Mk 4 - WÄNYI KWËRØ 2011

Gɑ́j kì ri Ngeti Wïïwø

¹ Kɑ Yëso ócɑ̈gø pwönyø ki thɑ̈ngi Tɑɑy Gɑlelì. Kɑ dhing yi ji mø gïïr, ɑkɑdhe yij morkɑb, kɑ pëgg-ɑ yije kì nɑm. De teedø bëne ying-ɑ thɑ̈ngi nɑm kì wɑ̈g.

² Kɑ gï pwönye ki kwøb mø gïïr kì yethi gɑ́j. Kɑ gï köbbe kì yij pwönye kinni,

³ “Lïng wun! Jɑl megø ɑ́kedhi be wïïwø ki köödh.

⁴ Keny-ɑ ɑ́wïïwe, kɑ kwï köödh dëëm-ɑ tøg yöö. Abëën winy, kɑ gï cɑm gen.

⁵ Kɑ köödh møøgø dëëm-ɑ keny mɑ kïttì, me lɑ̈bø reeb kì köme. Kɑ ge jwɑn-ɑ twïyø, yi kɑ̀ reb lɑ̈bø.

⁶ Keny-ɑ ɑ́yer cɑ̈ng, ɑrɑ̈bbi gen, kɑ ge othwøwø yi kɑ̀ bëëd ge bong byerri gen.

⁷ Kɑ kwï köödh dëëm-ɑ kelli koodh. Kɑ koodh ódøngø, kɑ byel twij yi koodh, kɑ ge ocögø ge pɑ kɑ̈ni ki nying.

⁸ Kɑ köödh møøgø dëëm-ɑ yij lɑ̈bø me med, keny-ɑ ɑ́twïy gen kɑ ge ódøngø, kɑ kwï gen ókɑ̈nø ki nying pyɑ̈r ɑ́dɑ̈g, kɑ møøgø ókɑ̈nø ki pyɑ̈r ɑ́bïkyel, kɑ møøgø ókɑ̈nø ki miyø.”

⁹ Kɑ okööbø kinni, “Ngɑn di yïthhe mø lïnge, wiy lïnge.”

Gïn-ɑ Pere Pwönyi Yëso kì Yethi Gɑ́j

¹⁰ Keny-ɑ ɑ́dɑ̈ngi Yëso ki teedø, ɑkwɑjjii yi tyëng-ɑ ɑ́lugi kì bɑnge, kí tyëngwöödø gɑ pyɑ̈rø wïdɑ́ryew, kinni lwøbe gïn-ɑ wɑngi yi gɑ́jɑni.

¹¹ Alöggi Yëso kinni, “Bene wun ɑ ɑ́nëngi ki ngɑ̈nyi wøw ki møg-ɑ nuti nyodhø kipe Pödhi Jwøk. De tyëng-ɑ wɑ̈g kwøb bënn lïngi yi gen ɑ yethi gɑ́j,

¹² kipe kinni, ‘Ge ónëënø, kɑ ge onëënø, de bong gïn lidh yi gen; ge ólïngø, kɑ ge olïngø de kwøbbɑni pɑ gɑm yi wɑ̈thi gen. Mɑ́ ke yod gen møgɑni, ge døøg-ɑ kö Jwøk, kɑ lɑɑwe di dwøøge piny kipe gïn.’ ”

Lwøbi Gɑ́ji Ngeti Wïïwø yi Yëso

¹³ Kɑ gï pyëje kinni, “Gïn-ɑ wɑngi yi gɑ́jɑni nuti yood wun? O gïn-ɑ wɑngi yi gɑ́j bënn óyod yi wun kidï?

¹⁴ Ngɑn-ɑ wïïwø pidh-ɑ wööni Jwøk.

¹⁵ Kwï ji nɑ köödh møg-ɑ ɑ́dëëm tøg yöö; kwøbbi Jwøk nyii lïngø yi gen, kɑ kwøbbɑni nyi jwɑn ki gwɑ̈ɑ̈r wɑ̈g yi Cethɑn kì pëthi gen.

¹⁶ Kwï ji nɑ köödh-ɑ ɑ́dëëm keny-ɑ bɑ kïttì; kenyi lïngi gen kwøbbi Jwøk, gï nyi jwɑn yi gen kɑ yïëyø ki medi pëëth.

¹⁷ De kwøbbɑni pɑ nyi niyeeng pëthi gen, o ge pɑ nyi mɑ̈gi kì ri gen. O kenyi bëën ɑkørr wɑlɑ̀ guudi nying, ge nyi jwɑn-ɑ døøg cyɑ̈n.

¹⁸ Kwï ji nɑ köödh-ɑ ɑ́dëëm kelli koodh; kwøbbi Jwøk nyii lïngø yi gen ceth,

¹⁹ de ge nyii tyɑmø yi ɑkørri kömi piny, kí mɑɑri kɑ̈r, kí döngi pëëth, kɑ kwøbbi Jwøk nyi twij yi gïgɑni bënn, kɑ bong-ɑ nywøl mø kɑ̈ɑ̈l yi gen.

²⁰ O kwï ji nɑ köödh-ɑ ɑ́dëëm yij lɑ̈m-ɑ med; kwøbbi Jwøk nyii yïëyø yi gen, kɑ gï pwönyi gen tyëng-ɑ kyeelø, kelli gen dɑ møg kɑ̈ni ki nywøl pyɑ̈r ɑ́dɑ̈g, møøgø kɑ̈ɑ̈l-ɑ pyɑ̈r ɑ́bïkyel, møøgø kɑ̈ɑ̈l-ɑ miyø.”

Lɑ̈mbɑ̈ kì Thɑ Átɑy

²¹ Kɑ gï köbbe kinni, “Lɑ̈mbɑ̈ pɑ nyi kïdhi ød kɑ cïb thɑ ɑ́tɑy, wɑlɑ̀ thɑ nɑngɑreb, de nyi cïb ɑ wïj tɑrɑbedhɑ̀.

²² Gïg-ɑ bɑ ɑkɑnn ókɑ̈ɑ̈l wɑ̈g, o gïg-ɑ bɑ ɑkum óyɑl.

²³ Ngɑn di yïthhe mø lïnge, wiy lïnge.”

²⁴ Kɑ gï köbbe kinni, “Nyi rum wun kì ri møg-ɑ lïngi yi wun. Rumi men-ɑ yije nyi muuj yi wun, bɑ en ɑ yije órummi wun, kɑ med thyew.

²⁵ Mɑ́ ngɑn yïe di jɑmmì, møge ómed; o ngɑn jɑdø, cɑgg ɑ́ møg-ɑ nøg kì yïe ókwɑny.”

Gɑ́j kì ri Köödh Møg-ɑ Pidh

²⁶ Kɑ Yëso okööbø kinni, “Pödhi Jwøk nɑ jɑl mɑ ɑ́pidh köödh kì pwödhe.

²⁷ Kɑ nyii buddø kì wɑ̈r, kɑ nyii dhwödhø kì dicɑ̈ng, kɑ köödh møgɑni otwïyø, kedh ge ódøngø, o kër-ɑ døngi gen kwïj yi en.

²⁸ Mɑ́ lɑ̈bø ɑ nyi pidh gen kete, o bɑ thyɑngø ɑ nyi bï møti, o wïj bëe kì bɑnge, codhe o nyingi byel bï gen cyee.

²⁹ Kenyi cyeg byel, jɑlɑni nyi pödh-ɑ ri pɑlø, mɑ́ bøli kej kɑj ɑ́wɑ̈nhi.”

Gɑ́ji Köödhi Kɑrdɑl

³⁰ Kɑ okööbø kinni, “Pödhi Jwøk pɑ̈ɑ̈r yi wɑ kɑ ngø? Wɑlɑ̀ ónyodh kì ri gɑ́j mɑ ngø?

³¹ Pɑ̈ɑ̈r kɑ wɑɑng köödhi kɑrdɑl men-ɑ nyi piidh piny e thiinh cɑrø kibøli köödh bënn kì kömi piny.

³² De kenyi rume ki twïyø, nyii göögø ɑ́ yɑdh me dwøng, e lod-ɑ yenh møøgø ki döng. Kɑ bɑ̈dde nyi peedhe, kɑ winy nyii gëdø kì bɑ̈dde.”

³³ Kɑ gï pwönye ki gɑ́j mø gïïr ni møgɑni, ni kɑ ɑ́cuggi gen ki lïngø.

³⁴ O bong gïjø mɑ ɑ́köbbe gïn e pɑth ki gɑ́j, de møg-ɑ wɑngi yi gɑ́jɑni nyi löbbe’ jøbɑnge kì wɑ̈yi gen.

Jogi Atunø yi Yëso

³⁵ Cyɑ̈ngɑni kì wɑɑng thyënhø, ɑ ɑ́köbbe gïn kinni, “Kedhi wɑ løøng-ɑcɑ̀.”

³⁶ Kɑ teedø wiy gen. Akɑ̈l gen Yëso kì yij morkɑm-ɑ ɑ́bëëde, e di lwønggø yi morkɑbb møøgø.

³⁷ Kɑ ɑtunø me dwøng ocödø, kɑ ɑpɑgø nyi pɑ̈dh-ɑ yij morkɑb, kɑ morkɑb køm-ɑ pɑ̈ngø yi pï,

³⁸ o Yëso ɑ́bëëd e onenø kì kuni thɑ morkɑb, wïje thɑ̈ɑ̈nh en ki mɑkɑdɑ̀. Kɑ cyëëw yi jøbɑnge, ɑköbbi ge gøn kinni, “Jɑlpwönyø, pɑ nenni yi yïn wɑ ceg-ɑ thøø?”

³⁹ Adhwödh Yëso kɑ yømø cɑ̈wwe, ɑköbbe nɑm kinni, “Cungí! Bëëd mɑ̈ɑ̈dh!” Abed yømø, kɑ piny ceg-ɑ ì dïw ki mendwøng.

⁴⁰ Kɑ Yëso jøbɑnge köbbe kinni, “Wude ɑ böggi wun? Bong yïëyø kì pëthi wun?”

⁴¹ Kɑ ge ongɑ̈ngø ki mendwøng. Kɑ ge okööbø ki ri gen kinni, “Jɑɑl bɑ men, ɑ lïngi dhøge yi yømø geki ɑpɑgø?”