JOHN I 1 - Thuhun Thah (BSI)

Kumtuang hinna Jesu ah suhlata a um

¹ A chiil apat a um, ka jahsa uh, ka mit va ka muhsa uh, ka etsa uh, huleh ka khutun zong a thamsa, hu hinna Thu chu;

² (Hu hinna chu a kilangta a, huchu ka muta va, ka heetpih uh, huleh hu kumtuang hinna Pa kawma um, ka kawmva suhlata um chu na kawmvah ka hung hilh uhi).

³ Hu ka muhsa uleh ka jahsa u’chu na kawmvah ka hung hilh uhi, nangun zong na hung kipawlkhawmpih theihna diingun; huleh tahzetin eiuh kipawlkhawmna chu Pa toh, a Tapa Jesu Khrist toh ahi.

⁴ Huleh na kipaah uh a kimtheihna diingin hi thute na kawmvah ka hung gial uh ahi.

Pathian toh kipawlkhawmna chu sual tawpsan ahi

⁵ Huchi'n hichu a kawm apat a ka jah uh, huleh na kawmva ka hung hilhsawn uh thuhaah chu ahi, Pathian chu vaah ahi a, amah ah mial mawngmawng a um sih hi.

⁶ Amah toh ka kipawlkhawm chi ngal a, mial a i um inchu zuau i soi a, huleh thutah zong i jui sih hi.

⁷ Hizongleh amah vaah a a um banga ei zong vaah a i um leh khat leh khat kipawlkhawmna i nei a, huleh a Tapa Jesu Khrist sisanin sualna zousiah apat ahung silsiang hi.

⁸ Sualna ka nei sih i chih inchu eimahle eimah kihem i hi a, huleh thutah eimah ah a um sih hi.

⁹ I sualnate i phuan inchu, i sualnate ngaidam diing leh, dihtat louhna zousiah apat hung silsiang diingin amah chu a muanhuai in a dihtat ahi.

¹⁰ Sualna ka nei sih i chih inchu, amah mizuau i hisah a, huleh a thu zong eimah ah a um sih hi.