Kwɑn 36 - WÄNYI KWËRØ 2011

Gïg-ɑ nyi Lɑg yi Mɑ̈nn-ɑ Ónywømø

¹ Jø gøl Gilyɑd wɑ̈d Mɑkir wɑ̈d Mɑnɑsè, wɑ̈d Yosep, ge ɑ́kedhi yï Mosɑ̀ geki jɑgg-ɑ kyeelø,

² kɑ ge okööbø kinni, “Yï ɑ́köbbi yi Jwøng-ɑ Ácwɑ̈ɑ̈j kinni i pɑ̈ngí piny kì kelli tyëng Isrɑil, e leng kɑ wél. Yï ɑ́köbbe thyew kinni i mëggí nyigi Dhelopekɑd ówï wøn piny wïyi gen.

³ De lidh, keløg ge onywømø kì kɑl megø, pinyɑni ceg-ɑ gwøg ki mi gøl-ɑ ɑ́nyömi, kɑ piny-ɑ ɑ́mëggi wøn ónungø.

⁴ Keny-ɑ óbëën Runi Dwöggø, piny Dhelopekɑd kedh-ɑ yï gøl-ɑ nywøm nyige, o pɑ yod yi wøn këti.”

⁵ Codhe ɑmuuj cigg møg yi Mosɑ̀ ge kɑ̈ɑ̈l-ɑ yï Jwøng-ɑ Ácwɑ̈ɑ̈j kinni, “Møg-ɑ kømmi yi gøl Mɑnɑsè bɑ dyër,

⁶ bene ɑ pere kööb Jwøng-ɑ Ácwɑ̈ɑ̈j kinni, nyigi Dhelopekɑd ócuggø nywømø yi cwøw-ɑ dwɑddi yi gen, de nywøøm gen yi kwɑrri Mɑnɑsè kweyi gen.

⁷ Piny-ɑ muuj ɑ́ mi wïj kɑl kì Isrɑil cög ɑ́ mi gølɑni ceth.

⁸ Nyɑndhɑjø men lɑ̈gi ki piny kì Isrɑil nywøm yi wïj gøl gen ceth, keny-ɑ ógwøøgii kinøw, ji ólɑg piny-ɑ bɑ mi kweyi gen kì Isrɑil,

⁹ o piny kɑl nyi cöge ɑ́ mee ceth.”

¹⁰ Kɑ møg-ɑ ɑ́köbbi Mosɑ̀ yi Jwøng-ɑ Ácwɑ̈ɑ̈j gwøg ceth yi nyigi Dhelopekɑd,

¹¹ Kɑ woɑni Mɑklɑ̀, Tirdhɑ̀, kí Oglɑ̀, kí Milkɑ̀ kí Nöö nywøm yi nyiiwï gen.

¹² Ge ɑ́nywøm yi kwɑrri Mɑnɑsè wɑ̈d Yosep, kɑ piny gen ocögø ɑ́ mi wïj gøl gen.

¹³ Møgɑk bene gen cigg geki kwöng møg-ɑ ɑ́cïgi tyëng Isrɑil yi Jwøng-ɑ Ácwɑ̈ɑ̈j ki dhø Mosɑ̀, kì thwøri Moɑb, kì kömi Nɑm Urdun, kì bøli Yerikö.