Mt 3 - WÄNYI KWËRØ 2011

Pwönyi Jøn Jɑljwɑ̈g

¹ Yethi cyɑ̈nggɑni ɑ ɑ́kedhi Jøn Jɑljwɑ̈g yij pɑ̈ɑ̈l Yeudiyɑ̀, kɑ ócɑ̈gø ki pwönyø kinni,

² “Yewi wun ki orøøg wun, mɑ́ Pödhi Jwøk cyɑ̈gi.”

³ Bene en ɑ ɑ́wɑngi yi Icɑyɑ̀ jɑltöng, kɑ ɑ́kööbe kinni, “Ngɑn megø ócwöddø kì pɑ̈l kinni, ‘Tyenyu yuu Wë, gwøgu yëth-ɑ cyɑ̈dhe gɑ óbödh.’ ”

⁴ Jøn nyi rug-ɑ ógødh men-ɑ ócwɑ̈jø ki yëyyi ɑmɑlø, o wëne bɑ dël, o gïgcɑmme bɑ bɑ̈nyy kí møøw kïc.

⁵ Akedhi tyëng Yerusɑlem yïe, kí tyëng Yeudiyɑ̀ bënn, kí tyëng-ɑ myërri kömi Nɑm Urdun.

⁶ Kɑ orøøg gen töng yi gen, kɑ ge jwɑ̈ɑ̈g yi Jøn kì Nɑm Urdun.

⁷ Jøn keny-ɑ ɑ́lidhe Jøpɑresì geki Jøsɑduk mø gïïr ge bï-ɑ yïe be jwɑ̈ɑ̈gø, ɑköbbe gïn kinni, “Wu bɑ thöllì, ɑ́ men ɑ ɑ́köbbi wun kinni pɑru cɑ́y-ɑ ɑ́cyɑ̈ngi?

⁸ Göög wun ki gïndøj men nyodh kinni, wu ɑ́yewi.

⁹ Kɑ wu ko nyi rum ki pëthi wun kinni, wu óbødh ki cɑyø kɑ̀ kööb wun kinni, Abrɑhɑm bɑ kweyi wun. Yɑ köbb-ɑ wun kinni, tuggi kïttì møg ócuggø kwɑnyø yi Jwøk kɑ gï gwøge gɑ kwɑrri Abrɑhɑm.

¹⁰ Dørø ɑ́rum ki cïb tyeli yɑdh, o yɑnh pɑ kɑ̈ni ki nywøl mø døøj, ceg kɑ ngølø, o leeng mɑc.

¹¹ Yɑ jwɑ̈ɑ̈g-ɑ wun ki pï ɑ́ ngïji yewø, de ngɑn-ɑ óbï kì bɑngɑ wu ójwɑ̈ɑ̈g yi en kɑ Wëykwërø kí mɑc. Dwøng cɑrø kibølɑ; o yɑ pɑ døøj ki kɑ̈lli wɑrre.

¹² Ólɑng-ɑ kwööde ki byel ying-ɑ cinge, byelle ókwøre kidøøj. Byelle ókïdhe yij thebø, de cong órɑ̈b yi en ki mɑc me pɑ thøw.”

Jwɑ̈ngi Yëso

¹³ Kɑ Yëso obëënø kì Gɑlelì, e bï-ɑ be jwɑ̈ɑ̈gø yi Jøn kì kömi Nɑm Urdun.

¹⁴ De ɑ́kyëddi yi Jøn kinni, “Yɑn ɑ ceg dwɑddi jwɑ̈ɑ̈gø yi yïn, de yïde ɑ yöd yï bï-ɑ yïɑ?”

¹⁵ De møge ɑ́løøg yi Yëso kinni, “Wiy bëëde kinøw ɑnɑn. O bene yöö men-ɑ gwøg wɑ gïn-ɑ dwɑddi yi Jwøk.” Kɑ Jøn oyïëyø.

¹⁶ Keny-ɑ ɑ́rum Yëso ki jwɑ̈ɑ̈gø ceth, ɑbëëne wɑ̈g kì yethi pï. Kɑ mɑl ree yiebe, kɑ Wëykwërø lidhe, e bï-ɑ piny e nɑ ɑkur, kɑ pëgg-ɑ köme.

¹⁷ Kɑ cwɑg mø kɑ̈ɑ̈l mɑl okööbø kinni, “Men bene Wɑ̈dɑ, wɑ̈n-ɑ mɑɑrɑ, pyëwɑ med ki en.”