Odhe 14 - WÄNYI KWËRØ 2011

Kwɑjji Isrɑil yi Odheyɑ̀

¹ Dwöög wun yï Jwøng-ɑ Ácwɑ̈ɑ̈j, Jwøøg wun, wun ɑ tyëng Isrɑil. Wu ɑ́tɑ̈ɑ̈y piny-ɑ yi orøøg wun.

² Døøg wun yï Jwøng-ɑ Ácwɑ̈ɑ̈j, kɑ wu kööb wun kinni, “Kɑ̈ɑ̈l kerri orøøg wøn wɑ̈g, kɑ kwɑ̈jji wøn yïëëy. Wiy leny-ɑ lejji wøn yïn ki dhøggi wøn, bëëde ɑ́ gëdhhì møg-ɑ mëggi yïn yi wøn, de pɑth ki gëdhhì møg-ɑ ngɑlli.

³ Wø pɑ yiel yi Acuur, wø pɑ yiel këti yi kyënyi liny. Wø pɑ cigi kwøb këti kinni, ‘Møg bɑ jwöggi wøn!’ Mɑ́ ge bɑ gïg-ɑ ɑ́gwøg ki cing. Mɑ́ yïn yï ketí Jwøng-ɑ Ácwɑ̈ɑ̈j, ɑ yïí nyi yïddi yi kïj ki gïn-ɑ jɑ̈ddii.”

Thödhi Isrɑil ki Bëëdø Me Nyɑ̈n yi Jwøng-ɑ Ácwɑ̈ɑ̈j

⁴ Jwøng-ɑ Ácwɑ̈ɑ̈j okööbø kinni, “Jiɑ ódwöögɑ yïɑ. Ge ómɑɑr yi yɑn ki pyëwɑ bëne; pyëwɑ pɑ cigi bëëdø e rɑɑj ki gen.

⁵ Yɑ óbëëdø kì yï tyëng Isrɑil yɑ nɑ kødh cwir. Ge ódhɑ̈y ni okøggi lum. Byerri gen óniyeeng piny, ni byerri yenhi Lubnɑn.

⁶ Bɑ̈ddi gen ópedh yi gen, ge ógöögø ge nɑ ólɑm me myëër, Ge óbëëd yømi gen med ni yømi yenh sɑndɑl mø Lubnɑn.

⁷ Ge ódwöög tïbɑ. Ge ókɑ̈gø ki byel këti, ge óngënyi ni nywøli oløg. Per gen ótëngi ni møgi oløøg Lubnɑn.

⁸ Bong gïn-ɑ ógwøg yi tyëng Isrɑil ki ngïjjì këti; kwɑ̈jji gen óløøgɑ, kɑ ge korrɑ; Ge óbëëdø kì tïbɑ, mɑ́ yɑ nɑ yɑdh me yïthhe pɑ nyi wew. Gyëdhh-ɑ yï gen bënn kɑ̈ɑ̈l-ɑ yïɑ.”

Ngøli Kwøb

⁹ Ngɑn wïje pel, mïdhe kwøb møg. Ngɑn nyi lïngø, yode møgɑni, mɑ́ yëthi Jwøk bɑ óbödhh. Yëthɑni cyɑ̈dh-ɑ yi tyëngtir. De tyëngorøg ópɑ̈nhø kì yethi gen.