Dɑniel 12 - WÄNYI KWËRØ 2011

Bøli Kej Thumi Piny

¹ Akööb wëywön-ɑ rug ógødh kor-ɑ yöm kinni, “Kì bøli kenyɑni, Mikɑil wëywön-ɑ dwøng, ɑ kor pödhi wun, ódhwödh. Ódi ywøøg yij me dwøng, ywøøg yiny ni menɑni nuti pɑ̈nyø’ lïngø kër-ɑ ɑ́cɑ̈gi pödhh. De kì bøli kenyɑni, tyëng pödhi wun bënn møg-ɑ nyingi gen ógweed yij wɑ̈nyø óyiel.

² Mø gïïr kì kelli tyëng-ɑ ɑ́thøw ódhwödh, møøgø ónëënø këti gïti ɑtheer, møg-ɑ kyeelø ókedh-ɑ yij orɑng-ɑ pɑ thumi.

³ Jɑgg-ɑ wɑ̈thi gen pel, óbëëd ge tɑr ni mɑl, o møg-ɑ ɑ́pyejji ji ki yuu-ɑ dyër ómënyø ni kyelli mɑl gïti ɑtheer.”

⁴ Kɑ yɑ köbbe kinni, “Anɑn Dɑniel, cyëëg wɑ̈nyø kɑ dhøge muul, óbëëdø ɑ́ ɑmul gïti keny-ɑ óthumi piny. Kì kɑɑmɑni, møøgø óbëëdø ge nyi kedh-ɑ keny kí keny ge yɑb-ɑ dïdø.”

⁵ Codhe, kɑ jøg ɑ́ryew lidhɑ ge ócungø kì kömi nɑm, men ying-ɑ løøng, o men ying-ɑ løøng-ɑcɑ̀.

⁶ Kɑ wëywön-ɑ rugø ki ógødh kor-ɑ yöm, ɑ ying wɑ̈thi pïi nɑm kì mɑl pyëj yi wëywön-ɑ kyeelø kinni, “Á kɑɑm me bëëdø kidï ɑ óthumi, o gïïngɑ̈ngø møg cwöb gen?”

⁷ Kɑ wëywön-ɑ rugø ki ógødh kor-ɑ yöm, ɑ ying wɑ̈thi pïi nɑm kì mɑl cingge ryeet tïnge, kɑ lïngɑ e óköngø ki nyingi ngɑn-ɑ nëënø gïti ɑtheer, ɑkööbe kinni, “Bɑ runn ɑ́dɑ̈g kí budi run. Møgɑni ópɑ̈dhi kɑ̈jji gen ɑ keny-ɑ órum tyëng kwërø ki tyɑmø.”

⁸ Møgɑni bënn ɑ́lïngɑ, de ge nuti gɑmø yi wïjɑ. Apëjjɑ kinni, “Gïgɑni bënn ónywøl-ɑ ngø, wuö?”

⁹ Alögge kinni, “Wiy wɑ møgɑni Dɑniel, mɑ́ wɑ̈nyø ɑ́rum ki cyëgø kɑ mul, óbëëdø ɑ́ ɑcyëg gïti keny-ɑ óthumi piny.

¹⁰ Ji mø gïïr óliil kɑ ge ogöögø ge dhïw, de tyëngrijjø ócög ge rijjø. Bong ngɑnrɑj me wïje ógɑm møgɑni, den-ɑ́ tyëng-ɑ wɑ̈thi gen pel.

¹¹ “Cɑg kì bøli keny-ɑ ócuung gëdhhi yethi cyɑ̈ng, kɑ ngïji jwøng pɑth cwöödh oledh Kengø, bɑ cyɑ̈ng ɑ́lïp kí miy ɑ́ryew kí pyɑ̈r ɑ́bïngwen ɑ ópödhø.

¹² Tyëng-ɑ ómïdhi yïëyi gen gïti ri thumi cyɑ̈ng ɑ́lïp kí miy ɑ́dɑ̈g kí pyɑ̈r ɑ́dɑ̈g wïdɑ́bïj, ri gen dɑ gyëdh!

¹³ “O yïn, yï Dɑniel, mïdhí yïëyí, gïti keny-ɑ ówɑ̈nhi bøli kenyɑni. Yï óthøw kɑ yï odhwödhø kì cyɑ̈ɑ̈n piny, o yï kwɑny kööngí.”