Icɑyɑ̀ 1 - WÄNYI KWËRØ 2011

¹ Wɑ̈nyø men bɑ wööd kì ri Yeudiyɑ̀ kí Yerusɑlem, wöddɑni ɑ́cɑ̈rr-ɑ Icɑyɑ̀ wɑ̈d Amodh yi Jwøk kì runn-ɑ ɑ́jyɑ̈ɑ̈g Udhiyɑ̀, kí Yöthɑm, kí Akɑɑdh, kí Kedhekiyɑ̀ gɑ rɑ̈nhi Yeudiyɑ̀.

Jwøk Jie Ányudhe Bɑ̈jji Gen

² Jwøng-ɑ Ácwɑ̈ɑ̈j okööbø kinni, “Lïng wun, wun ɑ mɑl kí piny! Lïngu møg-ɑ kwøbɑ! Othønhø møg-ɑ ɑ́kɑ̈ɑ̈lɑ kì Rïp ɑ́døøg cwɑggɑ.

³ Dhög wëëg gen ngɑ̈nyi yi gen, o ɑderr keny-ɑ nyi kɑ̈nni yi wïi gen ki gïncɑɑm gen, ngɑ̈nyi yi gen. De Isrɑil kwïj wøw; jiɑ bong gïn gɑm yi wɑ̈thi gen.”

⁴ Yï pödhi orøg, yï ɑ́gɑ̈g. Yïn, yï pödhi orøg! Wu tɑ̈ɑ̈y-ɑ piny yi orøøg wun. Wu ɑ́bɑny-ɑ Jwøng-ɑ Ácwɑ̈ɑ̈j kwërø. Eni men-ɑ́ Jwøøg Isrɑil, kɑ ngɑ̈thi wun lugu en.

⁵ Wude ɑ rïïj wu opëmø? Wu ócuggi cɑyø kidï? Yïn ɑ Isrɑil, wïjí pɑ̈ng yi kɑ̈jjiledh, o miní kí ngedhí ge ceg-ɑ rɑ̈m.

⁶ Bong keny døj kì rií, cɑg kì ri wïjí gïti tyelí. Dëlí pɑ̈ng yi kɑ̈jjiledh; kɑ̈jjiledh møg-ɑ rií nuti pɑ̈nyø lwøgø, wɑlɑ̀ ge nuti koodø. Ge nuti kïdhø ki yɑdh.

⁷ Pödhi wun ɑ́döng nøw kɑ̈ddi wun ɑ́rɑ̈b ki mɑc. Piny wun okwɑnyø yi tyëngpɑth, o jɑmmì bënn orënyø yi gen, wu onëënø yøw.

⁸ Yerusɑlem ɑ́döng kete, e bɑ ɑtyeg, o bong gïn korrii ni ød tyëng-ɑ nyi kor bɑɑg oløg, wɑlɑ̀ ɑkɑnø kì yij bɑɑg cwir.

⁹ Ke di bëëd e pɑth ki Jwøng-ɑ Ácwɑ̈ɑ̈j, Jwøng teg, ɑ ɑ́wïyi ki kwï ji, Yerusɑlem di nɑ̈g bëne ni Sødømɑ̀ geki Gømørɑ̀.

¹⁰ Yerusɑlem, jií nɑ tyëng Sødømɑ̀ kí Gømørɑ̀ ceth. Lïngí gïn-ɑ köbbi yïn yi Jwøng-ɑ Ácwɑ̈ɑ̈j. Kyën yïthhí kɑ gïn-ɑ pwönyi yïn yi Jwøgee lïngí.

¹¹ Okööbø kinni, “Yï orumø kinni gëdhh-ɑ nyi rïïj ge mëggí yɑn ɑnɑn di dwɑddø yi yɑn? Yɑ ɑ́ngïr yi órömm-ɑ nyi rɑ̈bbí yɑn gɑ gëdhhì, kí dwɑ̈lli dhögí. Pyëwɑ pɑ med ki remmi dhögi wun geki dyëgi wun.

¹² Á men ɑ ɑ́köbbi wun kinni nyi nyøn wun Kengɑ, kenyi bëën wun be mɑlli yɑn? Á men ɑ ɑ́köbbi wun kinni nyønu Kengɑ?

¹³ Bong gïn gwøg yi kɑ̈nø ki gëdhhì. Pyëwɑ nyii lɑ̈mmø yi yømi bɑkur men-ɑ nyi rɑ̈b yi wun. Pyëwɑ pɑ med ki tugi kwëër dwɑ̈n nyɑ̈n geki Sɑbɑth, kí kwërr-ɑ kyeelø; ge ɑ́rënyi yi orøøg wun.

¹⁴ Kwëër cɑ̈gi dwɑ̈n-ɑ nyɑ̈n geki cyɑ̈nggi kwër mø wun mɑɑn yi yɑn; yɑ ɑ́ngïr yi gen.

¹⁵ “Keny-ɑ ótïng wun cinggi wun mɑl wu ómɑ̈ddø, yɑ pɑ lïïdh yï wun. Cɑgg wu kwɑ̈jji kidï, kwɑ̈jji wun pɑ lïngɑ, mɑ́ cinggi wun dɑ rem.

¹⁶ Lɑw wun ri wun o wu dhïwi wun. Wiyu gïgrijjø møg-ɑ nennɑ ge ogøggø yi wun ɑnɑn. Wiy wun gwøg ki gïgrijjø,

¹⁷ kɑ wu dïd wun ki gøggi dyër. Gwøøg dyër ceth; kønyu tyëng-ɑ nyingi gen guud, kɑ jɑmmi kïjj mëggu gen, kɑ thwömm-ɑ mɑ̈nn nyi cwɑg wun.”

¹⁸ Jwøng-ɑ Ácwɑ̈ɑ̈j okööbø kinni, “Tyëg wɑ kwøbbɑni. Cɑgg ɑ́ kɑ̀ bëëd wu kwɑɑr yi orøg, wu ólwøg yi yɑn kɑ wu ótɑ̈rø ni ɑ́piy. Cɑgg ɑ́ kɑ̀ bëëd orøøg wun kwɑrø, ógöögø e pɑ̈r ki yëyyi dyëg mø tɑr cɑrø.

¹⁹ Keløg kwøbbɑ olïngø yi wun, wu ócyɑ̈mø ki jɑmm-ɑ døj møg-ɑ cyeg kì piny men.

²⁰ De keløg yɑ óbɑny yi wun, kɑ wu tyeer-ɑ wɑ̈yi wun, wu bɑ møg thøw. Yɑn, yɑ Jwøng-ɑ Ácwɑ̈ɑ̈j, yɑ ɑ́rum ki kwøb.”

Kɑɑl Orøg

²¹ Kɑɑl-ɑ ɑ́bëëd e mïdh-ɑ yïëyø, ɑ́göög e nɑ ngɑn nyi niin ki köögi! Ábëëd yije pɑ̈ng yi tyëngtir kì bøli keny megø, de ɑ́döng ɑ́ tyëngnɑ̈g ki ji kì yije.

²² Yerusɑlem, kɑ̈ge dööng yï ɑ́bëëd yï nɑ ɑ́tegø ɑ pere teg, de ɑnɑn yï ɑ́göög yï bong perí; yï ɑ́bëëd yï nɑ møgi oløg me døj, de ɑnɑn yï bɑ pï yøw.

²³ Jɑggí bɑ tyëngpëëmø, o ge bɑ mɑ̈dhh ki kurrì. Ge nyi rïïj ge yïëy-ɑ gïg-ɑ mëggi gen kɑ dhøggi gen nyi kum ki ngyëny. Kïj pere pɑ nyi nyɑg yi gen kì burø, o thwöm gønye pɑ nyi lïngi yi gen.

²⁴ Anɑn lïngu møg-ɑ ɑ́kwøb yi Wïlɑ̈bø, Jwøng-ɑ Ácwɑ̈ɑ̈j, Jwøøg Isrɑil, Jwøng-ɑ teg, okööbø kinni, “Gøølɑ ócolɑ kì wun, wu tyëngmɑ̈ɑ̈nø, o yɑ koo jud yi wun këti.

²⁵ Wu ógöggɑ gïi wun, wu óliilɑ ni kenyi liil ngyënyø, o gïg-ɑ ywëëdh wun bënn kɑ̈ɑ̈lɑ wɑ̈g.

²⁶ Wu óthödhɑ ki jɑgg kí tïddi kwøb, mø ni møg-ɑ ɑ́ying yï wun kɑ̈ge dööng. O Yerusɑlem døøgɑ be cwølø ɑ́ kɑɑltir, kɑɑl-ɑ mïdhi yïëye.”

²⁷ Mɑ́ Jwøng-ɑ Ácwɑ̈ɑ̈j tir, Yerusɑlem óyiel yi en, geki tyëng-ɑ óyewi.

²⁸ De ngɑn-ɑ órøngi kɑ opëmø ónyøn yi en. Ngɑn-ɑ ówiyii piny ónɑ̈g yi en.

²⁹ Wu ópɑ̈di kì bɑng kɑ ɑ́kwɑjji wun yenh, kɑ bɑ̈ggi wun yulli wun jwögg møøgø.

³⁰ Wu ówøw ni yɑdh, wu ógöögø ni bɑg me yije bong pï.

³¹ Tyëng-ɑ teg óthøw; ge óni lum ɑ nyi rɑ̈b yi opeli mɑc, bong ngɑn-ɑ óyiel gen.