Tïddø 4 - WÄNYI KWËRØ 2011

¹ Codhe, ɑcigɑ lïïdh ri runy-ɑ ruj ji kì kömi piny bëne. Ge ceg-ɑ ywøg, de bong ngɑn lug gen, mɑ́ tyëng-ɑ ruj gen teg.

² Aköbbɑ riɑ kinni, yɑ ɑ́mɑg yi mud ki tyëng-ɑ ɑ́thøw, mɑ́ ge lɑ̈w kibøli tyëng-ɑ nëënø.

³ De tyëng-ɑ nuti nywølø cøn lɑ̈w kibøli ji-ɑ kyeelø, mɑ́ rɑjj-ɑ gøggi kì kömi piny nuti liidh gen.

⁴ Ayodɑ en thyew kinni ji nɑ̈g-ɑ ri gen ki gwøg kipe kɑ̀ mod gen tyëng-ɑ kyeelø, menɑni bong gïndøj kì ree. Nɑ ngwej kì bɑng yømø.

⁵ Dhëg cingge nyi bøødhe’ ree, kɑ ree wëgge ywɑjø yi kɑ̈j.

⁶ Cɑgg ɑ́ kinøw, gïncɑm-ɑ cɑm ki mër e nøg, lɑ̈w kibøli gïncɑm-ɑ ngenyø, e yod-ɑ ri nɑ̈gi dhɑnhø ree ki gwøg. Menɑni nɑ ngwej kì bɑng yømø.

⁷ Yɑ ɑ́yïddi thyew ki gïjø me bong gïndøj kì ree kì kömi piny.

⁸ Dɑ dhɑnhø me bëëdø kete, e bong wɑ̈de, de nɑ̈g-ɑ ree ki gwøg, o pɑ kööbø kinni ɑ́ men ɑ ólɑg jɑmm-ɑ per gen mɑ̈ɑ̈nɑ riɑ medi pyëw? Menɑni bong gïndøj kì ree thyew, o bɑ yuu bëëdø me rɑj.

⁹ Ji ɑ́ryew lɑ̈w kibøli dhɑnhø ɑ́kyel, mɑ́ ge ócuggø rëbø kì kömi gwøg, kɑ gwøngɑni obëënø e døøj.

¹⁰ Mɑ́ ke pɑ̈ɑ̈dh ngɑn, tïng-ɑ mɑl yi ngɑn-ɑ kyeelø. De rɑɑj ke pɑ̈ɑ̈dh ngɑn-ɑ bɑ ɑ́kyel, mɑ́ e bong ngɑn-ɑ ótïngii mɑl keny-ɑ ópɑ̈ɑ̈dhe.

¹¹ Kenyi buddi ji ɑ́ryew kì kej ɑ́kyel, dëlli gen nyii lënhø, de nget ɑ́kyel dële ólënh-ɑ́ɑ̀ dï?

¹² Ji ɑ́ryew ócuggø tyɑmi ngɑn pɑ di lwɑ̈ng ki tyɑmø yi dhɑnhø ɑ́kyel. Thøl-ɑ yethe bɑ ɑ́dɑ̈g cöde teeg.

¹³ Nyelɑwøb me wïje pel, cɑgg wɑnge cɑn, lɑ̈w kibøli rɑ̈nh-ɑ yöø, o wïje nøg, e pɑ yïëy köbbø,

¹⁴ mɑ́ ócuggø bëën wɑ̈g kì ød mɑg, e pödh-ɑ wïj kwøm, cɑgg e ónywøøl ɑ kɑl me wɑnge cɑn kì kelli kɑ̈lli rɑ̈ɑ̈dhø.

¹⁵ Kɑ yɑ orumø kì ri ji-ɑ bëëdø kì kömi piny keny, kɑ yodɑ kinni kelli gen dɑ nyelɑwøb men-ɑ ókwɑny kwøøm rɑ̈ɑ̈dhø.

¹⁶ Tyëng-ɑ jɑɑge ócuggø bëëdø ge pɑ cuggi kwɑnø, de keny-ɑ óthøwe, bong ngɑn-ɑ ópøjjii këti. Menɑni bong gïndøj kì ree. Nɑ ngwej kì bɑng yømø.