Kwɑrr 27 - WÄNYI KWËRØ 2011

Cigg kipe Gïg-ɑ nyi Mëggi Jwøng-ɑ Ácwɑ̈ɑ̈j

¹ Kɑ Mosɑ̀ köbbi yi Jwøng-ɑ Ácwɑ̈ɑ̈j kinni,

² “Köbbí cigg møg tyëng Isrɑil, kinni keny-ɑ órum dhɑnhø ki mëggi Jwøng-ɑ Ácwɑ̈ɑ̈j ɑ́ wïj köngø,

³ jɑlø runne pyɑ̈r ɑ́ryew gïti pyɑ̈r ɑ́bïkyel pɑ̈d kɑ ngyëny ɑ́tegg pyɑ̈r ɑ́bïj. Røm gen ri ɑ́tuggi ɑ́tegg møg-ɑ ónyodh yi ókwër.

⁴ Ngɑndhɑjø runne pyɑ̈r ɑ́ryew gïti pyɑ̈r ɑ́bïkyel pɑ̈d kɑ ngyëny ɑ́tegg pyɑ̈r ɑ́dɑ̈g.

⁵ Nyel-ɑ jɑlø runne ɑ́bïj gïti pyɑ̈r ɑ́ryew pɑ̈d kɑ ngyëny ɑ́tegg pyɑ̈r ɑ́ryew. Dhɑjø pɑ̈d kɑ ngyëny ɑ́tegg pyɑ̈rø.

⁶ Nyɑgïnthinh-ɑ jɑlø dwɑ̈ye ɑ́kyel gïti runn ɑ́bïj, pɑ̈d kɑ ngyëny ɑ́tegg ɑ́bïj. Nyɑgïnthinh-ɑ dhɑjø pɑ̈d kɑ ngyëny ɑ́tegg ɑ́dɑ̈g.

⁷ Jɑlø runne pyɑ̈r ɑ́bïkyel gïti mɑl, pɑ̈d kɑ ngyëny ɑ́tegg pyɑ̈rø wïdɑ́bïj. O dhɑjø pɑ̈d kɑ ngyëny ɑ́tegg pyɑ̈rø.

⁸ “Ngɑn dhɑl yi col muuj ókwërø, o ngyënyy-ɑ col en cïb yi ókwërø, ngyënyy-ɑ cuggi lwɑ̈ngø ki colø yi ngɑn-ɑ ɑ́köngi, ókwøb-ɑ yi ókwërø.

⁹ “Keløg wïj köngø bɑ lɑ̈y me cuggi mëggi Jwøng-ɑ Ácwɑ̈ɑ̈j; kɑ cyee, gïn-ɑ ɑ́mëggi Jwøng-ɑ Ácwɑ̈ɑ̈j bɑ gïi kwër.

¹⁰ Lɑ̈y-ɑ ɑ́muuj keje ko cïbi, wɑlɑ̀ ko wil, ying e wil kɑ men døj wɑlɑ̀ men rɑj, ke pɑ̈nyii ki wilø, lɑ̈yyɑni ryeet ceg-ɑ gwøg ki mø kwër.

¹¹ Lɑ̈yy-ɑ ywëdhø pɑ cuggi mëggi Jwøng-ɑ Ácwɑ̈ɑ̈j gɑ gëdhhì, o ke di ngɑn kɑ̈ni yï Jwøng-ɑ Ácwɑ̈ɑ̈j ki ɑ́kyel kì kelli lɑ̈yyɑni, muuj ókwërø.

¹² Kɑ ngyënyy-ɑ ngeew lɑ̈yɑni cïb yi ókwërø e køøl-ɑ kömi døøje wɑlɑ̀ rɑ̈je, ni kɑ̀ nennii yi ókwërɑni, bene gen ngyënyy-ɑ ókwøb yi ókwërø ɑ ngeewii.

¹³ Keløg ngɑn-ɑ ɑ́kɑ̈ni dwɑdd-ɑ dwøøgi gëe, kɑ ɑ́kyeel ɑ́bïj kì ri ngyënyy-ɑ ɑ́cïb yi ókwërø gɑ møg ngeew lɑ̈yɑni cïb kömi ngyënyy-ɑ col en, o cole mø ngenyø.

¹⁴ “Keløg dhɑnhø muuj-ɑ øde, gø mëgge’ Jwøng-ɑ Ácwɑ̈ɑ̈j ɑ́ mi kwër, cïb ngyënyye yi ókwërø, e ködd-ɑ kömi rɑ̈je wɑlɑ̀ døøje, ngyënyy-ɑ ókwøb yi ókwërø bene gen ngyënyy-ɑ ngeew ønɑni.

¹⁵ De keløg ngɑn-ɑ ɑ́muuj ød dwɑdd-ɑ døøgi øde ki ngewø, cïb ɑ́kyeel ɑ́bïj kì ri ngyënyyɑni kömi ngyënyyi ngyew, o cole mø ngenyø. Codhe, o ød døøge ɑ́ mi wɑ̈n këti.

¹⁶ “Keløg dhɑnhø muuj-ɑ pwödhø kì ri piny gøl gen, ngyënyy-ɑ ngeew pwödhø pɑ̈ɑ̈r kɑ ngyënyy-ɑ ngeew köödh møg-ɑ kɑ̈ɑ̈gii, kwɑn ɑ́ ngyëny ɑ́tegg pyɑ̈rø ɑ ngeew gïn ni rummì pyɑ̈rø mø ceir.

¹⁷ Keløg pwödhø muuj yi ngɑnɑni kì Runi Dwöggø, cungi ngyënyy-ɑ ngeewii gɑ møg-ɑ ɑ́kwøb yi ókwërø ceth.

¹⁸ De keløg e ómuuj yi ngɑnɑni kì bɑng runi Dwöggø, cïb ngyënyyi ngyew yi ókwërø ge kwɑɑn-ɑ ri runn-ɑ ɑ́döng kipe bëëni Runi Dwöggø. Kɑ kwɑnnɑni ngul wɑ̈g kì ri ngyënyyi ngyew.

¹⁹ Keløg ɑ́ ngɑn-ɑ ɑ́muujii ɑ dwɑddii døøgø ngewø, cïb ɑ́kyeel ɑ́bïj kì ri ngyënyyɑni kömi gen, o cole mø ngenyø. Codhe cyee, o pwödhø døøge ɑ́ mi wɑ̈n këti.

²⁰ Keløg pwönhɑni pɑ døøg ki ngewø yi wɑ̈n, wɑlɑ̀ keløg e ngew-ɑ yi ngɑn megø, pɑ cigi døøgø ngewø yi jɑl-ɑ ɑ́muujii.

²¹ Keny-ɑ ópɑ̈ɑ̈d piny kì Runi Dwöggø, pinyɑni ceg-ɑ gwøg ɑ́ mi kwër, bɑ mi Jwøng-ɑ Ácwɑ̈ɑ̈j, ni piny-ɑ ócɑɑgø mëggii. Ceg-ɑ gwøg ki mi ókwër, ɑ løg gøl kwër.

²² “Keløg dhɑnhø mëgg-ɑ Jwøng-ɑ Ácwɑ̈ɑ̈j piny me cɑɑg en ki ngewø, e pɑth ki piny gøl gen,

²³ kwɑɑn runn-ɑ ɑ́döng kipe bëëni Runi Dwöggø yi ókwërø, kɑ ngyënyy-ɑ ngeew pinyɑni cïbe, kɑ ngyënyyi ngyew muuj kì cyɑ̈ngɑni ceth, ngyënyyɑni bɑ mø kwër, ɑ løg mø Jwøng-ɑ Ácwɑ̈ɑ̈j.

²⁴ Keny-ɑ óbëën Runi Dwöggø, pinyɑni døøg-ɑ yï wɑ̈n ngeti tyeli mɑl, yï gøl-ɑ ɑ́ngeew pinyɑni wɑ̈g.

²⁵ “Nyi rum wun ki rum-ɑ ɑ́cïb yi kej kwër, kɑ̀ cud wun ki ngyënyyi ngew møgɑk, e bɑ ngyënyø me cuggi pɑ̈ngø gɑ bud pyɑ̈r ɑ́ryew.

²⁶ “Keløg lɑ̈y bɑ kɑyi meye, ceg bëëdø ɑ́ mi Jwøng-ɑ Ácwɑ̈ɑ̈j, ko cigi mëggii yi ji. Keløg ɑ́ dhyɑng wɑlɑ̀ dyel, bɑ mi Jwøng-ɑ Ácwɑ̈ɑ̈j.

²⁷ Keløg lɑ̈yɑni ywëdhø, døøg ki ngewø yi wɑ̈n ki ngyënyy-ɑ ókwøb yi ókwërø. Kɑ kömi ngyëny kïdhi yi ngɑnɑni ki ɑ́kyeel ɑ́bïj. Keløg e pɑ døøg ki ngewø yi wɑ̈n, ngeew wɑ̈g yi ókwërø ki ngyënyy-ɑ ɑ́cïb en.

²⁸ “Bong dhɑnhø me cuggi dwøøgi gïn-ɑ ɑ́muuje ki cwɑgge, kɑ gø thyeye ɑ́ mi Jwøng-ɑ Ácwɑ̈ɑ̈j, cɑgg ɑ́ dhɑnhø, wɑlɑ̀ lɑ̈y, wɑlɑ̀ pwödhø men-ɑ bɑ mee, wɑlɑ̀ mi gøl gen. Ceg cögø ɑ́ mi Jwøng-ɑ Ácwɑ̈ɑ̈j ceth, pɑ cuggi døøgø ngewø wɑlɑ̀ pɑ gøøm.

²⁹ “Keløg dhɑnhø ómuujø kɑ per nɑ̈gø, pɑ cuggi gøømø, ceg ki nɑ̈gø ceth.

³⁰ “Ákyeel pyɑ̈rri byel, geki jɑmm-ɑ pidh bënn, bɑ miɑ, kì ri jɑmm-ɑ cyeg kì pwödh geki nywøli yenhi bɑ̈gg. Ákyeel pyɑ̈rri bud menɑni bɑ mi kwër.

³¹ Keløg e dɑ ngɑn dwɑddi dwøøgi ɑ́kyeel pyɑ̈rrɑni, kömi ngyënyy-ɑ ngewii ceg kɑ kïdhø ki ɑ́kyeel ɑ́bïj.

³² Kwɑɑny ɑ́kyeel pyɑ̈ri lɑ̈yy kì yï dhɑnhø yi ókwërø, ying gɑ dyëg wɑlɑ̀ dhög, o ge bɑ mø kwër, ɑ løg mø Jwøng-ɑ Ácwɑ̈ɑ̈j.

³³ Ngɑn-ɑ di lɑ̈yye ko wöl wïïdø, ying-ɑ́ men rɑj ɑ wil ki men døj, wɑlɑ̀ men døj ɑ wil ki men rɑj. Keløg e owïïdø lɑ̈yyɑni ryeet ceg-ɑ gwøg ki mø Jwøng-ɑ Ácwɑ̈ɑ̈j, ge pɑ cuggi døøgø ngewø yi wïi gen.”

³⁴ Møgɑk bene gen cigg-ɑ ɑ́mëggi Mosɑ̀ yi Jwøng-ɑ Ácwɑ̈ɑ̈j kì wïj Kïti Sinɑy kipe tyëng Isrɑil.