JOHN 14 - Thuhun Thah (BSI)

Pa kawm tunna lampi

¹ Na lungtang uh mangbangsah sih un; Pathian na gingta uh, Kei zong hung gingta un.

² Ka Pa innah umna tampi a um; um lou hileh ka hung hilh ta diing hi. Nanguh diing a mun bawl a chiah diing ka hi.

³ Huleh ka chiah a, nanguh diing a mun ka bawl leh ka hung kiit diing a, ka kawmah nanguh ka hung la diing; ka umna a nanguh zong na um theihna diingun.

⁴ Khoia ka chiah diing na he va, a lampi zong na he uh, a chi a.

⁵ Thoma in a kawmah, Lalpa, khoia na chiah diing ka he sih uh; a lampi bangchi'n ka he diviai? a chi a.

⁶ Jesu’n a kawmah, Kei lampi leh, thutah leh, hinna chu ka hi; keimah a pailou in koimah Pa kawm a tung ngei sih hi.

⁷ Kei hung he hile uchin ka Pa zong na heta diing uh. Tua kipan amah na he va, muh zong na muta uhi, a chi a.

⁸ Philip in a kawmah, Lalpa, Pa chu keiuh hung musah in, huchi'n keiuh diingin ahuntawh diing, a chi a.

⁹ Jesu’n a kawmah, Hitanveipi na kawmah ka um a, huchi'n zong na hung he nai sih maw, Philip? koipouh kei hung muin Pa a mu ahi; bangchidan a, Pa chu kei uh hung musah in, na chih ahiai mah?

¹⁰ Kei Pa ah ka um a, huleh Pa keiah a um chih gingta lou na hiai mah? Na kawmva ka thusoite, keimah thuin ka soi sih a, hizongleh Pa keia um in, ama’n sil a bawl veu hi.

¹¹ Kei Pa ah ka um a, huleh Pa keiah a um chih hung gingta un; ahihlouhleh silbawlte jiah beehin hung gingta un.

¹² Chihtahzetin, chihtahzetin, ka hung hilh ahi, Koipouh kei hung gingta inchu ka silbawlte ama’n zong a bawlve diing a, huleh hite sanga loupizaw zong a bawl diing, ka Pa kawma ka chiah diing jiahin.

¹³ Huleh ka min a na nget photmah uh huchu ka bawl diing, Pa Tapa a paahtawia a um theihna diing in.

¹⁴ Ka min a bang aha na nget uleh huchu ka bawl diing.

¹⁵ Kei na hung lungsiat uleh ka thupiahte jui un.

Hagau piah diing chiamna

¹⁶ Huleh Pa ka ngen diing a, ama’n nanguh Hamuantu dang ahung pe diing, na kawmva kumtuang a um diing in.

¹⁷ Thutah Hagau ngei chu; khovel in amah a nei thei sih, ajiahchu amah a mu sih va, he zong a he sih uh; ahihvangin nangun chu amah na he uh; ajiahchu na kawmvah a um a, na sung vah a um diing ahi.

¹⁸ Ha muanna beiin ka hung nuse sih diing; na kawmvah ka hung diing hi.

¹⁹ Tomchakhat nungin khovel in kei ahung mu nawn sih diing; hizongleh nangun chu na hung mu diing uh; ajiahchu kei ka hing a, nanguh zong na hing diing uh.

²⁰ Hu ni chiangin kei ka Pa ah ka um a, nanguh keiah na um va, huleh kei nanguh ah ka um chih na he diing uh,

²¹ Koipouh ka thupiahte nei a, jui chu, kei hung lungsiat ahi; huleh koipouh kei hung lungsiat chu ka Pa lungsiatin a um diing a, ke'n amah ka lungsiat diing a, a kawmah ka kilaah diing, a chi a.

²² Iskariot hiloupen, Judain a kawmah, Lalpa keiuh kawma kilaah a, khovel kawma na kilaah louh diing bangchidan ahiai, a chi a.

²³ Jesu’n a dawng a, a kawmah, Mi koipouh in ahung lungsiat leh ka thu a jui diing; huleh ka Pa’n amah a lungsiat diing a, a kawmah ka hung diing va, amah toh ka umkhawm zing diing uh.

²⁴ Koipouh ahung lungsiat lou in ka thusoite a jui sih; thu na jahte uh keimah a, ahi sih a, Pa ahung sawlpa a ahi zaw hi.

²⁵ Na kawmva ka um taahdih sungin hi thute na kawmvah ka soi hi.

²⁶ Hizongleh Hamuantu, Hagau Siangthou, Pa in ka min a ahung sawl diingin, ama’n sil zousiah nanguh ahung hilh diing a, huleh thu na kawmva ka soisa photmah nanguh ahung hedohsah diing hi.

²⁷ Ha muanna ka hung nuutsiat hi, keimah hamuanna ka hung pia hi; khovel in a piah bangin ke'n nanguh ka hung pe sih. Na lungtang uh mangbangsah sih unla, lau zong lausah sih un.

²⁸ Ka chiahmang diing a, na kawmvah ka hung kiit diing, chia na kawmva ka soi na zata uh. Kei na hung lungsiat unchu Pa kawmah ka chiah diing ka chih jiahin na nuam diing uh; ajiahchu ka Pa kei sangin a lianzaw hi.

²⁹ Tuin ahung tun ma in ka hung hilhta hi, ahun hung tun chianga na gintaat theihna diingun.

³⁰ Tukalsiah na kawmvah thu tampi ka soi nawn sih diing hi; ajiahchu hi khovel lal hungpah diing ahi a, ama’n keimah ah bangmah a nei sih hi.

³¹ Hizongleh Pa ka lungsiat a, thu ahung piah bangin ka bawl veu hi chih khovel in a heet na diingun ahi. Thou un, hi a kipanin i chiah diing uhi.