Edhrɑ̀ 3 - WÄNYI KWËRØ 2011

Cɑ̈gi Mɑ̈ddø Këti

¹ Kì bïryeew dwɑ̈tt e tyëng Isrɑil rum pëggi yethi myërri gen bënn, ɑcugi ji kì Yerusɑlem.

² Codhe, ɑdhwödh Jöcwø wɑ̈d Yödhɑdɑk, kí ókwërr-ɑ kyeelø, kí Dherubɑbïl wɑ̈d Ceɑltiel, ɑger gen këli lɑm mi Jwøøg Isrɑil, kinni o wïje nyi rɑ̈b gen gëdhhì ni kɑ ógwedii kì yij Wɑ̈nyi Ciggi Mosɑ̀ jɑlkwøbbi Jwøk.

³ Cɑgg ɑ́ kɑ ɑ́bëëd ge óböggø yi tyëng-ɑ bëëdø kì pönhɑni, këli lɑm ɑ́døøg gen ki geer keje cøn, kɑ ge døøg-ɑ be rɑ̈b ki gëdhhi mwøl geki gënhi böörø.

⁴ Kɑ Kwëër Akɑnnì gwøg yi gen ni kɑ ɑ́cegii ceth, kɑ gëdhhì møg-ɑ dwɑddi nyi gwøg yi gen yethi cyɑ̈ng ceth.

⁵ Kɑ ge nyii muujø ki gëdhh-ɑ nyi rɑ̈b kì bøli kɑ̈jji gen ceth, kí gëdhhi cɑ̈gi dwɑ̈y, geki gëdhhi kwëër Jwøng-ɑ Ácwɑ̈ɑ̈j møg-ɑ per gen nyi cugi yi ji bënn, kí jwödhø møg-ɑ nyi muuj yi ji.

⁶ Kì kyeel cyɑ̈nggi bïryeew dwɑ̈tt, ɑcɑ̈gi gen ki nëngi Jwøng-ɑ Ácwɑ̈ɑ̈j ki gënh-ɑ nyi rɑ̈b bëne, kí gëdhh-ɑ kyeelø bënn, ngö tyelli Kengi Jwøng-ɑ Ácwɑ̈ɑ̈j ɑ́bëëd ge nuti këël piny.

Cɑ̈gi Kengø ki Døøgø Gerø

⁷ Amuuj ji ki ngyëny, ge thödh-ɑ jøg-ɑ nyi twïgø ki kïttì, kí jøg-ɑ nyi yïëdhø ki pɑ̈mmì, kɑ ge omuujø ki gïgcɑmm, kí møw, kí gïgmɑdh, gɑ møg ör kɑ̈ddi Suur geki Sïdön, o ge wil ki yenh sɑndɑl kì Lubnɑn, o yenhɑni kɑ̈ɑ̈l Yɑpɑ̀ ki nɑm. Møgɑni bënn ɑ́gwøg ge rumø ki yïëyø yi Körec, rɑ̈nhdwøøng Pɑres.

⁸ Codhe, kì ri ryeew dwɑ̈tt kì yij run, ɑkedhi gen kej Kengø kì Yerusɑlem, ɑcɑ̈gi gen ki gwøg. Dherubɑbïl, kí Jöcwø, kí jø pödhi gen bënn, kí ókwër, kí Kwɑrri Leebì, kí tyëng-ɑ ɑ́dwöög Yerusɑlem bënn, ge ɑ́mɑ̈gi ki gwøg. Kwɑrri Leebì bënn møg-ɑ runni gen bɑ pyɑ̈r ɑ́ryew gïti mɑl, gen ɑ́ cinggi gen ɑ́cïb gwøg døøgi Kengø ki gerø.

⁹ Jöcwø geki wɑ̈dde, kí Kɑdmiel geki wɑ̈dde, kí wɑddi gøn, kí Binuy, kí Ödɑbiyɑ̀, ge bënn ɑ ɑ́nenni gwøøg Kengø, kyeel geki wɑ̈ddi Ënɑdɑd, ɑ løg Kwɑrri Leebì bënn, geki wɑ̈ddi gen, kí wɑddi gen. Ge ɑ́kwɑny-ɑ nenni gwøøg geri ød Jwøk.

¹⁰ Keny-ɑ ɑ́cɑ̈gi jøg-ɑ gëdø ki geri Kengi Jwøng-ɑ Ácwɑ̈ɑ̈j, ɑbëën ókwër mɑl ki ógudhi kwër kì ri gen, kí kɑ̈ngì kì cinggi gen. Kɑ Kwɑrri Leebì mø wïj gøl Asɑp ki thømi gen bï-ɑ be lejji Jwøng-ɑ Ácwɑ̈ɑ̈j ni kɑ ɑ́cïg Debïd, rɑ̈ɑ̈dh Isrɑil.

¹¹ Awör gen ge lejj-ɑ Jwøng-ɑ Ácwɑ̈ɑ̈j, o ge pøjj-ɑ en kinni, “Jwøng-ɑ Ácwɑ̈ɑ̈j døøj, o Isrɑil mɑɑr yi en gïti ɑtheer.” Kɑ ji óryeerø, ngɑn ryeer kɑ döngi cwɑgge bëne, e lejj-ɑ Jwøng-ɑ Ácwɑ̈ɑ̈j kipe kɑ ɑ́cɑ̈gi gwøøg geri Kengi Jwøng-ɑ Ácwɑ̈ɑ̈j.

¹² Ókwër mø gïïr, kí Kwɑrri Leebì, kí jyɑ̈ggi wɑ̈thi kɑ̈llì, møg-ɑ ɑ́lidh Kengi tyeli mɑl, keny-ɑ ɑ́lidh gen tyelli Kengø ge këël-ɑ piny, ɑywöngi gen ki ywøng dwøng. De tyëng-ɑ kyeelø møg-ɑ ɑ́ying kenyɑni kïïw-ɑ medi pëthi gen.

¹³ Kɑ bong-ɑ ngɑn cuggi yodi ryeeri medi pyëw kí men-ɑ töngi ɑ́ ywøg, mɑ́ cwɑggi ji ɑ́wɑ̈dhi mɑl kidøøj, kɑ ge lïngi kì kun lɑ̈wi.