Mt 4 - WÄNYI KWËRØ 2011

Pɑ̈nyi Yëso yi Cethɑn

¹ Codhe, ɑpeej Yëso pɑ̈l yi Wëykwërø kun pɑ̈nyii yi Cethɑn.

² Kɑ ree twöne ki gïncɑm ki cyɑ̈ng pyɑ̈r ɑ́ngwen, ɑmɑgii yi kɑ̈j.

³ Abëën Cethɑn, kɑ gø köbbe kinni, “Keløg yï bɑ Wɑ̈d Jwøk, köbbí tuggi kïttì møg, o ri gen løg gen gïncɑm.”

⁴ Kɑ Yëso ólöggø kinni, “Bɑ ɑgwed kinni, ‘Pɑth ki gïncɑm kete ɑ nyi mïdhi dhɑnhø e onëënø, den-ɑ́ møg-ɑ kwøb yi Jwøk bënn.’ ”

⁵ Codhe, ɑkïdhi Yëso Yerusɑlem yi Cethɑn, kɑ gø cïbe oledh Kengø,

⁶ ɑköbbe gøn kinni, “Keløg yï bɑ Wɑ̈d Jwøk, leeng rií piny, mɑ́ e bɑ ɑgwed kinni, ‘Jwøk wëywödde óköbbe o yï ógɑm yi gen ki cinggi gen, kipe tyellí ópög yi kït.’ ”

⁷ Aköbbii yi Yëso kinni, “Bɑ ɑgwed thyew kinni, ‘Wöw, Jwøgí ko rɑɑng.’ ”

⁸ Akïdhi Yëso mɑl wïj kït me bɑ̈r yi Cethɑn, kɑ pödhhi kömi piny bëne nyudhe gøn, geki myërri gen.

⁹ Kɑ gø köbbe kinni, “Møg bënn ómëggɑ yïn keløg rií bøødhí piny, kɑ yɑ mɑl yi yïn.”

¹⁰ Aköbbii yi Yëso kinni, “Kedh Cethɑn! Mɑ́ e bɑ ɑgwed kinni, ‘Wør Wöw Jwøgí, kɑ mɑllí e kete kete.’ ”

¹¹ Codhe, ɑwiyii yi Cethɑn, kɑ wëywödd bï-ɑ be kɑ̈llii.

Cɑ̈gi Yëso ki Gwøge kì Gɑlelì

¹² Keny-ɑ ɑ́lïng Yëso kinni, i Jøn ómɑgø, ɑkedhe Gɑlelì.

¹³ Nuti bëëdø kì Nɑdhɑreth, de ɑ́kedh-ɑ be bëëdø kì Kɑpernɑum kì buti Tɑɑy Gɑlelì kì piny Dhebulun geki Nɑptɑlì.

¹⁴ Møgɑni ɑ́gwøg, o møg-ɑ ɑ́kwøb yi Icɑyɑ̀ jɑltöng pɑ̈dhi gen kɑ̈jji gen kinni,

¹⁵ “Yïn ɑ piny Dhebulun kí piny Nɑptɑlì, wun ɑ kö yuu-ɑ kedhi nɑɑm omelø, kì løøg Nɑm Urdun, eni Gɑlelì piny pödhh-ɑ kyeelø!

¹⁶ Tyëng-ɑ bëëdø kì yij muudhø ge ólïdhi ki cɑr me dwøng. Kömi tyëng-ɑ bëëdø kì yij muudhi thøø ómëëny yi cɑr.”

¹⁷ Bøli kenyɑni ɑ ɑ́cɑ̈gi Yëso ki pwönyi wööne kinni, “Yewi wun ki orøøg wun, mɑ́ Pödhi Jwøk cyɑ̈gi.”

Cwøli Jømɑy Ángwen yi Yëso

¹⁸ Keny-ɑ ɑ́cyɑ̈dhi Yëso kì thɑ̈ngi Tɑɑy Gɑlelì, ɑlïdhe ki nyiimëëg ɑ́ryew, Sɑymøn (ɑ cwøl ɑ́ Pïtør) geki Andrø ómen, ge ópyëjjø ki bøy, mɑ́ ge bɑ yïdd.

¹⁹ Kɑ ge köbbi yi Yëso kinni, “Bïu bɑngɑ, o wu løgɑ jømɑy ki ji.”

²⁰ Awiy gen bøyyi gen piny, kɑ ge løg-ɑ bɑnge.

²¹ Kɑ ɑ́dhwödhe kì kenyɑni, ɑlïdhe ki nyiimëëg ɑ́ryew møøgø; gen ɑ Yɑgob geki Jøn wɑ̈ddi Dhebedì, ge ying-ɑ yij morkɑb geki Dhebedì wïyi gen, ge pyël-ɑ bøyyi gen. Acwøle gïn.

²² Kɑ wïyi gen wiy gen yij morkɑmɑni, ɑløg gen bɑng Yëso.

Pwönyi Yëso kí Cïïje, kí Yïëne ki Rɑ̈ɑ̈m Dëllì

²³ Kɑ Yëso ócyɑ̈dhø kì myërri Gɑlelì bënn, e ópwönyø kì sinɑgøgg, e töng-ɑ per Wöndøj men-ɑ kööbø kì ri Pödhi Jwøk. Kɑ ji mø gïïr yiel yi en ki rɑ̈ɑ̈m dëllì, kɑ tyëng-ɑ bɑ pùdh gwøge.

²⁴ Kɑ pere tɑɑy-ɑ yij Suriyɑ̀ bëne, kɑ tyëng-ɑ dëlli gen rɑ̈mø kïdhi yïe, kí møg-ɑ ri gen di wëyrijjø, kí pùdh, kí ji-ɑ dëlli gen dwɑnyø. Kɑ gï yiele bënn.

²⁵ Kɑ ji mø gïïr ólugø kì bɑnge, ge kɑ̈ɑ̈l-ɑ Gɑlelì kí kɑ̈dd-ɑ pyɑ̈rø, kí Yerusɑlem, kí Yeudiyɑ̀ kí myërr-ɑ løøg Nɑm Urdun.