Tobit 12 - Pijin Deuterocanon

Enjel Rafael hemi talem olketa hu nao hem

¹ Taem disfala fist blong marit hemi finis, Tobit hemi kolem Tobias an hemi talem long hem, ?San blong mi, Tobias, yu no foget fo peim disfala man wea hemi go wetem yu long Media, an yu mas peim hem ekstra seleni long wanem yu givim?.

² Tobias hemi askem dadi blong hem olsem, ??Dadi, hao mas seleni an olketa samting nao bae mi givim long man ya? Hemi gud nomoa long mi sapos mi givim haf blong olketa samting wea mitufala tekem kam long hia.

³ Yu lukim, hem nao hemi tekem mi kambaek gud long hom, hem tu hemi tekem kambaek olketa seleni hemi stap long Gabael, an hemi ronem disfala nogud devol long waef blong mi, an hem tu hemi kiurim ae blong yu wea hemi blaen. ?Sapos hemi olsem, hao mas samting nao bae mi givim long hem??

⁴ Tobit hemi talem long hem olsem, ?Tru tumas, hem fitim fo yu givim haf long olketa samting wea hemi helpem yu fo tekem kam.?

⁵ Nao Tobias hemi kolem Rafael an hemi sei long hem, ?Hem stret sapos yu tekem haf blong olketa samting wea yu helpem mi fo tekem kam, mekem yu gobaek gud long ples blong yu.?

⁶ Distaem, Rafael hemi stanap an hemi kolem tufala seleva an hemi talem tufala, ?Yutufala mas preisim God, an yutufala mas talemaot long olketa evri pipol long olketa gud samting wea hemi duim fo yutufala, mekem olketa tu mas tingting hae long God an olketa mas singsing hae long nem blong hem. Yutufala tu mas no fogetem fo preisim nem blong hem.

⁷ Hemi gud fo yumi haedem wanem olketa bikman blong yumi olketa talem long yumi, bat wanem God hemi duim long yumi, yumi mas storim long evri ples yumi go, mekem evri pipol long evriwea bae olketa mas preisim hem an tingting hevi long hem. Sapos yutufala mekem olketa samting gud an hemi stret, bae no eni nogud samting bae kasem yutufala.

⁸ Olketa pipol wea olketa save prea olowe, an herem gud toktok blong God, an helpem olketa no garem enisamting, hemi gud winim wanfala man wea hemi garem plande samting, an hemi duim samting wea hemi no stret. Olketa pipol wea olketa givim samting long olketa pua pipol, hemi gud winim man wea hemi putum gud plande seleni.

⁹ Olketa wea i givim gif long olketa pipol, bae sevem laef blong olketa an bae hemi aotem sin blong olketa. Olketa wea i givim gif long olketa pua pipol, bae olketa garem ful laef.

¹⁰ Bat olketa hu i stap long sin an mekem olketa nogud samting, olketa enemi long laef blong olketa seleva.

¹¹ ?Mi talem long yutufala finis, wanem olketa bikman long wol talem, hemi gud fo yufala fo haedem, bat olketa samting wea God hemi duim, yufala mas talemaot long olketa pipol. Nao, mi mas talem klia long yutufala evrisamting, an mi bae no haedem enisamting long yutufala.

¹² Tobit, taem yu an Sera prea long God, mi nao mi tekem evri prea blong yutufala go long ae blong God. Mi duim olsem tu taem yu go berem olketa wea olketa dae.

¹³ Long disfala de wea yu stanap long ples blong kaikai, taem ya yu no kaikai yet, an yu go berem man hemi dae ya, God hemi sendem mi fo traem yu.

¹⁴ God hemi sendem mi kam tu fo kiurim ae blong yu, Tobit, an givim laef long Sera dota inlo blong yu from bikfala safa wea hem garem.

¹⁵ Mi nao Rafael, mi wanfala long olketa sevenfala enjel wea olketa stanap olowe long ae blong God. Mifala redi fo duim olketa waka blong hem.?

¹⁶ Disfala taem Tobit an Tobias seksek no gud long fraet an tufala foldaon long graon.

¹⁷ Bat Rafael hem tok olsem, ?Yutufala no fraet. Evrisamting bae hemi oraet nomoa. Tingim olowe fo preisim God.

¹⁸ Hem nao hemi laekem mi fo kam fo helpem yutufala. Mi no kam falom tingting blong mi seleva. So hemi gud yutufala mas singsing fo preisim God long hol laef blong yutufala.

¹⁹ Taem yutufala lukim mi kaikai, yutufala tingse mi wanfala tru man hemi kaikai. Nomoa. Lukluk blong mi nomoa, hemi olsem wanfala man wea hemi kaikai.

²⁰ Taem yutufala stap yet long disfala wol, yutufala mas preisim Lod God an tengkiu long hem. Distaem mi mas gobaek nao long God hu hemi sendem mi kam. Yutufala mas raetemdaon evrisamting wea hemi hapen long yutufala.?

²¹ Bihaen, Rafael hemi goap an hemi lus long skae nao. Taem Tobit an Tobias i stanap kam, tufala no lukim hem nao.

²² Tufala stat singsing fo preisim God, an talem tengkiu fo evri bikfala samting wea God hemi duim fo olketa, an tingimbaek taem enjel Rafael hemi stap wetem olketa.