Nyudhø 1 - WÄNYI KWËRØ 2011

¹ Kwøb møg, bɑ møg-ɑ ɑ́cïb cingi Yëso Mesiy yi Jwøk, o bɑ̈ngge nyudhe gïg-ɑ ójwɑn cwöbø, ɑöre wëywöne kinni o møgɑni nyudhe Jøn,

² møg-ɑ ɑ́lidh yi Jøn gï ɑ́kwøbe bënn. Menɑni bene wöön-ɑ kɑ̈ɑ̈l yï Jwøk, kí dyër men-ɑ ɑ́nyodh yi Yëso Mesiy.

³ Ngɑn rɑng wɑ̈nyø men kì bøli teedø ree ódi gyëdh, o tyëng-ɑ ólïngi møg-ɑ töng kì yij wɑ̈nyø men, kɑ møg-ɑ ógwedø kì yije mïdhi yi gen, ri gen dɑ gyëdh.

Mɑ̈dhi Akuddi Kɑnïsɑ̀ Gɑ Ábïryew

⁴ Wɑ̈nyø men kɑ̈ɑ̈l-ɑ yïɑ yɑ Jøn, yɑ gwëd-ɑ ɑkuddi kɑnïsɑ̀ gɑ ɑ́bïryew kì modïri Ásiyɑ̀. Wu óthödhi ki dhwɑ̈ng geki mër yi ngɑn-ɑ ɑ́bëëd e nud cøn, o nud ɑnɑn, o bɑ en ɑ óbï, geki wëy ɑ́bïryew møg-ɑ cungi kì bøli kwøme,

⁵ kí Yëso Mesiy, cwɑ̈ng-ɑ dyër, o bene ngɑn-ɑ ɑ́kwøng ki tugø kì yij thøø, ɑ jɑɑg rɑ̈nhi kömi piny. Wɑ mɑɑr yi en, kɑ wɑ pɑ̈ɑ̈de wɑ̈g kì yethi töjji orøg ki thøwe.

⁶ Kɑ wɑ gwøge wɑ bɑ pödhi ókwër møg göggi Wïye Jwøk; o bɑ en ɑ lejji; o en ɑ yïe di tegø ɑnɑn gïti ɑtheer! Amen.

⁷ En ɑ bï ɑnɑn e kɑ̈ll-ɑ wɑ̈thi pøøl! Ólidh yi dhɑnhø bëne; o ólidh thyew yi tyëng-ɑ ɑ́cwøbii ki tøng. Kɑ ywøg yi ji bënn kì kömi piny. Møgɑni óbï kinøw ceth. Amen.

⁸ Kɑ Wë Jwøk Áyïmø okööbø kinni, “Yɑn ɑ mɑl, o yɑn ɑ cyɑ̈n.” En ɑ nud ɑnɑn, en ɑ ɑ́bëëd e nud cøn, o bɑ en ɑ óbï.

Cɑ́ri Mesiy

⁹ Yɑ bɑ Jøn, ómï wun, o kɑ̀ bëëdɑ yɑ bɑ ngeti Yëso, wɑ ngïïn ɑ kyeel ki orɑng-ɑ nyi bï kömi tyëng Pödhe. Yɑ ɑ́cïb yij muji Pɑtmøs kɑ per kɑ ɑ́pwönyɑ kwøbbi Jwøk geki dyër men-ɑ ɑ́nyodh yi Yëso.

¹⁰ Kɑ Wëy bï-ɑ kömɑ kì cyɑ̈ɑ̈ng Wë, kɑ yɑ olïngø ki cwɑg mø kɑ̈ɑ̈l ngɑ̈jɑ, ge nɑ ywøøg kɑng.

¹¹ Kɑ cwɑggɑni okööbø kinni, “Gweed gïg-ɑ nenni yi yïn yij wɑ̈nyø, ke ge ör yï ɑkuddi kɑnïsɑ̀ møg-ɑ kɑ̈ddi: Epɑsos, Semirnɑ̀, Pergɑmum, Theyɑtirɑ̀, Sɑrdïs, Pilɑdelpiyɑ̀ kí Lɑwdikiyɑ̀.”

¹² Kɑ riɑ wirɑ, o yɑ lidhɑ ngɑn-ɑ kööbø ki yɑn, kɑ yɑ lidh-ɑ teggi lɑ̈mbɑ̈ɑ̈ ɑ́bïryew mø bɑ dhɑb,

¹³ o dïdyëri gen dɑ gïjø me ni dhɑnhø, me rugø ki ɑ́ywödh me wɑ̈dhi ri tyelle piny, kí wëni dhɑb me ween en ɑ́ngɑne,

¹⁴ o yëyyi wïje tɑr ge nɑ yëyyi dyel wɑlɑ̀ ge nɑ ɑ́piy, o bøle ce lyel ɑ́ mɑc,

¹⁵ tyelle ceg-ɑ orɑ̈ng ni ngyënyø dilɑl men-ɑ ólenyø kidøøj kɑ yoj, o cwɑgge lïngi ge nɑ luuli pïg rïngi piny kì wïj kït.

¹⁶ Cingi kyëje dɑ kyell ɑ́bïryew, o dhøge dɑ pilø me bɑ̈lle ryeet bedh, o bøle rɑ̈nggø nɑ cɑ̈ng kenyi yeere.

¹⁷ Keny-ɑ ɑ́lidhɑ en, kɑ yɑ ceg-ɑ pɑ̈dhi dhøggi tyelle yɑ nɑ ngɑnthøø. Kɑ yɑ nywɑle ki cingi kyëje, ɑkööbe kinni, “Yï ko böggi! Yɑn ɑ mɑl, o yɑn ɑ cyɑ̈n.

¹⁸ Yɑn ɑ nëënø! Yɑ ɑ́bëëd yɑ thøø, de yɑ ónëënø ceth gïti ɑtheer. Yïɑ dɑ tegø kì kömi thøø, geki pödhi tyëngthøø.

¹⁹ Gwed gïg-ɑ nenni yi yïn cyee; gen ɑ gïg-ɑ nud ɑnɑn, kí møg-ɑ ócwöb.

²⁰ Gïn-ɑ wɑngi yi kyell ɑ́bïryew møg-ɑ cingi kyëjɑ, geki teggi lɑ̈mbɑ̈ɑ̈ bɑ kinni: kyell ɑ́bïryew bɑ wëywödd mø ɑkuddi kɑnïsɑ̀ gɑ ɑ́bïryew, o teggi lɑ̈mbɑ̈ɑ̈ bɑ ɑkuddi kɑnïsɑ̀ møgɑni.