Nɑum 1 - WÄNYI KWËRØ 2011

¹ Men bɑ wööni Jwøk kipe Ninɑwɑ̀, møgɑni ɑ́nyudhi Nɑum jɑl Elköc ge nɑ lɑ̈g.

Mɑgi Jwøng-ɑ Ácwɑ̈ɑ̈j yi Liny ki Ninɑwɑ̀

² Jwøng-ɑ Ácwɑ̈ɑ̈j bɑ Jwøk me pëddi ki ɑter, tyëng-ɑ bɑny kwøbbe nyi cɑye’ cɑyø; tyëngmɑ̈ɑ̈nø nyi cɑye’ cɑyø ki rɑ̈ji pyëwe.

³ Jwøng-ɑ Ácwɑ̈ɑ̈j pyëwe pɑ nyi jwɑn rënyø, o yïe dɑ tegø me dwøng, o ngɑn-ɑ ɑ́bɑ̈jji pɑ nyi wiy yi en gø pɑ cɑye. Keny-ɑ cyɑ̈dhi yi Jwøng-ɑ Ácwɑ̈ɑ̈j, nyi kwödd-ɑ yi ɑtunø, o pøøl bɑ tør tyelle.

⁴ Nɑɑm omelø nyi köbbe köbbø kɑ othwøwø kɑ nɑ̈mm-ɑ thønhø gï nyi göjje dwönø. Piny Bɑcɑn ɑ́thwøw. Kïti Kɑrmel ɑ́göög ki ɑyɑw, kɑ okøggi Lubnɑn othøø.

⁵ Kïtt-ɑ døngø nyii kïïrø kì bøle, kɑ kïtt-ɑ thønhø onøyø kì bøle. Piny nyi ceg-ɑ onhɑ̈nh kenyi bëën Jwøng-ɑ Ácwɑ̈ɑ̈j; kömi piny kí ji-ɑ yije bënn ceg-ɑ kïïrø.

⁶ Á men ɑ cuggi cung kì bøle, kɑ̀ rënyi pyëwe ki menteg? Linye lyel nɑ mɑc, kɑ tuggì nyi nyønge, kɑ ge ogöögø ki búr.

⁷ Jwøng-ɑ Ácwɑ̈ɑ̈j døj, jie nyi kore korø kì cyɑ̈ɑ̈ng rɑj, tyëng-ɑ nyi yömmi yïe, nyi kongge’ konggø.

⁸ De tyëng-ɑ nyi pëmø, ómud yi en ki bɑɑyø, tyëngmɑ̈ɑ̈nø ócyeede yij muudhø.

⁹ Á kipe ngø ɑ nywɑ̈ggu dhøggi wun Jwøng-ɑ Ácwɑ̈ɑ̈j? Wu ónɑ̈g yi en. Bong ngɑn nyi pyem dhøge ki tyel mø gïïr.

¹⁰ Wu órɑ̈b yi mɑc ni koodh geki lum-ɑ thwøwø!

¹¹ Ninɑwɑ̀, yijí ɑ́bëën wɑ̈g yi dhɑnhø me yije pɑ̈ng yi rummì, men gøggi gïgrijjø, me rumø kipe göggi Jwøng-ɑ Ácwɑ̈ɑ̈j ki rɑj.

¹² Jwøng-ɑ Ácwɑ̈ɑ̈j jie, tyëng Isrɑil ɑ́köbbe kinni, “Cɑgg ɑ́ kɑ̀ bëëd tyëng Acuur ge teg, o ge gïïr, ge ótyëg ki nɑ̈gø. Wun ɑ jiɑ, wu ɑ́göjjɑ orɑng me dwøng, de wu pɑ cigɑ cɑyø.

¹³ Anɑn ɑcebbi Acuur ókɑ̈ɑ̈lɑ wɑ̈g kì muddi wun, wu ógöönyɑ wɑ̈g kì yethi töjjì.”

¹⁴ Møg-ɑ ɑ́kwøb yi Jwøng-ɑ Ácwɑ̈ɑ̈j kipe tyëng Acuur ek: “Yï gen óbong kwɑrr møg-ɑ ólɑg kɑ̈jji gen. Ngïjji jwöggi gen møg-ɑ yethi kenggi gen órënyɑ. Acuur ógwøøgɑ ɑ́ rörri ji, mɑ́ e pɑ myëër ki bëëdø e onëënø.”

¹⁵ Ngeti wöödø ɑ bï ɑcɑ̀, e cyɑ̈dh-ɑ́ɑ̀ wɑ̈thi kïttì, e kɑ̈ll-ɑ wöndøj! Bï-ɑ be kwøbi wööni tyɑ̈mø! Tuug yïn ɑ Yeudiyɑ̀, gwøg møg-ɑ ɑ́köngí Jwøk cøn, mɑ́ kömí pɑ cigi pɑ̈ɑ̈rø yi tyëngrijjø. Ge ɑ́thumi kinni tweet!