Jølø 4 - WÄNYI KWËRØ 2011

Köbbi Isrɑil yi Mosɑ̀ kinni Mïdhe Cigg

¹ Codhe, ɑköbbi teedø yi Mosɑ̀ kinni, “Lïngu cigg-ɑ pwönyɑ wun bënn, o wu ónëën wun, kɑ wu kedh-ɑ yij piny-ɑ mëggi wun yi Jwøøg kweyyi wun, Jwøng-ɑ Ácwɑ̈ɑ̈j.

² Ko di gïn kïdhi yi wun kömi møg-ɑ ɑ́cïgɑ wun, kɑ ko di gïn kɑ̈ɑ̈l yi wun wɑ̈g kì ri gen. Mïdhu ciggi Jwøøg wun Jwøng-ɑ Ácwɑ̈ɑ̈j, cigg-ɑ cïgɑ wun èn.

³ Gïn-ɑ ɑ́gwøg yi Jwøng-ɑ Ácwɑ̈ɑ̈j kì Bɑɑl Peor ɑ́lidh yi wun. Tyëng-ɑ ɑ́kwɑjji Bɑɑl ɑ́nɑ̈ge bënn kì kunɑni,

⁴ de wun, wu tyëng-ɑ ɑ́mɑ̈gi kì ri Jwøng-ɑ Ácwɑ̈ɑ̈j, wu nudd wu onëënø dicyɑ̈ngtïn.

⁵ “Wu ɑ́pwönyɑ ki cigg bënn, ni kɑ ɑ́köbbi yɑn yi Jwøgɑ, Jwøng-ɑ Ácwɑ̈ɑ̈j. Mïdhu gen ceth kì piny-ɑ yije kedhi yi wun, ɑ́ men kwɑny yi wun.

⁶ Mïdhu ciggɑni, kɑ wu göög wun kì ri gen, o yod yi pödhh-ɑ kyeelø kinni wɑ̈thi wun pel. Keny-ɑ ólïngi gen ciggɑni, ge ókööbø kinni, ‘Á peli wïj geki dïdø me bëëdø kidï, ɑ yï pönh-ɑ dwøng ni men!’

⁷ “Bong pödhø me nud, cɑgg e dwøng ni ngø, me yïe di jwøg me cyɑ̈gi ki en, kenyi cwøl ge gøn; bong jwøg me pɑ̈ɑ̈r ki Jwøgee, Jwøng-ɑ Ácwɑ̈ɑ̈j, ɑ nyi jwɑn löggø kenyi cwøl wɑ en.

⁸ Bong pödhø me nud, cɑgg e di bëëd e dwøng ni ngø, me yïe di cigg mø døøj ni cigg-ɑ ɑ́pwönyɑ wun dicyɑ̈ngtïn.

⁹ Bëëd wun nyingi wun yieeb wun! Wɑ̈thi wun ko wëggu wïlø ki gïg-ɑ ɑ́lidh yi wun kí nyingi wun, ki kɑɑm ni kɑɑm-ɑ óbëëd wun kì kömi piny. Köbbi wun nyingi wun geki kwɑrri wun,

¹⁰ ki gïg-ɑ ɑ́cwöb kì cyɑ̈ng-ɑ ɑ́cungi wun kì bøli Jwøøg wun, Jwøng-ɑ Ácwɑ̈ɑ̈j, kì thɑ Kïti Sinɑy, kí kɑ ɑ́köbbe yɑn kinni, ‘Cwøl teedø, o ge lïngi gen gïn-ɑ dwɑddɑ kwøbø, o ge dïd gen ki mïdhi ciggɑ, ki cyɑ̈ng-ɑ óbëëd gen kì kömi piny, o nyigi gen ólony ki pwönyø yi gen.’

¹¹ “Köbbu nyigi wun ki kër-ɑ ɑ́cungi wun kì thɑ kït, e bɑ ɑkum yi pøølø me looj, kí mɑc me lyel e wɑ̈dhi mɑl, yïrø ì dut.

¹² Köbbu gen ki kër-ɑ ɑ́kööb Jwøng-ɑ Ácwɑ̈ɑ̈j ki wun, e kööb ɑ yij mɑc, kí kɑ ɑ́lïngii yi wun e okööbø, de pɑ nenni yi wun, wu lïng-ɑ cwɑg keti gen.

¹³ Kɑ wu nyudhe kinni mïdhu lwöbø men-ɑ kɑɑm wuki en, kí Cigg-ɑ Pyɑ̈rø møg-ɑ ɑ́gweede kömi ópɑ̈nni kït ɑ́ryew.

¹⁴ Yɑ ɑ́köbbi yi Jwøng-ɑ Ácwɑ̈ɑ̈j kinni pwönyɑ wun ki cigg bënn møg-ɑ ómïdhi yi wun kì piny-ɑ yije kedhi yi wun, ɑ́ men kwɑny yi wun.

Kyeri Kwɑjji Ngïjjì

¹⁵ “Keny-ɑ ɑ́kööb Jwøng-ɑ Ácwɑ̈ɑ̈j ki wun kì Kïti Sinɑy, kì yij mɑc, nuti liidh wun mɑ bëëde kidï. Menɑni bɑ kiper wun, ɑdɑ́ cyee,

¹⁶ wu ko røngi kɑ ri wun göggi wun ki ngïji jwøg me pɑth kinni tek, cɑgg e gwøg ɑ́ jɑlø wɑlɑ̀ dhɑjø,

¹⁷ lɑ̈y wɑlɑ̀ winyø,

¹⁸ gïn mulli kì piny wɑlɑ̀ rëjø.

¹⁹ Ri wun ko wëggu thɑbø, kɑ wu døøg-ɑ be kwɑjji gïg-ɑ nenni yi wun kì mɑl, ɑ løg cɑ̈ng, kí dwɑ̈y, kí kyell. Gïgɑni ɑ́mëgg-ɑ pödhh-ɑ kyeelø yi Jwøøg wun, Jwøng-ɑ Ácwɑ̈ɑ̈j, o gï mɑlli gen.

²⁰ De wun, wu ɑ́kwɑny yi Jwøng-ɑ Ácwɑ̈ɑ̈j, kɑ wu kɑ̈ɑ̈le wɑ̈g kì yij mɑc, kì Rïp, wu ɑ́kɑ̈ɑ̈l yi en kɑ per kinni o wu gwøge wun ɑ́ jie ni kɑ̀ bëëd wun dicyɑ̈ngtïn.

²¹ Jwøøg wun, Jwøng-ɑ Ácwɑ̈ɑ̈j, pyëwe ɑ́rënyi ki yɑn, kɑ yɑ mɑ̈ɑ̈ne bɑ̈ɑ̈ni Nɑm Urdun. Yɑ ɑ́mɑ̈ɑ̈ne kedhi piny-ɑ mëgge wun, piny-ɑ lɑ̈be med kì bɑng gööj wun.

²² Yɑ óthøw kì piny men, nɑm pɑ bɑ̈ɑ̈nɑ, de wu ókedh, kɑ wu pëgg-ɑ pinyɑni, piny-ɑ lɑ̈be med.

²³ Wɑ̈thi wun ko wïl cyee ki mïdhi lwöbø men-ɑ kɑɑm wun ki Jwøøg wun, Jwøng-ɑ Ácwɑ̈ɑ̈j. Mïdhu cigge, kɑ ri wun ko göggi wun ki ngïji jwøng mɑlli yi wun,

²⁴ mɑ́ Jwøøg wun, Jwøng-ɑ Ácwɑ̈ɑ̈j nɑ mɑc me ceg rɑ̈b, o bɑ Jwøk me rɑj ki tyiel.

²⁵ “Cɑgg ɑ́ keny-ɑ ópëggi wun pinyɑni, kɑ wu onywølø ki nyigi wun, kɑ wu óyïddø ki kwɑrri wun, ri wun ko göggi wun ki ngïjji jwögg mø pɑth kinni tek. Menɑni bɑ gïnrɑj kì yï Jwøng-ɑ Ácwɑ̈ɑ̈j, o pyëwe bɑ men rënyi.

²⁶ Anɑn wu ɑ́cyɑ̈ngi ki bɑ̈ɑ̈ni Nɑm Urdun, de yɑ cwööl-ɑ mɑl kí piny, o ge lïngi gen møg-ɑ köbbɑ wun, o wu ócɑy yi gen keny-ɑ ópyem wun møg-ɑ köbbɑ wun, ke pyem wun dhøgɑ, wu bɑ møg jwɑn lɑ̈ɑ̈nyø kì pinyɑni, wu pɑ mɑ̈gi ki keny me bɑ̈ɑ̈r.

²⁷ Wu ókedhhi yi Jwøng-ɑ Ácwɑ̈ɑ̈j kì kelli ji møøgø, o bɑ mø nøg ɑ óbødh kì kelli wun kì kunɑni.

²⁸ Kì kunɑni, wu ókwɑjji jwögg møg-ɑ ógwøgø ki cingi dhɑnhø; jwögg-ɑ ógwøgø ki yɑdh geki kït, jwögg-ɑ pɑ nëënø, ɑ pɑ lïngø, ɑ pɑ cyɑ̈mø wɑlɑ̀ ɑ pɑ ngwɑ̈jø.

²⁹ Kì kunɑni, Jwøøg wun, Jwøng-ɑ Ácwɑ̈ɑ̈j, óyɑb yi wun, o óyod yi wun, keløg e óyɑb yi wun ki pëthi wun bënn.

³⁰ Keny-ɑ ópɑ̈dhi wun yethi ɑkørr, kɑ gïgɑni bënn bï-ɑ kömi wun, wu ódøøg kö Jwøng-ɑ Ácwɑ̈ɑ̈j, kɑ kwøbbe lïngi yi wun.

³¹ Wu pɑ wiye piny, wɑlɑ̀ wu pɑ ryɑ̈g yi en, o wïje pɑ wïl ki lwöbø men-ɑ ɑ́lwøb yi en kiree geki kweyyi wun, mɑ́ e bɑ Jwøng lɑ̈mpyëwe pɑ nyi thumi.

³² “Yɑ̈ɑ̈b wun ki tyelli kwøb, cɑg kì kër-ɑ ɑ́cwɑ̈ɑ̈j dhɑnhø yi Jwøk kì kömi piny. Yɑ̈ɑ̈b wun kì yij piny bëne. Dɑ gïjø me dwøng ni men, mɑ ɑ́cwöb cøn? Dɑ dhɑnhø mɑ ɑ́pɑ̈nyi lïngø ki gïn ni menɑni?

³³ Dɑ ji mɑ ɑ́cög ge nuti thøø keny-ɑ ɑ́lïngi gen Jwøk e okööbø kì yij mɑc ni wun?

³⁴ Dɑ jwøg mɑ ɑ́pɑ̈nyi kedhø, kɑ okööbø ki ji kì pödhø megø, kɑ gï gwøge gɑ jie, ni Jwøøg wun, Jwøng-ɑ Ácwɑ̈ɑ̈j, ɑ ɑ́kɑ̈ɑ̈l wun kì Rïp? Tege ɑ́nyodhe kì bøli wun, ɑ́bï ki ryɑ̈g geki liny, kɑ ogöögø ki gïïngɑ̈ngø, kɑ gïg mø böggi yi ji göjje cwöbø.

³⁵ Gïgɑni ɑ́gwøg yi Jwøng-ɑ Ácwɑ̈ɑ̈j kɑ per kinni, o yod yi wun kinni, e kete ɑ bɑ Jwøk, bong jwøg megø.

³⁶ Wu ɑ́wëgge lïngi cwɑgge, e cwɑgge kɑ̈ɑ̈l-ɑ mɑl, kipe kinni, o cugge cegi wun, kɑ mɑc mee Kwërø wëgge lidhø yi wun kì piny keny.

³⁷ Wu ɑ́myege, mɑ́ kweyyi wun mɑɑr yi en, kɑ wu kɑ̈ɑ̈le wɑ̈g kì Rïp ki tege, teng-ɑ dwøng.

³⁸ Ácyɑ̈dhi kì bøli wun kɑ pödhh mø døngø kibøli wun cyedde. Kipe kinni, o wu kïdhe piny-ɑ bɑ mi wun.

³⁹ Pɑ̈ddi wun dicyɑ̈ngtïn, kɑ cïb wun pëthi wun kinni, Jwøøg wun, Jwøng-ɑ Ácwɑ̈ɑ̈j, bɑ Jwøk kì mɑl kí piny. Bong jwøg megø këti.

⁴⁰ Mïdhu cigge bënn, cigg-ɑ mëggɑ wun dicyɑ̈ngtïn, o wu óbëëd wun ki tɑrø wuki nyingi wun, kí kwɑrri wun, kì piny-ɑ mëggi wun yi Jwøøg wun, Jwøng-ɑ Ácwɑ̈ɑ̈j, o runni wun óbëëd ge ngenyø, o pinyɑni cöge ɑ́ mi wun gïti ɑtheer.”

Kɑ̈ddi Yömmø kì Løøg Nɑm Urdun, kì Wɑɑng Cyɑ̈ɑ̈ng Mwøl

⁴¹ Codhe, kɑ Mosɑ̀ ókɑ̈bbø ki kɑ̈dd ɑ́dɑ̈g kì løøg Nɑm Urdun kì wɑɑng cyɑ̈ɑ̈ng mwøl,

⁴² gɑ kɑ̈dd møg nyi yömmi yi ngɑn nɑ̈g dhɑnhø, e yieel-ɑ wëye kunɑni, keløg dhɑnhø ceg-ɑ gwɑ̈nyø kì cinge, e bong mɑ̈ɑ̈nø mɑ ɑ́ying kɑɑm gen ki wɑɑd gen menɑni. Yömme yij kɑɑl ɑ́kyel kì kelli kɑ̈ddɑni, o cöge e pɑ nɑ̈g.

⁴³ Gøl Ruben nyi yömme Bedher, kɑɑl-ɑ yij thwørø, o gøl Gɑd nyi yömme Rɑmöth kì Gilyɑd, o gøl Mɑnɑsè nyi yömme Gölɑn kì myërri Bɑcɑn.

Thyeri Kwøbbi Muuji Ciggi Jwøk

⁴⁴ Ciggi Jwøk geki pwönye ɑ́mëggi tyëng Isrɑil yi Mosɑ̀.

^45-46 Ge ɑ́bëëd ge rum bëën wɑ̈g kì Rïp, o ge bëëd ɑ yij tör kì kömi Nɑm Urdun kì wɑɑng cyɑ̈ɑ̈ng mwøl, kì bøli Betpeor. Kenyɑni ɑ ɑ́muuje ciggɑni. Pinyɑni ɑ́bëëd ɑ́ mi Rɑ̈dh Sïön, rɑ̈ɑ̈dh tyëng Amör, ɑ ɑ́jyɑ̈ɑ̈g kì Kicbön. Áceg kɑ tyɑmø yi Mosɑ̀ geki tyëng Isrɑil keny-ɑ ɑ́bëën gen ge kɑ̈ɑ̈l-ɑ Rïp.

⁴⁷ Kɑ pinye kwɑny yi gen geki piny Rɑ̈dh Og, rɑ̈ɑ̈dh Bɑcɑn, rɑ̈ɑ̈dh tyëng Amör, rɑ̈nh-ɑ kyeelø, ɑ ɑ́ying løøg Nɑm Urdun kì wɑɑng cyɑ̈ɑ̈ng mwøl.

⁴⁸ Pinyɑni kön-ɑ́ɑ̀ kɑɑl Aröeer kì tøg töör Arnön e gït-ɑ Kïti Sïrïön, ɑ løg Kïti Kermön.

⁴⁹ Arëbi thyew ki piny-ɑ løøg Nɑm Urdun kì wɑɑng cyɑ̈ɑ̈ng mwøl, e töng-ɑ wɑɑng wurlwɑl, kì kömi Luuy Omelø, gïti thɑ Kïti Pisgɑ̀ kì wɑɑng cyɑ̈ɑ̈ng mwøl.