Judit 3 - Pijin Deuterocanon

Olketa traem fo mekpiis wetem Nebukadnesa

¹ Evriwan long olketa ples ya olketa sendem go samfala man blong olketa fo traem fo mekpiis wetem Nebukadnesa.

² Olketa go an tok olsem long hem, ?Mifala wakaman blong yu, King Nebukadnesa, mifala kam fo sarenda long yu. Yu duim long mifala wanem yu laekem fo duim.

³ Evri haos blong mifala, an olketa lan an gaden an buluka blong mifala, an olketa haostent blong mifala, evrisamting ya blong yu nao. Yu waka wetem olketa olsem yu laekem.

⁴ Olketa ples blong mifala wetem olketa pipol blong mifala olketa blong yu nao. Yu save duim enisamting yu laekem fo duim.?

⁵ Taem olketa man fo tekem toktok go kasem hem an olketa talem hem,

⁶ Holofenes hemi stanap, an hemi lidim daon ami blong Nebukadnesa long saet long Mediterenian Si. Hemi putum samfala man fo gadem olketa taon wea olketa putum wolston long olketa, an hemi siusim samfala lokol man fo helpem hem long faet.

⁷ Evri pipol insaet long olketa taon ya, an olketa stap kolsap, olketa dekoret long flaoa an bitim dram an dans falom.

⁸ Bat Holofenes hemi go an spoelem evri ples blong olketa fo prea, an hemi katem daon evri tambu tri blong olketa. Hemi duim olsem, bikos Nebukadnesa hemi talem long hem fo spoelem evri god blong olketa pipol long dea, mekem evri pipol olketa mas wosipim nomoa Nebukadnesa, an prea long hem olsem wanfala god.

⁹ Bihaen, Holofenes hemi go long levol graon long Jesreel kolsap long Dotan, wea hemi fesim go long hae graon long Jiuda.

¹⁰ An hemi putumap olketa haostent, long midol long Geba an Saetopolis. Long dea Holofenes hemi stap fo wanfala mans, mekem hemi faendem kaikai fo olketa man long ami blong hem.