Mt 28 - WÄNYI KWËRØ 2011

Dhwödhø kì Yij Thøø

¹ Keny-ɑ ɑ́thumi cyɑ̈ɑ̈ng ywömø, ɑkedh Meerì Mɑgdɑliyɑ̀ geki Meerì men-ɑ kyeelø kì mwøl ceth, ge kedh-ɑ be lidhi rörø.

² Kɑ piny onhɑ̈nhø ki mendwøng, e wëywöni Wë obëënø, e kɑ̈ɑ̈l-ɑ mɑl, kɑ kït ngyeele wɑ̈ye, kɑ pëgg-ɑ kömi gøn.

³ Ánënni e ceg-ɑ rɑ̈ɑ̈dø ni loodh mɑl, o ógødhe tɑr ni ɑ́piy.

⁴ Kɑ tyëng-ɑ kurø obwøgø yi gøn, kɑ dëlli gen okïïrø, kɑ ge nɑ tyëngthøø.

⁵ Aköbbi tyëng-ɑ mɑ̈nn yi wëywödø kinni, “Wu ko böggi, mɑ́ yɑ ngɑ̈ny wøw kinni, wu yɑb-ɑ Yëso, jɑl-ɑ ɑ́gur wïj yɑdh ɑrïw.

⁶ Tøøk kì keny; ɑ́dhwödh kì yij thøø ni kɑ ɑ́kööbe. Bïu, lidhu keny-ɑ́ yije ɑ́di en.

⁷ Jwɑnu kedhø, kɑ jøbɑnge köbbu kinni, ‘Ádhwödh kì yij thøø, de ɑ́møøl bøli wun; ɑ́kedhi Gɑlelì, ólidh yi wun kì kunɑni.’ Wɑ̈thi wun ko wïl ki møg-ɑ ɑ́köbbɑ wun.”

⁸ Kɑ ge jwɑn-ɑ dhwödhø kì buti rörø, ge óböggø, o pëthi gen med cɑrø, kɑ ge reng-ɑ be köbbi wöönɑni jøbɑnge.

⁹ Arøøm gen ki Yëso, kɑ gï köbbe kinni, “Wu óbëëdø ki mër.” Akedhi tyëngɑni yïe, kɑ tyelle mɑg gen, kɑ mɑl yi gen.

¹⁰ Codhe, ɑköbbi gen yi Yëso kinni, “Wu ko böggi, de köbbu nyiimïɑ, kinni kedhi gen Gɑlelì, yɑ ólidh yi gen kì kunɑni.”

Møg-ɑ Ákwøb yi Jøg-ɑ Ákor Rörø

¹¹ De kɑ̈ng-ɑ́ nudd tyëng-ɑ mɑ̈nn dwöög-ɑ kɑɑl, kwï jøg-ɑ ɑ́kor rörø ɑ́jwɑni, kɑ jɑggi ókwër köbbi gen gïg-ɑ ɑ́cwöb bënn.

¹² Kɑ jɑggi ókwër ócugø kì kej ɑ́kyel geki jøgdøngø, kɑ dhøggi gen nywɑg gen. Kɑ jøliny thödhi yi gen ki ngyëny mø gïïr,

¹³ kɑ gï köbbi gen kinni, “Köbbu teedø kinni, ‘Jøbɑnge bëënø kì wɑ̈r, kɑ dële kwɑl yi gen wø onenø.’

¹⁴ De keløg kwøbbɑni ólïngi yi modïr, wïje ópɑng yi wøn, o bongii gïn lïngø kì pëthi wun.”

¹⁵ Codhe, ɑkwɑɑny ngyëny yi gen, kɑ ge ogöögø ni kɑ ɑ́köbbi gen ceth. Kɑ kwøbbɑni otɑyø kì kelli Yeud, o ge nudd ge okømmø gïti dicyɑ̈ngtïn.

Cwöbi Yëso kì Bøli Jøbɑnge

¹⁶ Kɑ jøbɑnge, gɑ pyɑ̈rø wïdɑ́kyel, kedh-ɑ Gɑlelì wïj kït, kun-ɑ ɑ́köbbi gen yi Yëso.

¹⁷ Keny-ɑ ɑ́lidhii yi gen, ɑmɑlii yi gen, ngö kwï gen yethi gen ópyërø.

¹⁸ Abëën Yëso yï gen, kɑ okööbø kinni, “Yɑ ɑ́rum ki mëggi tegø bëne kì mɑl kí piny.

¹⁹ Kɑ ɑ́rum bëëde kinøw, kedhu yï ji kì kömi piny bëne, kɑ ge gwøg wun gɑ jiɑ, kɑ ge jwɑ̈ɑ̈g wun ki nyingi Wïy kí Wɑ̈d kí Wëykwërø,

²⁰ kɑ ge pwönyi wun ki mïdhi møg-ɑ ɑ́cïgɑ wun bënn. O yɑ óbëëdø kì kelli wun ceth kì yethi cyɑ̈ng bënn gïti thumi piny.”