Dɑniel 10 - WÄNYI KWËRØ 2011

Møg-ɑ Ányudhi Dɑniel kì Gɑ̈ɑ̈d Tigrì

¹ (Kì dɑ̈ɑ̈g runni Körec rɑ̈nhdwøøng Pɑres kì yij lɑwø, ɑ ɑ́nyudhi Dɑniel, ɑ cwøl ɑ́ Beltecɑdhɑr ki kwøb. Wöönɑni ɑ́bëëd ɑ́ dyër, de yodi gïn-ɑ wɑngi yi en teeg cɑrø ki mendwøng. Gïn-ɑ wɑngi yi møgɑni ɑ́löbbi Dɑniel e nɑ lɑ̈g.)

² Kì yethi cyɑ̈nggɑni yɑn, yɑ Dɑniel, yɑ ɑ́bëëd yijɑ óywöngø ki osboo ɑ́dɑ̈g,

³ yɑ pɑ nyi cyɑ̈mø ki gïncɑm me døøj, kí rïngø. Yɑ pɑ nyi mɑ̈dhø ki møgi oløg, wɑlɑ̀ yëyyi wïjɑ pɑ nyi pyël yi yɑn gïti kɑ ɑ́thumi osboo ɑ́dɑ̈g møgɑni.

⁴ Kì pyɑ̈r ɑ́ryew wïdɑ́ngween cyɑ̈nggi dwɑ̈n-ɑ mɑl kì yij run, yɑ ɑ́bëëd yɑ ócungø kì gɑ̈ɑ̈d Tigrì.

⁵ Kɑ wïjɑ tïngɑ, ɑlïdhɑ ki jɑl me rugø ki ógudhi kor-ɑ yöm, kí wëni dhɑm dhïw kì yije.

⁶ Dële orɑ̈ngø ni tigø. Bøle orɑ̈ɑ̈dø ni loodh mɑl, o nyinge ceg-ɑ lyelø ni mɑc. Bɑ̈dde geki twel tyelle rɑw ni dilɑl me thøø yi yojø, o cwɑgge nɑ kenyi gwɑg teedø mø ngenyø.

⁷ Bɑ yɑ ketɑ ɑ ɑ́nyudhi møgɑni. Bong gïjø mɑ ɑ́lidh yi tyëng-ɑ cyɑ̈dhi ki yɑn, de ge ɑ́bwøg kɑ ge reng-ɑ be pɑ̈nø.

⁸ Kɑ yɑ odöngø yɑ ketɑ kì kenyɑni, yɑ onëënø ki gïg mɑ ɑ́cuung wïjɑ ki mendwøng, kɑ dëlɑ ceg-ɑ thøø kinni lɑ̈p, bëëdɑ ree ɑ́wile; bong ngɑn cuggi ngiji yɑn.

⁹ Keny-ɑ ɑ́lïngɑ cwɑgge, kɑ yɑ ceg-ɑ pɑ̈ɑ̈dhø pyëwɑ tøøk, yɑ pɑ̈ɑ̈dhø yijɑ rum yɑn piny.

¹⁰ Kɑ yɑ mɑg yi cingø megø, ɑtïnge yɑn kömi cøngɑ e cinggɑ thɑɑny yɑn piny, e dëlɑ nudd e okïrrø.

¹¹ Kɑ yɑ köbbi yi wëywönɑni kinni, “Dɑniel, yï mɑɑr yi Jwøk. Dhwödhí mɑl kɑ yï lïng kidøøj ki møg-ɑ köbbɑ yïn. Yɑ ɑ́ör-ɑ yïí.” Keny-ɑ ɑ́kwøbe møgɑni, kɑ yɑ dhwödh-ɑ mɑl dëlɑ nudd e okïrrø.

¹² Codhe, ɑkööbe kinni, “Dɑniel, yï ko böggi. Kwɑ̈jjí ɑ́lïngi yi Jwøk ceth kì cyɑ̈ng-ɑ ɑ́cɑ̈gi ki gwøgi rií mölø kipe yodi kwøbbɑni. Bɑ løøgi kwɑ̈jjí ɑ ɑ́kɑ̈ɑ̈l yi yɑn.

¹³ Yɑ ɑ́cöngi yi wëywön-ɑ kor Pɑres ki cyɑ̈ng pyɑ̈r ɑ́ryew wïdɑ́kyel. Codhe, ɑbëën Mikɑil, ɑ bɑ ɑ́kyel kì kelli jɑggi wëywödd be kønyi yɑn, mɑ́ yɑ ketɑ ɑ ɑ́nud kì Pɑres.

¹⁴ Yɑ ɑ́bï-ɑ be nyudhi yïn ki gïn-ɑ óbï kömi jií dhuki megø. Møg-ɑ nyudhi yïn, bɑ møg-ɑ ócwöb dhuki megø.”

¹⁵ Keny-ɑ ɑ́kwøbe møgɑni, kɑ yɑ lïïdh-ɑ piny yɑ okudø.

¹⁶ Wëywönɑni nënni e nɑ dhɑnhø, kɑ cinge rïïje, ɑnywɑle dhøgɑ, kɑ köbbɑ kinni, “Wuö, gïg-ɑ nyudhi yɑn èn, yɑ ɑ́nyönhi yi gen, o dëlɑ ɑ́dhɑ̈li wïyø ki okïr.

¹⁷ Yɑ nɑ bɑ̈ng me cungi kì bøli wɑ̈n. Yɑ kööb ɑ dï ki yïn? Yïɑ bong tegø, yɑ nɑ ngɑnthøø.”

¹⁸ Acige yɑ mɑgø, kɑ dëlɑ kɑl-ɑ tëngø.

¹⁹ Akööbe kinni, “Yï mɑɑr yi Jwøk, ko di gïn lïngø kì pyëwí, wɑlɑ̀ ko di gïn böggi yi yïn.” Kɑ yɑ ti-ɑ tëngø keny-ɑ ɑ́kwøbe møgɑni, ɑköbbɑ en kinni, “Wuö, köbbí yɑn gïn-ɑ dwɑddí kwøbø. Yɑ ɑ́gwøg yɑ teeg yi yïn.”

^20-21 Kɑ okööbø kinni, “Gïn-ɑ pere ɑ́bëënɑ yïí ngɑ̈nyi yi yïn? Bɑ kipe kinni o yï yɑ̈llɑ gïg-ɑ ógwedø kì yij Wɑ̈nyi Dyër. Anɑn yɑ døøg-ɑ be nyɑɑg ki wëywöni Pɑres. Bɑnge ócwööb yi wëywöni Yönɑn. Bong ngɑn køny yɑn den-ɑ́ Mikɑil wëywöni Isrɑil.