Judit 5 - Pijin Deuterocanon

Holofenes hemi holem miting fo faet

¹ Taem Holofenes, bikman blong ami long Asiria, hemi herem dat olketa long Israel i redi fo faet wetem hem, an olketa satem evri smol rod, an mekem wolston long olketa taon antap long olketa maonten, an olketa satem tu evri rod long vali,

² Holofenes hemi kros tumas. Den hemi kolem evri bikman blong Moab, an evri bikman blong ami long Amon, an evri bikman olketa stap saet long Mediterenian Si.

³ An hemi tok olsem long olketa, ?Yufala evriwan stap long Kenan, hemi gud yufala mas talem long mi abaotem olketa pipol ya wea olketa stap antap long olketa maonten. ?Watkaen biktaon nao olketa stap insaet? ?Waswe, ami blong olketa plande tumas? ?An wea nao olketa tekem strong blong olketa? ?An hu nao disfala king wea hemi lidim olketa?

⁴ ?Waswe nao, olketa seleva nomoa olketa kantri long west, olketa les fo sarenda long han blong mi??

Toktok blong Akio

⁵ So Akio hemi wanfala bikman blong Amon, hemi stanap an tok olsem long Holofenes, ?Plis bikman, sapos hemi gud long yu, yu mas lisin long mi. Bae mi talem yu trufala stori abaotem olketa pipol ya long olketa maonten wea hemi fes go wea yu putumap olketa haostent blong yu. Bae mi no laea long yu.

⁶ Olketa pipol ya, an olfala grani blong olketa, stat kam long Babilonia.

^7-8 Olketa lusim prea blong olfala grani blong olketa, an olketa wosipim wan tru God long heven. Bihaen, olketa pipol wea i stap wetem olketa i kros long olketa an raosim aot olketa, bikos olketa les fo wosipim god blong olfala grani blong olketa. So olketa ranawe go long Mesopotemia, an olketa stap long taem tumas long dea.

⁹ Den bihaen, God blong olketa hemi talem long olketa fo lusim Mesopotemia, an go long Kenan. Taem olketa stap long dea, olketa garem plande gol an silva an buluka.

¹⁰ Samfala taem bihaen, hanggre hemi kavam evriwea long lan long Kenan, an olketa go long Ijip. Olketa stap long dea taem kaikai hemi plande fitim olketa. An taem olketa stap long dea, namba blong pipol blong olketa hemi grou, an olketa plande tumas wea no eniwan save kaontem olketa.

¹¹ So king blong Ijip hemi no laekem olketa an hemi mekem olketa safa nogud, an olketa waka olsem slev fo hem fo mekem brik.

¹² Den olketa prea long God blong olketa, an hemi herem prea blong olketa, an hemi sendem nogud samting fo olketa long Ijip. Pipol long Ijip olketa kros an ronem olketa Israel aot from ples blong olketa.

¹³ Bat God blong olketa Israel, hemi mekem Red Si hemi drae.

¹⁴ An den hemi lidim olketa go long maonten long Saenae an Kades-Banea. So olketa Israel ronem evri pipol wea olketa stap saot long Kenan.

¹⁵ Olketa go stap long lan blong laen blong Amoa, an kilim dae evri pipol long Hesbon, an olketa krosim Jodan Riva, an olketa go tekem evri lan wea i stap long olketa maonten.

¹⁶ Olketa ronem pipol long Kenan, Peres, Jebus, an Sekem, an evriwan long Gigas. Bat distaem hemi long taem tumas nao olketa Israel i stap long olketa maonten ya.

¹⁷ Long taem, laef blong olketa i gud an olketa no mekem eni sin long ae blong God, olketa stap gud an olketa garem plande gud samting, bikos God blong olketa hemi no laekem fo lukim pipol olketa stap long sin.

¹⁸ Taem olketa no falom toktok blong hem, olketa enemi blong olketa i kam an winim olketa long faet, an tekem olketa olsem slev long narafala ples. An olketa spoelem nao Tambuhaos blong God blong olketa, an pipol long narafala ples nao olketa stap long ples blong olketa.

¹⁹ Distaem, olketa gobaek moa long God blong olketa, an olketa lusim nao ples wea olketa stap long hem olsem slev. An olketa gobaek long lan blong olketa, an tekembaek moa disfala biktaon long Jerusalem, wea Tambuhaos hemi stap. Nao olketa go stap moa long olketa maonten wea no eniwan bin stap long olketa fo long taem.

²⁰ Bos, sapos yumi save faendemaot olketa pipol ya olketa sin long ae blong God blong olketa, hemi gud fo yumi fo faet wetem olketa, den bae yumi save winim olketa.

²¹ Bat sapos olketa no duim eni nogud samting long God blong olketa, hemi gud yumi no go faet wetem olketa. God blong olketa bae hemi helpem olketa, an yumi bae sem nogud long ae blong evri pipol long wol ya.?

²² Taem Akio hemi finis fo toktok, evri pipol stanap raonem haostent blong Holofenes, olketa kros nogud an olketa stat fo toktok bikfala. Olketa advaesa blong Holofenes, an olketa long Moab, an olketa man stap saet long Mediterenian Si, olketa evriwan laekem Akio fo hemi mas dae nao.

²³ An olketa tok olsem, ??Wanem nao bae yumi fraetem long olketa Israel ya? Olketa no strong ya, hemi no fitim olketa fo sevem olketa seleva.

²⁴ !Yumi mas go long olketa! Ami blong yu, Holofenes, hemi bikfala grup tumas, bae hemi isi nomoa fo yumi kilim olketa.?