Tïddø 5 - WÄNYI KWËRØ 2011

Yï Ko nyi Wɑ̈dhi Köngø Yøw

¹ Nyi kedhí yij Kengø. Lɑ̈w kedhi be lïngø, kibøli muujø ki gëdhhì ni tyëng-ɑ wɑ̈thi gen nøg møg-ɑ kwïj wøw kinni ge gøgg-ɑ rɑj.

² Lebí ko nyi jwɑni, wɑlɑ̀ yï ko nyi köngi ki pyëwí kì bøli Jwøk, ki gïn pɑ cuggi gwøgø yi yïn. Mɑ́ Jwøk ying-ɑ mɑl, o yï ying-ɑ piny, wiy kwøbbí nyi bëëd ge nøg.

³ Rumm-ɑ gïïr nyii kɑ̈nø ki lɑ̈g mø rijjø, o kwøbb-ɑ gïïr nyi wëgg-ɑ dhɑnhø kwøb ki kwøbbi dhëëgø.

⁴ Keløg e dɑ gïn könggí Jwøk, jwɑɑn ki gwøgø ceth, mɑ́ pyëwe pɑ nyi med ki dhëëgø.

⁵ Lɑ̈w ke cöög yï pɑ köngi kibøli ke köngí ki gïn pɑ cuggi gwøgø yi yïn.

⁶ Rií ko wëggí kïdhi yij orøg yi lebí, o yï cöög yï pɑ kööbø kì bøli ókwëri Jwøk kinni, yï ɑ́wɑ̈dh-ɑ kwøb yøw. Ede Jwøk ɑ wëggí mɑgø yi liny ki yïn, o gwøgí bëne gø rënye?

⁷ Bong dyër kì ri ngenyi lɑ̈g geki ngenyi dwøg, ceg Jwøk ki böggø.

Bong Gïndøj kì ri Nënnì

⁸ Keløg ngɑn wɑnge cɑn ólidh yi yïn e orujø yi ngɑn-ɑ jyɑ̈gø, o bong dyër geki gøggi dyër, yï ko ngɑ̈ng yi møgɑni, mɑ́ ngɑn-ɑ dwøng ojɑɑgø yi ngɑn megø me dwøng kibøle, o dɑ ngɑn megø me dwøng kibøli gen bënn.

⁹ Cɑgg ɑ́ rɑ̈dh, nyi yiel-ɑ yi gïg-ɑ cyeg kì pinye.

¹⁰ Ngɑn mɑɑr ngyëny, pɑ nyi yɑ̈ng yi ngyëny, nɑ ngɑn mɑɑr dhög ceth, o menɑni bong gïndøj kì ree thyew.

¹¹ Ke ngënyi kɑ̈rí, tyëng-ɑ cyɑ̈mø ceg-ɑ ngënyø thyew. Gïn-ɑ yod yi yïn, bɑ ngɑ̈nyí wøw kinni yïí dɑ kɑ̈r.

¹² Ngeti gwøg nyii nenø ki neni dwøng, cɑgg e yɑ̈ngø wɑlɑ̀ nuti. De tyëngkɑ̈rì pɑ nyi neni yi rummi jɑmmi gen.

¹³ Yɑ ɑ́lïdhi ki gïnrɑj kì kömi piny, kinni ji nyi cung-ɑ piny ki ngyëny møg-ɑ ógwøg gen gïn-ɑ ódwɑddi yi gen kì bøli keny megø,

¹⁴ kɑ ngyënyyɑni nyii lɑ̈ɑ̈nyø, kɑ dhɑnhø nyii döngø ki cingge, kɑ ojɑdø ki gïn lɑg yi wɑ̈de kì bɑnge.

¹⁵ Dhɑnhø nyi døg e nɑ kɑ ɑ́bëëne wɑ̈g kì yij meye; nyi døg e cyɑ̈dh-ɑ nøw, bong gïn nyi kɑ̈l yi en kì kömi piny kì ri jɑmm-ɑ ɑ́lem yi en.

¹⁶ Nënni e bong gïndøj me yod yi dhɑnhø kì bɑng gwøge, den-ɑ́ yømø yøw, nyi kedh nɑ kɑ ɑ́bëëne ceth. Bong gïn kɑ̈l yi en kì ri gïg-ɑ ɑ́gwøge.

¹⁷ Bëëdee bëne kì kömi piny thumi ɑ́ muudhø, kí kïïmø, kí liny geki rɑ̈ɑ̈m dëllì.

¹⁸ Gïn-ɑ ɑ́yodɑ bɑ kinni: gïn-ɑ døj bɑ kinni, o dhɑnhø cyɑ̈me, o mɑ̈dhe, o pyëwe mede ki gwøng-ɑ ɑ́mëggii yi Jwøk, kì yethi cyɑ̈ngg-ɑ nøg møg-ɑ bëëde kì kömi piny, mɑ́ menɑni bene köögi miee.

¹⁹ Ngɑn-ɑ ɑ́thödhi yi Jwøk ki kɑ̈r, kɑ gø wëgge tɑ̈bbø kì yij kɑ̈rɑni, o pyëwe mede ki pïde, bëëde pyëwe med ceth, mɑ́ menɑni bɑ muunyi Jwøk.

²⁰ Wiy bëëd e bong gïn rømme kì ri nøgi runne kì kömi piny, mɑ́ e ɑ́thödhi yi Jwøk ki medi pyëw.