Kedhø 1 - WÄNYI KWËRØ 2011

Pɑ̈di Yethi Tyëng Isrɑil kì Rïp

¹ Møg bene gen nyingi wɑ̈ddi Yɑgob, jøg-ɑ ɑ́dɑ̈ggi Rïp geki Yɑgob, ngɑɑn kí gøle, ge bɑ

² Ruben, Cimeøn, Leebì, Yeudɑ̀,

³ Isɑkɑr, Dhebulun, Ben Yɑmïn,

⁴ Dɑn, Nɑptɑlì, Gɑd, kí Aceer.

⁵ Kwɑnni gøl Yɑgob, ɑ løg wɑ̈dde geki kwɑrre ɑ́bëëd gɑ pyɑ̈r ɑ́bïryew. Yosep ɑ́ying-ɑ Rïp.

⁶ Codhe, kɑ Yosep othøø geki nyiimen ki rïnyɑni bëne.

⁷ De kwɑrri gen, tyëng Isrɑil ɑ́nywøl kɑ kwɑnni gen óngënyø kɑ ge ótëngø ki mendwøng, kɑ piny opɑ̈ngø yi gen.

⁸ Codhe, kɑ lɑwø kwɑny kì Rïp yi rɑ̈dh me nyɑ̈n me kwïj Yosep.

⁹ Kɑ rɑ̈nhɑni jie köbbe kinni, “Lidhu tyëng Isrɑil, ge ɑ́ceg ngënyø kɑ ge ótëngø kibølee.

¹⁰ Ke di liny me bï, ge ócuggø rëbø ki tyëngmɑ̈ɑ̈nø, kɑ ge ónyïɑ̈ggø ki wɑ, codhe, kɑ ge odhwödhø kì pödhee. Yɑ̈ɑ̈b wɑ ki yöö men mɑ̈ɑ̈n wɑ gen ngënyø.”

¹¹ Codhe, kɑ tyëng Isrɑil cïb cinggi jɑggi gwøg møg cir gen, o köthi gen buudh ki gwøng teg. Kɑ kɑ̈dd ɑ́ryew, ɑ løg Pithöm kí Rɑmsis ger yi gen gɑ møg mïdhi jɑmmi rɑ̈dh.

¹² De tyëng Isrɑil ɑ́yöd ge ceg-ɑ ngënyø keny-ɑ ɑ́pëddi köthi gen ki buudhø, kɑ tyëng Rïp ti-ɑ bwøgø yi gen.

¹³ Kɑ yethi tyëng Isrɑil ti ki pɑ̈dø ki gwøng teg.

¹⁴ Yethi gen ɑ́pɑ̈d ki tïj; ge ɑ́cïri gwøøg gyer kí pur kì yethi pwödh, o pëthi tyëng Rïp pɑ nyi lɑ̈ɑ̈m ki gen.

¹⁵ Kɑ rɑ̈ɑ̈dh Rïp gɑ̈mmi mɑ̈nni Isrɑil ryeet, ɑ løg Ciprɑ̀ geki Puɑ̀ köbbe kinni,

¹⁶ “Kenyi gɑm wun ngeti Isrɑil e pɑ̈dh-ɑ piny, nyi nɑ̈gu men-ɑ nywøl keløg ɑ́ jɑlø, de wiy bëëde keløg ɑ́ dhɑjø.”

¹⁷ De gɑ̈mmɑni ryeet ɑ́bëëd gɑ ji mø böggi Jwøk, kɑ kwøbbi rɑ̈ɑ̈dh Rïp pyem yi gen, cwøw ɑ́yöd ge ceg kɑ wiyø yi gen.

¹⁸ Kɑ gɑ̈mmɑni cwøl yi rɑ̈ɑ̈dh Rïp, kɑ gï pyëje kinni, “Wude, ɑ göög wun kinnï? Ede møg-ɑ nywøl gɑ cwøw ɑ nyi wiyu gen ge pɑ nɑ̈g yi wun?”

¹⁹ Kɑ ge ólöggø kinni, “Mɑ̈nni tyëng Ibru pɑ pɑ̈r ki mɑ̈nni Rïp, pɑ̈dhi gen piny yööd, ge nyi pɑ̈dhi piny e gɑ̈ɑ̈mi nuti wɑ̈dhi yï gen.”

²⁰ Kɑ gɑ̈mmɑni korri yi Jwøk kidøøj. Kɑ tyëng Isrɑil óngënyø ki mendwøng.

²¹ Kɑ kɑ̈lli gɑ̈mmɑni tyeny yi Jwøk, mɑ́ ge bɑ ji mø böggi Jwøk.

²² Kɑ rɑ̈dh tyëng pödhe köbbe kinni, “Kwɑny wun wɑ̈ddi tyëng Ibru møg-ɑ ócer nywølø, kɑ ge leengu Kiir, de wiy møg-ɑ bɑ mɑ̈nn bëëd gen.”