Cɑ̈gø 2 - WÄNYI KWËRØ 2011

¹ Codhe kɑ lɑ̈bø bëne órumø ki cwɑ̈jø.

² Jwøk gwøng-ɑ ɑ́bëëd gø ogwøgø yi en ɑ́tyëge, kɑ oywömø kì bïryeew cyɑ̈ng.

³ Kɑ bïryeew cyɑ̈ng kwëng yi Jwøk, kɑ gø kwëre, mɑ́ bene cyɑ̈ngɑni ɑ ɑ́ywöme ree ki gwøng-ɑ ɑ́bëëd gø ogwøgø yi en, ɑ løg gwøøg cwɑ̈j.

⁴ Bene kër-ɑ ɑ́cwɑ̈ɑ̈j lɑ̈bø ɑnɑn yi Jwøk, Jwøng-ɑ Ácwɑ̈ɑ̈j. Keny-ɑ ɑ́cwɑ̈ɑ̈j mɑl geki piny yi Jwøk,

Bɑɑg Eden

⁵ ɑ́bëëd e bong lùm kí yenh kì kömi piny. Bong yenh kí lùm mɑ ɑ́bëëd ge twïyø, mɑ́ kødh ɑ́bëëd gø nuti kɑ̈ɑ̈l en kömi piny. O ɑ́bong-ɑ dhɑnhø me purø,

⁶ de ɑ́dɑ pï mø nyi bï kì piny, kɑ lɑ̈bø bëne nyii thïnyø yi gen.

⁷ Kɑ Jwøk, Jwøng-ɑ Ácwɑ̈ɑ̈j ókɑ̈bbø ki lɑ̈bø kì piny, kɑ ocwɑ̈jø ki dhɑnhø ki lɑ̈mɑni. Akudhe órømme ki wëy, kɑ dhɑnhø ogöögø ɑ́ ngɑn nëënø.

⁸ Kɑ Jwøk, Jwøng-ɑ Ácwɑ̈ɑ̈j opïdhø ki bɑg kì Eden, kì wɑɑng cyɑ̈ɑ̈ng mwøl, kɑ dhɑnhø men-ɑ ɑ́cwɑ̈je cïbe yij bɑngɑni.

⁹ Kɑ piny göjji twïyø yi Jwøk, Jwøng-ɑ Ácwɑ̈ɑ̈j ki yɑdh bëne, mø myëër ki nennø, kí yɑdh bëne mø døøj ki cɑmø, kɑ yɑɑdh wëy geki yɑɑdh ngɑ̈nyi gïndøj kí gïnrɑj cïbe dïdyëri bɑg.

¹⁰ Ádɑ nɑm me nyi mulli kì Eden, kɑ bɑg gø nyi cɑwe. Nɑmɑni kɑrø kì kenyɑni kɑ ogöögø ki nɑ̈mmì ɑ́ngwen.

¹¹ Nɑm-ɑ kyeel gen cwøl ɑ́ Picön, mølli e kɑ̈ll-ɑ kö piny Abïlɑ̀ bëne, kun-ɑ di dhɑb.

¹² Dhɑɑb pinyɑni døøj cɑrø, o kunɑni dɑ ɑ́dwøngi bedölɑ̀ kí kïtti coɑm (møg-ɑ myëër).

¹³ Nyingi nɑm-ɑ ryeew gen cwøl ɑ́ Gïön, en ɑ winni piny Kuc bëne.

¹⁴ Nyingi nɑm-ɑ dɑ̈ɑ̈g gen cwøl ɑ́ Tigrì, en ɑ kɑ̈l kuni wɑɑng cyɑ̈ɑ̈ng mwøl kì Acuur. O nɑm-ɑ ngween gen bene Porɑt.

¹⁵ Jwøk, Jwøng-ɑ Ácwɑ̈ɑ̈j, dhɑnhø ɑ́cïbe bɑɑg Eden kipe kinni o gø kore, o gø nyi pure.

¹⁶ Kɑ Jwøk, Jwøng-ɑ Ácwɑ̈ɑ̈j dhɑnhø cege kinni, “Yï ócuggø cɑm ni kɑ̀ dwɑddí kì ri nywøli yenh-ɑ yij bɑg bënn,

¹⁷ de yɑɑdh ngɑ̈nyi gïndøj kí gïnrɑj, yï ko pɑ̈nyi cɑm kì ree, mɑ́ keny-ɑ ócyɑ̈ɑ̈m kì ree, yï ceg-ɑ thøø ceth.”

¹⁸ Kɑ Jwøk, Jwøng-ɑ Ácwɑ̈ɑ̈j okööbø kinni, “Pɑ døøj eni bëëdi dhɑnhø kete. Ógöggɑ ki ngɑn me bëëdi gen røøm ki gøn, men-ɑ ókønyii.”

¹⁹ Kɑ Jwøk, Jwøng-ɑ Ácwɑ̈ɑ̈j jɑmmì bënn gwøge kì ri lɑ̈bø, ɑ løg lɑ̈yyi pɑ̈l bënn kí winyyi mɑl bënn, kɑ gï muuje dhɑnhø, o gï cɑ̈gge ki nying. Nying-ɑ ɑ́cɑɑgii yi dhɑnhø, en ɑ óbëëd ɑ́ nyinge.

²⁰ Codhe, kɑ lɑ̈yy bënn geki winy cɑ̈ggi yi dhɑnhø ki nying. De men ɑ́ en kiree, ɑ́jɑ̈ddi ki ngɑn bëëdi gen røøm ki gøn, me kønyii.

²¹ Codhe, kɑ dhɑnhø göjji nenø yi Jwøk, Jwøng-ɑ Ácwɑ̈ɑ̈j, kɑ ónenø ki nin mø peeg. Kɑ̈ng-ɑ ɑ́nine, kɑ Jwøk kɑ̈n-ɑ wɑ̈g ki ɑ́kyel kì kelli ngëdde, kɑ kenyɑni cyëge ki rïngø.

²² Kɑ ngënɑni gwøg yi Jwøk, Jwøng-ɑ Ácwɑ̈ɑ̈j ɑ́ dhɑkøw, codhe kɑ dhɑkøw muuje dhɑnhø.

²³ Akööb dhɑnhø kinni, “Anɑn, men bɑ ngɑn me cue ɑ́kɑ̈ɑ̈l ri cuɑ, dële ɑ́kɑ̈ɑ̈l-ɑ ri dëlɑ, ócwølli yi yɑn ɑ́ dhɑkøw, mɑ́ e ɑ́kwɑny-ɑ ri dhɑnhø.”

²⁴ Bene ɑ bɑnge nyi wiy dhɑnhø wïye geki meye, kɑ ómɑ̈gø kì ri cyëge, kɑ ge ogöögø ki ɑ́kyel.

²⁵ Dhɑnhø geki cyëge, ge ɑ́bëëd ge cyɑ̈dh-ɑ nøw, de bong ɑyɑ̈r mɑ ɑ́böggi yi gen.