Lk 24 - WÄNYI KWËRØ 2011

Dhwödhø

¹ Kì mwøl ceth kì cyɑ̈ng-ɑ mɑl kì yij osboo, ɑ ɑ́møøl tyëng-ɑ mɑ̈nn kun-ɑ di rörø, ge kɑ̈ll-ɑ mɑ̈th-ɑ yømi gen med møg-ɑ ɑ́gwøg yi gen.

² Kɑ kït yood gen e óngyeel wɑ̈ye kì dhø rörø,

³ de keny-ɑ ɑ́kedhi gen yiny-ɑ ød, dëël Wë Yëso ɑ́cög gø nuti yood gen.

⁴ Kɑ̈ng-ɑ́ nudd wɑ̈thi gen cungø yi møgɑni, kɑ jøg ɑ́ryew mø ógudhi gen rɑ̈nggø ceg-ɑ ì nywil, kɑ ge ócungø kì buti gen.

⁵ Abwøg tyëng-ɑ mɑ̈nn ki mendwøng, kɑ wɑ̈thi gen kuul gen piny. Aköbbi gen yi jøgɑni ryeet kinni, “Wude ɑ yɑb wun ngɑn nëënø kì kelli tyëngthøø?

⁶ Tøøk kì keny; ɑ́dhwödh. Pɑru møg-ɑ ɑ́köbbe wun keny-ɑ ɑ́yinge Gɑlelì,

⁷ kinni, ‘Nyɑɑr Dhɑnhø ócïb cinggi tyëngorøg, kɑ gø gur gen wïj yɑdh ɑrïw, o ódhwödh kì yij thøø kì dɑ̈ɑ̈g cyɑ̈ng.’ ”

⁸ Kɑ møg-ɑ ɑ́kwøb yi Yëso pɑr yi tyëngɑni.

⁹ Akedh gen kɑ tyëngwöödø gɑ pyɑ̈rø wïdɑ́kyel köbbi yi gen, geki jøbɑng Yëso møg-ɑ kyeelø.

¹⁰ Bɑ Meerì Mɑgdɑliyɑ̀, kí Anɑ̀, kí Meerì meyi Yɑgob, kí tyëng-ɑ mɑ̈nn møøgø, ɑ ɑ́köbbi tyëngwöödø ki gïg-ɑ ɑ́cwöb bënn.

¹¹ De kwøbbi tyëng-ɑ mɑ̈nn nuti yïëëy gen, mɑ́ gï lïngi yi gen e nɑ pyed yøw.

¹² De Pïtør ɑ́dhwödh kɑ reng-ɑ kun-ɑ di rörø. Amëdde yije, kɑ lidh-ɑ ógønh-ɑ ɑ́bëëd yije óbɑɑn Yëso. Adøøg Pïtør pɑc e ngɑ̈ngø, gø kwïje mɑ løge ngø ɑ cwöbø.

Kì Kö Yuu Emɑos

¹³ Kì cyɑ̈ngɑni ceth, ɑ́dɑ jøbɑng Yëso ɑ́ryew mɑ ɑ́kedhi pɑc me cwøl ɑ́ Emɑos, kɑɑm pɑnɑni geki Yerusɑlem bɑ kïlomïtïr pyɑ̈rø wïdɑ́kyel.

¹⁴ Ge ɑ́cyɑ̈dhi ge okööbø kì ri gïg-ɑ ɑ́cwöb bënn.

¹⁵ Kɑ̈ng-ɑ ɑ́cyɑ̈dhi gen ge opëmø, kɑ Yëso obëënø, kɑ ócɑ̈gø’ cyɑ̈dhø ki gen,

¹⁶ de gø nuti ngij gen.

¹⁷ Codhe, ɑkööbe kinni, “Á gïg ɑ ri gen kööb yi wun, wu ócyɑ̈dhø?” Kɑ jøgɑni ryeet ócungø, ge nënni pëthi gen rijjø.

¹⁸ Alöggi jɑl-ɑ cwøl ɑ́ Kelyöbɑ̀ kinni, “Bene yïn wëël-ɑ döngø kì Yerusɑlem e nuti lïngø ki gïg-ɑ ɑ́cer cwöbø?”

¹⁹ Apyëëj gen yi Yëso kinni, “Á gïg mɑ ngø?” Akööb gen kinni, “Wø kømm-ɑ Yëso jɑl Nɑdhɑreth. Ábëëd ɑ́ jɑltöng mɑ ɑ́göög ki gïgdøngø mø gïïr kì bøli Jwøk, kí bøli teedø.

²⁰ Jɑggi pödhi wøn geki jɑggi ókwër, gen ɑ ɑ́muujii kinni cɑy ki thøø, kɑ gø gur gen wïj yɑdh ɑrïw.

²¹ De wø ɑ́gɑ̈nn-ɑ kinni bɑ en ɑ di yiel Isrɑil. Pɑth ki codhi gen thyew, ɑ́göög ɑnɑn ki cyɑ̈ng ɑ́dɑ̈g kër-ɑ ɑ́cwöb gïgɑni.

²² Átïni wɑ̈thi wøn ɑ́cuung yi kwøbbi tyëng-ɑ mɑ̈nn møøgø kì kelli wøn. Ge ɑ́møøl rörø ɑ́cøøn kì mwøl,

²³ de dële nuti yodø yi gen kì kenyɑni. Adwöög gen kɑ wø köbbi gen ce dɑ wëywödd ɑ́ryew mø liidh gen, kɑ ge okööbø i Yëso onëënø!

²⁴ Kwï jø wøn ɑ́kedhi rörø thyew. Kɑ gø yod gen ceth ni kɑ ɑ́kwøbii yi tyëng-ɑ mɑ̈nn, de Yëso nuti liidh gen.”

²⁵ Codhe, ɑköbbi gen yi Yëso kinni, “Wu bɑ dhëgg! O wu dhɑ̈li yïëyi kwøbbi jøtöng bënn.

²⁶ Ge ɑ́kööb kinni i Mesiy órɑngi yi gïgɑni bënn, o kedhe yij dhwɑ̈nge cyee.”

²⁷ Codhe, kɑ ócɑ̈gø kì ri Mosɑ̀ gïti kɑ ɑ́tyëge jøtöng bënn, e nyudh-ɑ gen ki gïg-ɑ ógwedø kì ree kì yethi wɑ̈jji kwërø.

²⁸ Keny-ɑ ɑ́wɑ̈dhi gen buti Emɑos, kɑ Yëso ókedhø e dhɑ̈y ce ceg-ɑ pöödhø.

²⁹ Amɑ̈ɑ̈nii yi gen, ge okööbø kinni, “Buddí kì buti wøn keny, mɑ́ wøw ɑ́yuudh, piny køm-ɑ gwøg ki wɑ̈r.” Codhe, ɑtönge pɑc be buddø.

³⁰ Keny-ɑ ɑ́pëggi gen be cɑm, ɑkɑ̈bbe ki ópun, kɑ Jwøk pwøje, ɑpøde gøn kɑ gø mëgge gïn.

³¹ Kɑ Yëso ngij yi gen kì bøli kenyɑni ceth. De Yëso ɑ́wɑ̈dhi lɑ̈ɑ̈nyø yøw keny-ɑ ɑ́ngij ge gøn.

³² Kɑ ri gen köbbi gen kinni, “Ce ying-ɑ en ɑ bëëde e nɑ mɑc ɑ lyel kì pëthee ɑ́tïni kì kö yöö keny-ɑ ɑ́kööb Yëso, e nyudh-ɑ wɑ møg-ɑ ógwedø kì yethi wɑ̈jji kwërø.”

³³ Codhe, kɑ jøgɑni ryeet, dhwödh-ɑ mɑl kì bøli kenyɑni ceth, kɑ ge døøg-ɑ Yerusɑlem. Ayuud gen tyëngwöödø gɑ pyɑ̈rø wïdɑ́kyel geki kwï jøbɑng Yëso kunɑni, ge obëëdø kì kej ɑ́kyel.

³⁴ Gï ɑ́yuud gen ge okööbø kinni, “Wë ɑ́dhwödh kidyër kì yij thøø! Ácwöb kì bøli Sɑymøn.”

³⁵ Codhe, kɑ jøgɑni ryeet olwöbø ki gïg-ɑ ɑ́cwöb kì kö yöö, kí kër-ɑ ɑ́ngij gen Yëso keny-ɑ ɑ́pøde ópun.

Cwöbi Yëso kì Bøli Jøbɑnge

³⁶ E jøgɑni nudd ge wɑj-ɑ møgɑni ceth, kɑ Yëso kiree ócungø kì dïdyëri gen, ɑköbbe gïn kinni, “Wu óbëëdø ki mër.”

³⁷ Kɑ ge obwøgø ki mendwøng, ge orumø ce ge liidh-ɑ tïbi ngɑnthøø.

³⁸ De ge ɑ́köbbi yi Yëso kinni, “Wude ɑ böggi wun? Ede yethi wun ɑ pyëër gen?

³⁹ Lidhu tyellɑ geki cinggɑ. Bɑ yɑn kiriɑ! Nywɑlu yɑn kɑ yɑ lidh wun, mɑ́ tïbi dhɑnhø bong dël kì ree, ni kɑ̀ nëën wun, riɑ dɑ dël.”

⁴⁰ Keny-ɑ ɑ́rum Yëso ki kwøbi møgɑni, ɑnyudhe gïn cingge geki tyelle.

⁴¹ Kɑ̈ng-ɑ́ nuti yïëëy gen yi kɑ̀ med pëthi gen, ɑkööb Yëso kinni, “Dɑ gïncɑm kì yï wun?”

⁴² Athödhi ge gøn ki budi rëjø men-ɑ óthɑlø.

⁴³ Kɑ rënyɑni kwɑny yi Yëso, ɑcɑme gøn e onennø yi gen.

⁴⁴ Kɑ gï köbbe kinni, “Bene gïn-ɑ ɑ́wɑngi yi yɑn, kɑ̈ng-ɑ ɑ́nudd yɑ obëëdø kì kelli wun kinni, gïg-ɑ bɑ ɑgwed kì yij wɑ̈nyi Ciggi Mosɑ̀, kí wɑ̈jji jøtöng, kí Wɑ̈nyi Wör, bɑ møg-ɑ ɑ́dwɑddi ceth kinni o ge pɑ̈dhi gen kɑ̈jji gen.”

⁴⁵ Codhe, kɑ wɑ̈thi gen yieb yi Yëso, o ge cuggi gen ki yodi møg-ɑ bɑ ɑgwed kì yethi wɑ̈jji kwërø.

⁴⁶ Gï ɑ́köbbe kinni, “Bɑ ɑgwed kinni, Mesiy órɑngi kɑ odhwödhø kì yij thøø kì dɑ̈ɑ̈g cyɑ̈ng.

⁴⁷ Kí kinni jurrì bënn ócïj ki nyinge, kipe kinni o minni gen kí bëëdi gen wil yi gen, o lɑ́ɑ̀w ódwöög piny kipe orøøg gen, gwøngɑni cɑ̈g-ɑ́ɑ̀ Yerusɑlem.

⁴⁸ Wun ɑ óköbbi ji kwøbbɑni.

⁴⁹ Wu óörɑ gïn-ɑ ɑ́kwøb yi Wïyɑ kinni gø ómëgge wun, de bëëd wun kì Yerusɑlem gïti keny-ɑ óbëën tegø menɑni kömi wun, e kɑ̈ɑ̈l-ɑ mɑl.”

Kïdhi Yëso Mɑl

⁵⁰ Kɑ Yëso jøbɑnge peeje wɑ̈g kì kɑɑl, kɑ ge wɑ̈dh-ɑ buti Betɑnì, kɑ cingge tïnge, kɑ kwëng kønye kömi gïn.

⁵¹ Kɑ̈ng-ɑ ɑ́nudd e kwëng-ɑ gen, kɑ ókedhø kì buti gen, e kedh-ɑ mɑl.

⁵² Amɑɑl Yëso yi gen, kɑ ge døøg-ɑ Yerusɑlem pëthi gen omedø.

⁵³ Kɑ ge nyii rïïjø kì Kengø, ge lejj-ɑ Jwøk.