Tobit 13 - Pijin Deuterocanon

Tobit hemi singsing fo preisim God

¹ Tobit hemi singsing olsem, ?Preisim God hu hemi stap olowe, preisim hem hu hemi rul ovarem evrisamting.

² Hem panisim yumi, an hem sore kam long yumi, hem sendem yumi long wol blong olketa man dae, den hemi tekem yumi kamap moa from grev. No eniwan save ranawe from paoa blong hem.

³ Pipol blong Israel, yufala mas preisim God long ae blong olketa pipol blong narafala kantri. Nomata hemi mekem yufala stap long deferen ples,

⁴ hemi somaot bikfala paoa blong hem long yufala. Nao letem evriwan hu i laef herem preis blong yufala. Lod nao hemi God blong yumi olowe.

⁵ Nomata hemi panisim yufala fo olketa ravis wei blong yufala, hemi bae sore long yufala an tekem yufala kambaek from olketa deferen kantri wea hemi mekem yufala fo stapkam long olketa.

⁶ Yufala mas barava tanebaek long hem long haat an laef blong yufala. Yufala mas tinghevi long hem an obeim hem. Long diswan nao, bae hem tane go long yufala an hemi helpem yufala, an bae hemi no haed long yufala. Yufala mas tingim olketa samting wea God hemi duim fo yufala, an preisim hem long haat blong yufala. Preisim Lod hu hemi stret, an tinghae long King hu hemi stap olowe. Nomata mi stap long deferen kantri, bae mi preisim Lod olowe, an bae mi tokabaotem bikfala paoa blong God long olketa pipol blong narafala kantri hu i duim nogud samting. Lusim sin blong yufala, an duim wanem God hemi talem. Maet hemi kaen long yufala an sore kam moa long yufala.

⁷ Mi preisim God blong mi, an mi hapi tumas long paoa blong hem, an ful laef blong mi hemi mekhae long King long heven.

⁸ Letem evriwan talemaot bikfala paoa blong hem, an singsing fo preisim hem long Jerusalem.

⁹ Yu Jerusalem, yu bikfala holi taon blong God, bae hemi panisim yu fo evri sin blong olketa pipol, bat bae hemi sore kam long olketa hu i duim stretfala samting.

¹⁰ So, yu mas tengkiu long Lod bikos hemi gud tumas! Preisim King hu hemi stap olowe. Bae mifala bildimbaek moa Tambu haos blong yu, an evri pipol blong yu bae olketa hapi moa. Jerusalem, letem Lod hemi mekem evriwan blong yu i stap farawe fo hapi moa, an letem Lod hu i lukaftarem olketa pipol wea olketa safa bae olsem go-go kasem las de.

¹¹ Jerusalem, bae laet blong yu hem saenaot fo evriwan long wol. Evri pipol long farawe kantri bae i kam long yu. Olketa pipol ya, bae i kam fo mekehae long God blong yu. Bae olketa tekem kam olketa presen blong olketa fo givim Lod hemi bikfala King long heven. Olketa pipol long plande jeneresin bae i hapi an singsing fo preisim God falom olketa rod blong yu, an nem blong yu bae stap strong olowe olsem biktaon wea God nao hemi siusim.

¹² God bae hemi mektrabol fo kasem evriwan hu i agensim yu, an evriwan hu i spoelem wolston blong yu, an brekemdaon olketa taoa blong yu, an bonemdaon olketa haos blong yu. Bat evriwan hu i tinghae long yu, bae God hemi blesim olketa olowe.

¹³ Jerusalem, yu mas hapi bikos olketa pipol blong yu wea olketa stret long ae blong God. Olketa ya hu i stap kam long narafala ples, bae i kam long yu, an bae olketa preisim Lod hu hemi stap olowe.

¹⁴ Evriwan hu i lavem yu, an hapi fo lukim yu garem gudfala laef. Evriwan hu i krae wetem yu, bae olketa hapi, an hapi blong olketa bae hemi no save finis.

¹⁵ Mi preisim Lod wea hemi bikfala king.

¹⁶ Bae olketa bildimbaek moa Jerusalem, an bae hemi kamap hom blong Lod olowe. Jerusalem, bae mi hapi tumas taem olketa grani blong mi i lukim dat yu luknaes tumas, an bae olketa tengkiu long King long heven. Olketa geit blong yu, bae olketa mekem long nambawan ston wea hemi blu an nambawan ston wea hem grin, an bae olketa mekem wolston blong yu long evri ston wea saen fogud an praes blong hem hemi dia tumas. Olketa taoa blong yu bae olketa mekem wetem gol, an wolston blong yu bae olketa mekem long nambawan gol tu ya.

¹⁷ Olketa rod blong yu bae olketa laenem spesol ston wea hemi saen fogud an hemi dia tumas.

¹⁸ Saon blong olketa hapi singsing blong yu, bae i kamaot long olketa geit blong yu. Insaet evri haos blong yu bae olketa pipol bae singaot an bae olketa sei, ?!Preisim Lod! Preisim God blong Israel!? Jerusalem, bae God hemi blesim olketa pipol blong yu, an bae olketa preisim holi nem blong hem olowe nao.? Hem nao en blong singsing blong Tobit fo preisim God.