umsanta hi.

²⁹ Dihtat louhna zousiah, kingaihna zousiah, giitlouhna zousiah, duhaamna zousiah, kimuhdahna zousiaha dim in: thangsiatnate, tualthahnate, kinialnate, kihemnate, mi siatna diing ngaihtuahnate in a dim va,

³⁰ Thuguuh soihaatte, misoisiathaatte, Pathian mudahte, simmoh haatte, kiliansahte, kisatheite, sil gilou pandohtute, nulepa thu mangloute,

³¹ Heetsiamna neiloute, thuchiam botsete, pianpih lungsiatna neiloute, hunlehai neiloute, khotuahna neiloute ahi uhi.

³² Hutobang sil bawlte chu sitaah ahi chih Pathian vaihawmna he ngalin, amahuh chauh bawl zong hilouin, midang hutobang bawlte zong a kipaahpih uhi.