Jermɑyɑ̀ 1 - WÄNYI KWËRØ 2011

Jermɑyɑ̀

¹ Wɑ̈nyø men bɑ møg-ɑ ɑ́kwøb yi Jermɑyɑ̀ wɑ̈d Kilkiyɑ̀, jɑl mɑ ɑ́bëëd ɑ́ ókwërø kì Anɑthöth kì myërri gøl Ben Yɑmïn.

² Jwøng-ɑ Ácwɑ̈ɑ̈j ɑ́kööb geki Jermɑyɑ̀ keny-ɑ ɑ́bëëd Yöciyɑ̀ wɑ̈d Amön bɑ rɑ̈ɑ̈dh Yeudiyɑ̀ e runne bɑ pyɑ̈rø wïdɑ́dɑ̈g kì yij lɑwø.

³ Kɑ Jwøng-ɑ Ácwɑ̈ɑ̈j cig-ɑ kwøb ki en keny-ɑ ɑ́bëëd Yöciyɑ̀ wɑ̈d Yöyɑkim bɑ rɑ̈dh. Kì bɑng kenyɑni, kɑ Jwøng-ɑ Ácwɑ̈ɑ̈j nyii kööbø ki en tyel mø gïïr, gïti kɑ ɑ́göög runni Dhedekiyɑ̀ wɑ̈d Yöciyɑ̀ ki pyɑ̈rø wïdɑ́kyel kì yij lɑwø. Wɑɑngɑni kì bïïj dwɑ̈tt ɑ ɑ́kïdhi tyëng Yeudiyɑ̀ yïnø.

Cwøli Jermɑyɑ̀

⁴ Yɑ ɑ́köbbi yi Jwøng-ɑ Ácwɑ̈ɑ̈j kinni,

⁵ “Yï ɑ́myegɑ cøn, yï nuti nëngø yi yɑn ki wëy, kɑ yï yieenyɑ wɑ̈yí, yï nuti nywølø, kipe kinni o yï gwøøgɑ yïn ɑ́ jɑltöng kì kömi pödhh bënn.”

⁶ Alöggɑ kinni, “Jwøng-ɑ Ácwɑ̈ɑ̈j Jwøk, yɑ bɑ othinh, yɑ kwïj kwøb.”

⁷ De Jwøng-ɑ Ácwɑ̈ɑ̈j yɑ ɑ́köbbe kinni, “Yï ko kööb kinni yï bɑ othinh, de kedhí yï tyëng-ɑ yï gen örɑ yïn, kɑ ge köbbí møg-ɑ cïgɑ yïn bënn.

⁸ Yï ko böggi yi gen, mɑ́ yɑ ócyɑ̈dhi ki yïn, yɑ kor-ɑ yïn.” Møg-ɑ ɑ́kwøb yi Jwøng-ɑ Ácwɑ̈ɑ̈j ɑgɑk!

⁹ Codhe, kɑ Jwøng-ɑ Ácwɑ̈ɑ̈j cönge rïïje, ɑnywɑle dhøgɑ, kɑ yɑ köbbe kinni, “Lïng! Kwøbb-ɑ ókømmi yi yïn ɑ cïbɑ dhøgí èn.

¹⁰ Yï ɑ́thödhɑ ki tegø dicyɑ̈ngtïn kì kömi pödhh bënn; tegø men puthí wɑ̈g, kɑ yï cöd-ɑ piny, kí tegø men gëëd kɑ yï mïn-ɑ piny.”

Cɑ́r Áryew

¹¹ Kɑ yɑ köbbi yi Jwøng-ɑ Ácwɑ̈ɑ̈j kinni, “Jermɑyɑ̀, yï nenn-ɑ ngø?” Alöggɑ kinni, “Bɑɑd yɑdh ɑkemel.”

¹² Kɑ Jwøng-ɑ Ácwɑ̈ɑ̈j okööbø kinni, “Yï ɑ́lidh dyër, o yɑ yïd-ɑ kinni o kwøbbɑ bï gen gɑ dyër.”

¹³ Codhe, ɑcigi yɑn köbbø yi Jwøng-ɑ Ácwɑ̈ɑ̈j kinni, “Á ngø këti ɑ nenni yi yïn?” Alöggɑ kinni, “Yɑ nenn-ɑ dɑg me twɑg kì wɑɑng wuudø e wuul-ɑ tuung.”

¹⁴ Kɑ yɑ köbbi yi Jwøng-ɑ Ácwɑ̈ɑ̈j kinni, “Ryɑ̈g ótwɑɑg kömi tyëng-ɑ piny men, e kɑ̈ɑ̈l-ɑ wɑɑng wuudø,

¹⁵ mɑ́ yɑ cwööl-ɑ tyëng wɑɑng wuudø bënn kinni bï gen keny. Rɑ̈nhi pödhhɑni kwømmi gen ócïb dhøggi döri Yerusɑlem kí bɑdhhi döre, geki bɑdhhi kɑ̈ddi Yeudiyɑ̀ møg-ɑ kyeelø.

¹⁶ Jiɑ cɑyɑ’ cɑyø mɑ́ ge ɑ́røngi, yɑ ɑ́wiy gen piny kɑ ge kedh-ɑ be mɑlli jwögg møøgø, kɑ gï ngɑ̈ddi gen ki gëdhhì. Ge ɑ́göög ki ngïjji jwögg møg mɑlli yi gen.

¹⁷ Anɑn dhwöödh Jermɑyɑ̀, kɑ yï kedhí be köbbi gen møg-ɑ cïgɑ yïn bënn, yï ko böggi yi gen, kipe yï ógöjjɑ wɑ̈ɑ̈rø kì bøli gen.

^18-19 Lïng Jermɑyɑ̀! Yï óbëëd yï mɑɑn yi ji bënn kì piny men, yï ómɑn yi rɑ̈nhi Yeudiyɑ̀, kí jɑgge geki ji bënn, ge óbëëd ge mɑ̈n ki yïn. De dicyɑ̈ngtïn, yï thödhɑ’ thödhø ki tegø men guum kwøbbi gen. Yï óni kɑɑl-ɑ ówenø ki dörø, kɑ yï nɑ lööj ngyënyø dødø, kɑ yï nɑ döri ngyënyø dilɑl. Yï koo tyɑm yi gen, mɑ́ yɑ ócyɑ̈dhi ki yïn kɑ yï korrɑ. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.”