Jølø 3 - WÄNYI KWËRØ 2011

Tyɑmi Rɑ̈dh Og yi Isrɑil

¹ “Codhe ɑkedh wɑ, wɑ kedh-ɑ kuni myërri Bɑcɑn, kɑ Rɑ̈dh Og bï-ɑ be nyɑɑg ki wɑ, ki men-ɑ́ yɑye bëne, kì buti Edrey.

² De yɑ ɑ́köbbi yi Jwøng-ɑ Ácwɑ̈ɑ̈j kinni, ‘Yï ko böggi yi en, cïbɑ’ cingí, en kí jøge geki kɑ̈dde bënn. Göggí gïn-ɑ ɑ́göggí Rɑ̈dh Sïön rɑ̈ɑ̈dh tyëng Amör, ɑ ɑ́jyɑ̈ɑ̈g kì Kicbön.’

³ “Codhe, ɑcïb Rɑ̈dh Og kí jøge geki kɑ̈dde cinggee yi Jwøng-ɑ Ácwɑ̈ɑ̈j. Kɑ ge nɑ̈g wɑ bënn.

⁴ Kɑ kɑ̈dde bënn yɑg yi wɑ. Bong kɑɑl ɑ́kyel mɑ ɑ́döng e nuti mɑɑg wɑ, wɑ ɑ́mɑg-ɑ kɑ̈dd pyɑ̈r ɑ́bïkyel kì myërri Argöb møg-ɑ ɑ́jɑɑg yi Rɑ̈dh Og, rɑ̈ɑ̈dh Bɑcɑn.

⁵ Kɑ̈ddɑni bënn ɑ́bëëd gɑ ɑwen ki dör mø wɑ̈dhi mɑl, dhøggi dörrɑni, dɑ thïg mø bɑ ɑgɑ̈r. O kɑ̈dd-ɑ thønhø ɑ nuti gëddø ki dör pɑ kwɑn.

⁶ Kɑ̈ddɑni ɑ́rënyi yi wɑ, kɑ jøg-ɑ cwøw nɑ̈g yi wɑ geki mɑ̈nn kí othønhø, ni men-ɑ ɑ́göggi wɑ kɑ̈ddi Sïön rɑ̈ɑ̈dh Kicbön.

⁷ Dhög ɑ́kwɑny yi wɑ, kɑ kɑ̈ddɑni yɑg yi wɑ.

⁸ “Kì bøli kenyɑni, piny-ɑ løøg Nɑm Urdun kì wɑɑng cyɑ̈ɑ̈ng mwøl, cɑg kì kömi Nɑm Arnön gïti Kïti Kermön ɑ́kwɑny yi wɑ kì yï rɑ̈nhi tyëng Amör ryeet.

⁹ (Kïti Kermön cwøl ɑ́ Sïrïön yi tyëng Sïdön, o cwøl ɑ́ Senïr yi tyëng Amör.)

¹⁰ Myërri Og rɑ̈ɑ̈dh Bɑcɑn ɑ́kwɑny yi wɑ, ɑ løg myërr-ɑ kwøømø, kí myërri Gilyɑd, kí Bɑcɑn gïti kɑ̈ddi Cɑlicɑ̀ geki Edrey kì kuni wɑɑng cyɑ̈ɑ̈ng mwøl.”

¹¹ (Rɑ̈dh Og kete ɑ dööngø kì bɑng tyëng Repɑim kɑ ɑ́thumi gen. Sɑrire men-ɑ ógwøgø ɑ́ ngyënyø dødø, bɑ̈re bɑ mïtïr ɑ́ngwen, o lɑ̈je bɑ mïtïr ɑ́ryew, nudd e nud kì Rɑbɑ̀, kɑɑl tyëng Amön.)

Kɑ̈ll-ɑ Ápëggi Løøg Nɑm Urdun kì Wɑɑng Cyɑ̈ɑ̈ng mwøl

¹² “Pinyɑni ɑ́mɑg yi wɑ kì bøli kenyɑni, e dhøge cɑ̈g-ɑ́ɑ̀ kɑɑl Aröeer kì kömi Nɑm Arnön, kí budi myërri kïtti Gilyɑd, geki kɑ̈ddi gen bënn, kɑ mëggɑ gøl Ruben geki gøl Gɑd.

¹³ Kɑ budi Gøl Mɑnɑsè mëggɑ bun-ɑ ɑ́döng kì ri Gilyɑd, kí Bɑcɑn bëne, piny-ɑ ɑ́jɑɑg yi Og, ɑ løg myërri Argöb bënn.” (Bɑcɑn ɑ́bëëd e cwøl ɑ́ piny Repɑim.

¹⁴ Myërri Argöb bënn, ɑ løg Bɑcɑn gïti keew Gecur geki Mɑɑkɑ̀, ɑ́kwɑny yi Yɑir wɑ̈d Mɑnɑsè. Myërrɑni ɑ́cɑge ki nyinge, ge nudd ge cwølli gɑ myërri Yɑir gïti dicyɑ̈ngtïn.)

¹⁵ “Gilyɑd ɑ́mëggɑ gøl Mɑkir wɑ̈d Mɑnɑsè.

¹⁶ Kɑ wïj gøl Ruben geki wïj gøl Gɑd mëggɑ myërr-ɑ cɑ̈gi kì Gilyɑd gïti kömi Nɑm Arnön. Keew gen kì wɑɑng wurlwɑl ying-ɑ dïnɑmɑni. O keew gen kì wɑɑng wuudø bɑ Nɑm Yɑbok, kwëe ɑ bɑ keew Amön.

¹⁷ Keew gen kì wɑɑng cyɑ̈ɑ̈ng böörø, wɑ̈dh-ɑ kömi Nɑm Urdun, o cɑ̈g-ɑ́ɑ̀ Tɑɑy Gɑlelì gïti Luuy Omelø kì wɑɑng wuudø, kɑ gït-ɑ thɑ Kïti Pisgɑ̀ kì wɑɑng cyɑ̈ɑ̈ng mwøl.

¹⁸ “Kɑ kɑ̈ll-ɑ ɑ́döngi løøng-ɑ wɑɑng cyɑ̈ɑ̈ng mwøl cegɑ kì bøli kenyɑni kinni, ‘Piny men, ɑ́mëggi wun yi Jwøøg wun, Jwøng-ɑ Ácwɑ̈ɑ̈j, kì løøg Nɑm Urdun wɑɑng cyɑ̈ɑ̈ng mwøl, o wu bëëd wun kì yije. Anɑn, kwɑnyu jɑmmi liny, kɑ nɑm bɑ̈ɑ̈n wun. Møøl liny wun bøli nyiimï wun, tyëng Isrɑil be kønyi gen ki mɑgi piny gen.

¹⁹ Mɑ̈nni wun geki othønhø kí dhögi wun bene gen ɑ ódöng kì kɑ̈dd-ɑ ɑ́mëggɑ wun, o ngɑ̈nyi yi yɑn kinni yï wun dɑ dhög mø gïïr.

²⁰ Køny wun wɑddi wun, tyëng Isrɑil gïti keny-ɑ ócïb gen piny yi Jwøng-ɑ Ácwɑ̈ɑ̈j ni wun kì piny-ɑ ɑ́mëgge gïn, kì løøg Nɑm Urdun kì wɑɑng cyɑ̈ɑ̈ng böörø. O rume cyee, o wu døg wun, ngɑn kedh-ɑ piny-ɑ ɑ́mëggɑ en.’

²¹ “Codhe, ɑcegɑ Jöcwø kinni, ‘Álidh yi yïn ki wɑngí, eni gïn-ɑ ɑ́göggi Rɑ̈dh Sïön geki Rɑ̈dh Og yi Jwøgí, Jwøng-ɑ Ácwɑ̈ɑ̈j, gïn ni menɑni ɑ ógögge rɑ̈nh-ɑ pinye köme ópɑ̈ɑ̈r yi wun.

²² Wu ko böggi yi gen, mɑ́ Jwøøg wun, Jwøng-ɑ Ácwɑ̈ɑ̈j, ónyïɑ̈ggø kiper wun.’

Mɑ̈ɑ̈ni Mosɑ̀ Kedhi Piny Kɑnɑɑn

²³ “Kɑ yɑ ókwɑ̈jjø yɑ odhɑmmø kì bøli kenyɑni kinni,

²⁴ ‘Wuö, Jwøng-ɑ Ácwɑ̈ɑ̈j, ngɑ̈nyi yi yɑn kinni yɑ ɑ́nyudhí’ mø nøg yøw kì ri gïgdøngø møg-ɑ ógwøg yi yïn ki tegí. Bong jwøg megø kì mɑl wɑlɑ̀ kì piny, me cuggi gwøg ki gïg ni møgɑni!

²⁵ Yïn ɑ Jwøng-ɑ Ácwɑ̈ɑ̈j, wiy yɑ kedhɑ løøg Nɑm Urdun, o piny-ɑ lɑ̈be med kì løøngɑni lidhɑ, piny-ɑ bɑ kwøømø, geki myërri kïtti Lubnɑn.

²⁶ “De Jwøng-ɑ Ácwɑ̈ɑ̈j ɑ́bëëd pyëwe dɑ liny ki yɑn, kì bɑng gööj wun. Kɑ yɑ köbbe kinni, ‘Árum, yɑ pɑ dwɑddi lïngø ki møgɑni këti!

²⁷ Yedhí oledh Kïti Pisgɑ̀, kɑ yï lïïdh wɑɑng wuudø kí wɑɑng wurlwɑl, kɑ yï lïïdh wɑɑng cyɑ̈ɑ̈ng mwøl kí wɑɑng cyɑ̈ɑ̈ng böörø. Gïg-ɑ ólidh yi yïn, ti gen ki nennø kidøøj, mɑ́ yï pɑ pɑ̈nyi kedhi løøg Nɑm Urdun.

²⁸ Ceg Jöcwø, kɑ cïïj o pyëwe tënge, kipe bɑ en ɑ ópeej ji pinyɑni, o gï mëgge piny-ɑ ɑ́lidh yi yïn.’

²⁹ “Codhe, ɑ pëggi wɑ yij tör-ɑ rwööm ki Betpeor.”